នារីថៃម្នាក់ កែរូបសាក់«ពស់»ទៅជា«នាគ» បាន១សប្តាហ៍ ប្រែប្រួល(វីដេអូ)
ថៃ ៖ ករណីស្ត្រីថៃម្នាក់ឈ្មោះ ស៊ូផាន់នី Supannee អាយុ៣២ឆ្នាំ មានទីលំនៅសង្កាត់បាងចាក់ ស្រុកមឿង ខេត្តណាខុន ស៊ីថាម៉ារ៉ាត…
ថៃ ៖ ករណីស្ត្រីថៃម្នាក់ឈ្មោះ ស៊ូផាន់នី Supannee អាយុ៣២ឆ្នាំ មានទីលំនៅសង្កាត់បាងចាក់ ស្រុកមឿង ខេត្តណាខុន ស៊ីថាម៉ារ៉ាត ដែលសុបិន្តឃើញសត្វនាគមួយបានលូនព័ន្ធលើខ្លួនរបស់នាង បន្ទាប់ពីសុបិន្តបែបនេះ ធ្វើឲ្យរូបនាងមានអារម្មណ៍ក្តៅស្ទើរតែរាល់យប់មិនអាចគេងបាន ដូច្នេះទើបសម្រេចចិត្តសាក់រូប«នាគរាជ» ប៉ុន្តែសិប្បករម្នាក់ សាក់ដំបូងចេញដូច«ពស់ពណ៌បៃតង»ទៅវិញ ដែលខុសពីគំរូដើមជារូបនាគ រហូតដល់ប្អូនស្រីរបស់នាងបង្ហោះរឿងរ៉ាវលើហ្វេសប៊ុក និងនាំកញ្ញា ស៊ូផាន់នី ទៅប៉ុស្តិ៍ប៉ូលីស ដើម្បីប្តឹងជាងសាក់រូបម្នាក់នោះ ។
ថ្មីៗកន្លងទៅនេះលេចឮថា កញ្ញា Supannee បានទាក់ទងទៅក្លឹបសិល្បៈសាក់អាជីពរបស់ប្រទេសថៃ នៅទីក្រុងបាងកក ដើម្បីស្នើសុំជាងចាក់សាក់មកពីហាង«ម៉ាក់ម៉ៃសាក់» ឲ្យកែរូបសាក់ចាស់របស់នាង ។
Supannee បានបង្ហើបប្រាប់អ្នកយកព័ត៌មានថា អ្នកបច្ចេកទេសចាក់សាក់ នៅហាងក្នុងទីក្រុងបាងកកនោះ បានកែច្នៃស្នាមសាក់ចាស់ ចំណាយពេលសាក់បីដង ក្នុង១ដងៗចំណាយពេលច្រើនម៉ោង រហូតដល់ចេញលទ្ធផលមក គួរជាទីគាប់ចិត្ត ព្រោះស្នាមសាក់ចេញដូច«នាគរាជ» ជាអ្វីដែលរូបនាងចង់បាន ។
កញ្ញា Supannee បាននិយាយបន្តថា តាំងពីចាប់ផ្តើមគោរពបូជា និងចាប់ផ្តើមសាក់រូបនាគ ធ្វើឲ្យរូបគាត់មានសំណាងត្រូវឆ្នោតពីរដងហើយ ខណៈដែលសាច់ញាតិនិយាយថា ស្នាមសាក់រូបនាគ នៅផ្នែកខាងក្រោយរបស់នាង ត្រូវបានគេចាត់ទុកថា គឺជាសញ្ញាដ៏ល្អ សម្រាប់គ្រួសារនិងមិត្តភក្តិ ផ្តើមចេញពីភាពរីករាយ និងសំណាង នៃអ្វីដែលកញ្ញាស៊ូផាន់នី ជឿនិងគោរពបូជាសត្វនាគ ។
ស្រាប់តែ នៅថ្ងៃទី៥ តុលា ២០២០នេះ កញ្ញា Supannee បានបង្ហើបឲ្យដឹងថា បន្ទាប់ពីចាក់សាក់អស់រយៈពេលជាងមួយសប្តាហ៍មក រូបនាងបានឃើញឡើងស្នាមក្រហមៗ លើកន្លែងរូបសាក់ ហើយរមាស់នៅខាងក្រោយ ដូចជាបាត់បង់អ្វីមួយ ប្រែជាជាំខ្មៅ ប៉ុន្តែសាក់នៅតែមិនទាន់រលុបទាំងស្រុងទេ ។
កញ្ញា Supannee មានការព្រួយបារម្ភថា អាឡែរហ្សី នឹងកើនឡើង ធ្វើឲ្យលំនាំស្នាមសាក់នាគផ្លាស់ប្តូរ ។ យ៉ាងណាមិញ ពេលនេះ កញ្ញា ស៊ូផាន់នី រងចាំមើល រោគសញ្ញាដែលកើតឡើងជាបន្ត តើវាប្រែប្រួលអ្វីទៀត ?
ចែករំលែកព័តមាននេះ