បើមិនគោរពទេ ក្លាយជាគំរូអាក្រក់មួយ មិនងាយដុសជ្រះឡើយ
- ព្រៃវែង
ខេត្តព្រៃវែង ៖ នៅព្រឹកថ្ងៃទី៤ ខែតុលា ឆ្នាំ២០២០ លោកស្រី ស្រេង ទៀង អភិបាលស្រុកពាមរក៌ បានដឹកនាំមន្ត្រីជំនាញ…
ខេត្តព្រៃវែង ៖ នៅព្រឹកថ្ងៃទី៤ ខែតុលា ឆ្នាំ២០២០ លោកស្រី ស្រេង ទៀង អភិបាលស្រុកពាមរក៌ បានដឹកនាំមន្ត្រីជំនាញ…
ខេត្តព្រៃវែង ៖ នៅព្រឹកថ្ងៃទី៤ ខែតុលា ឆ្នាំ២០២០ លោកស្រី ស្រេង ទៀង អភិបាលស្រុកពាមរក៌ បានដឹកនាំមន្ត្រីជំនាញ និងកម្លាំងសមត្ថកិច្ច ចុះទៅហាមឃាត់លោកស្រី យន់ សុខា ជាអ្នកលក់បាយនៅក្នុងបេនចំណតរថយន្តផ្សារអ្នកលឿង ដែលកំពុងធ្វើការសាងសង់សំណង់រំលោភយកដីបេនរថយន្ត។
ពលរដ្ឋនៅក្នុងតំបន់ទីប្រជុំជនអ្នកលឿងនេះ បានឱ្យដឹងថា សកម្មភាពរំលោភយកដីបេនចំណតរបស់អ្នកស្រី យន់ សុខា បានធ្វើឡើងជាច្រើនលើកច្រើនសារមកហើយ ដោយប្រើរូបភាពសង់ជារោងលក់បាយ បន្ទាប់មកក្លាយទៅជាបន្ទប់ដាក់ឥវ៉ាន់ចានឆ្នាំង ក្រោយមកទៀតក៏ទៅជាផ្ទះរស់នៅតែម្តង ។ ហើយកន្លងមក ទាំងកម្លាំងសមត្ថកិច្ច អាជ្ញាធរស្រុក និងខេត្ត ព្រមទាំងព្រះរាជអាជ្ញាថែមទៀត ធ្លាប់បានចុះមកហាមឃាត់ជាច្រើនលើកហើយដែរ ប៉ុន្តែលទ្ធផលបានត្រឹមតែត្រូវលោកស្រី យន់ សុខា និងគ្រួសារនាំគ្នាជេរបញ្ចោរលេងតែប៉ុណ្ណោះ។
ជាក់ស្តែង នៅព្រឹកថ្ងៃទី៤ ខែតុលានេះ សកម្មភាពចុះឃាត់លោកស្រី យន់ សុខា មិនឱ្យសាងសង់រោងថ្មីធ្វើពីដែក នៅក្នុងដីចំណតនេះ នៅតែមិនទទួលបានលទ្ធផល គឺបានត្រឹមតែធ្វើកិច្ចសន្យាប៉ុណ្ណោះ ឯសំណង់ដែលធ្វើនោះគឺទុកនៅដដែល មិនត្រូវបានរុះរើចេញវិញទេ ព្រោះលោកស្រី យន់ សុខា បានអះអាងថា ខ្លួនធ្វើដើម្បីលក់ដូរដោះស្រាយជីវភាពប៉ុណ្ណោះ ហើយពេលណាច្បាប់ឱ្យរុះចេញគាត់រុះចោលភ្លាម។
ដោយឡែកអាជ្ញាធរស្រុកពាមរក៌វិញ បានឱ្យដឹងថា គ្រួសារលោកស្រី យន់ សុខា នេះ គឺរឹងរូសខុសគេខុសឯង ដោយបានព្យាយាមរំលោភយកដីបេនចំណតរថយន្តនេះ ច្រើនលើកមកហើយ ពេលអាជ្ញាធរចុះឃាត់ គ្រួសារនេះមិនស្តាប់អាជ្ញាធរនោះទេ ដោយបានស្រែកជេរបញ្ចោរប្រមាថអាជ្ញាធរ និងសមត្ថកិច្ចខ្លាំងណាស់ ហើយពេលខ្លះក៏ថតបង្ហោះ FACEBOOK ចោទអាជ្ញាធរថា គាបសង្កត់ធ្វើបានគ្រួសារគាត់ជាពលរដ្ឋស្លូតត្រង់ថែមទៀត គឺពិបាកណាស់។
លោកស្រី សេង ទៀង អភិបាលស្រុកពាមរក៌ បានឱ្យដឹងដែរថា រឿងគ្រួសារលោកស្រី យន់ សុខា ព្យាយាមរំលោភយកដីបេនចំណតរថយន្តផ្សារអ្នកលឿងនេះ អាជ្ញាធរស្រុកបានធ្វើរបាយការណ៍បញ្ជូនទៅអាជ្ញាធរខេត្ត ហើយលោកអភិបាលខេត្តក៏បានបញ្ជូនរឿងនេះទៅខាងតុលាការ ដើម្បីចាត់ការទៅតាមផ្លូវច្បាប់ដែរហើយ ប៉ុន្តែមកដល់ពេលនេះ គឺច្រើនខែមកហើយ ខាងតុលាការនៅមិនទាន់មានចំណាត់ការអ្វីនោះទេ។
ដោយឡែកប្រជាពលរដ្ឋនៅទីប្រជុំជនអ្នកលឿងវិញ បានលើកឡើងថា បេនចំណតរថយន្តផ្សារអ្នកលឿងនេះ គឺមានតាំងពីឆ្នាំ១៩៨០មកម្ល៉េះ ហើយគ្រួសារលោកស្រី យន់ សុខា នេះ ទើបតែមកសុំធ្វើកូនតូបមួយក្នុងដីបេននេះ ដើម្បីលក់បាយចិញ្ចឹមជីវិតកាលពីឆ្នាំ១៩៩២សោះ ឥឡូវបែរជាមកវាទទីរំលោភយកដីបេនទាំងមូល ដោយឥតខ្មាស់អៀនទៅវិញ ។ ហើយទាំងសមត្ថកិច្ច និងអាជ្ញាធរស្រុក-ខេត្ត ជាច្រើនឆ្នាំមកហើយដោះស្រាយមិនចេញ រហូតបញ្ជូនរឿងទៅតុលាការទៀតនៅតែស្ងាត់សូន្យឈឹង ធ្វើឱ្យគ្រួសារលោកស្រី យន់ សុខា រឹតតែបានចិត្ត លែងស្តាប់ លែងខ្លាចអាជ្ញាធរអស់ហើយ កំពុងក្លាយជាគំរូអាក្រក់មួយប្រចាំតំបន់អ្នកលឿងជាក់ស្តែងតែម្តង ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ