ខេត្តព្រៃវែង ៖ ស្ត្រីជាអ្នកលក់បន្លែផ្លែឈើម្នាក់នៅក្នុងផ្សារទ្រា ក្នុងស្រុកព្រះស្តេច ខេត្តព្រៃវែង បានបាត់បង់ជីវិតយ៉ាងអាណោចអាធ័ម ខណៈពេលដែលស្ត្រីរងគ្រោះយកផ្លែដូងទុំទៅកោសអោយអ្នកទិញ ស្រាប់តែម៉ូទ័រខ្នោសកោសដូងនោះត្រូវទឹកសើមឆ្លងចរន្តអគ្គិសនី បណ្តាលអោយឆក់ស្ត្រីរងគ្រោះបាត់បង់ជីវិតតែម្តង។
ហេតុការណ៍ខាងលើនេះ ត្រូវបានបង្កអោយមានការភ្ញាក់ផ្អើលឡើង កាលពីវេលាម៉ោង១១និង៣០នាទីព្រឹកថ្ងៃទី៥ តុលា នៅចំណុចផ្ទះជនរងគ្រោះដែលស្ថិតក្នុងផ្សារទ្រា ក្នុងភូមិព្រៃមាស ឃុំអង្គររាជ្យ ស្រុកព្រះស្តេច ខេត្តព្រៃវែង។
សមត្ថកិច្ចបានអោយដឹងថា ស្ត្រីរងគ្រោះឈ្មោះ ចន ម៉ាលីន ហៅស្រីកែវ អាយុ២៤ឆ្នាំ មានប្តី និងកូនតូចពីរនាក់ និងបានប្រកបមុខរបរលក់បន្លែផ្លែឈើ និងកោសដូងនេះច្រើនឆ្នាំមកហើយ តែមិនដែលមានគ្រោះថ្នាក់អ្វីទេ ទើបតែពេលនេះ ស្ត្រីរងគ្រោះជួបគ្រោះអកុសលបែបនេះតែម្តង ។
តាមប្រភពដដែលនេះបានបញ្ជាក់ថា មុនពេលកើតហេតុ មានប្រជាពលរដ្ឋម្នាក់បានទៅទិញដូងទុំពីស្ត្រីរងគ្រោះ ហើយអោយស្ត្រីរងគ្រោះជាអ្នកលក់កោសដូងនោះអោយហើយ ប៉ុន្តែម៉ូទ័រកោសដូងនោះបានត្រូវទឹកសើម ហើយស្ត្រីរងគ្រោះមិនដឹង ក៏បានដោតភ្លើងបញ្ឆេះម៉ូទ័រទាំងមិនបានជូតសម្អាតអោយស្ងួតសិន ទើបធ្វើអោយម៉ូទ័រឆ្លងចរន្តអគ្គិសនី លុះពេលស្ត្រីរងគ្រោះលូកដៃទៅកាន់ ក៏ធ្វើអោយឆក់ប្រកាច់សន្លប់ស្តូកស្តឹងភ្លាមៗតែម្តង ។
តាមប្រភពដដែលបានបញ្ជាក់បន្តថា ភ្លាមនោះ អ្នកលក់ដូរនៅជិតនោះបានឃើញក៏ស្រែកឆោឡោឡើងផ្អើលពេញផ្សារ និងបាននាំគ្នាដឹកស្ត្រីរងគ្រោះយកទៅមន្ទីរពេទ្យភ្លាមៗដែរ ប៉ុន្តែពេលទៅដល់ គ្រូពេទ្យប្រាប់ថា ស្ត្រីរងគ្រោះបានបាត់បង់ជីវិតទៅហើយ។
ពាក់ព័ន្ធនឹងករណីខាងលើនេះ សូមបងប្អូនជាក្រុមអាជីវករផ្សេងៗទៀត ដែលប្រកបមុខរបរពាក់ពន្ធ័នឹងចរន្តអគ្គីសនី សូមយកចិត្តទុកដាក់ និងប្រុងប្រយ័ត្នឱ្យបានខ្ពស់ ពិសេសនៅរដូវដែលឧស្សាហ៌មានភ្លៀងធ្លាក់ច្រើន ។ មុនពេលប្រើឧបករណ៌ណាមួយ ដែលភ្ជាប់និងចរន្តអគ្គីសន៌ សូមត្រួតពិនិត្យអោយបានច្បាស់ មុននិងដោតភ្លើងប្រើប្រាស់ ចៀសវាងកើតមានហេតុការណ៍ជាយថាហេតុដូចករណីខាងលើនេះ ៕ (កែសម្រួលដោយ ៖ ធីតា)
ចែករំលែកព័តមាននេះ