ខេត្តសៀមរាប ៖ ពលរដ្ឋក្នុងក្រុងសៀមរាបក៏ដូចបងប្អូនអ្នកធ្វើដំណើរ សូមសំណូមពរឱ្យអាជ្ញាធរពាក់ព័ន្ធជួយមានវិធានការចំពោះសត្វគោទាំងអស់នេះផង ដោយមានការកត់សម្គាល់ឃើញថា សត្វគោជាច្រើនក្បាលត្រូវបានម្ចាស់ប្រលែងឱ្យដើរស៊ីស្មៅមកកម្សាន្តនៅតាមផ្លូវ៦០ម៉ែត្រ ជាពិសេសនៅរង្វង់មូលនេះតែម្ដង។ ទីតាំងផ្លូវ៦០ម៉ែត្រ ហៅថាផ្លូវសម្តេចវិបុលបញ្ញា សុខអាន ស្ថិតក្នុងសង្កាត់ស្លក្រាម ក្រុងសៀមរាប ខេត្តសៀមរាប។
ផ្លូវ និងតំបន់ចំណុចនេះគ្រប់គ្រងដោយអាជ្ញាធរជាតិអប្សរា។ ចំពោះពលរដ្ឋអ្នកធ្វើដំណើរជាមួយក្រុមគ្រួសារម្នាក់ ដែលមានឈ្មោះ សិទ្ធិ អាយុ៥៤ឆ្នាំ រស់នៅសង្កាត់ជ្រាវ ក្រុងសៀមរាប បានប្រាប់ភ្នាក់ងារកោះសន្តិភាព នៅល្ងាចថ្ងៃទី៣ ខែតុលា ឆ្នាំ២០២០នេះថា ពួកគេបើកឡានដឹកកូនប្រពន្ធដើរលេងតែងបានឃើញសត្វគោមួយចំនួន នៅតាមផ្លូវ៦០ម៉ែត្រនេះ គ្មានការចង ឬក៏មានការទទួលខុសត្រូវពីម្ចាស់គោនោះឡើយ។
ព្រោះក្នុងការធ្វើដំណើរនេះ មានអ្នកដំណើរខ្លះ បើកលឿន អ្នកដំណើរខ្លះបើកយឺត ខណៈពេលនោះខ្លាចសត្វគោរត់ដេញគ្នា អាចបណ្តាលឱ្យឲ្យមានគ្រោះថ្នាក់ដល់អាយុជីវិត ឬក៏មានការខូចខាតផងដែរ តើបាននរណាជាអ្នកទទួលខុសត្រូវ។ ជារៀងរាល់ថ្ងៃ ដោយម្ចាស់តែងបណ្ដោយឱ្យសត្វគោដើរឆ្លងផ្លូវគ្រប់ទីកន្លែងនៅក្បែរសាលា ខេត្ត ឬ ផ្លូវ៦០ម៉ែត្រ និងបានទៅស៊ីស្មៅដែលអាជ្ញាធរបានដាំលម្អផងដែរ។
លោក សិទ្ធិ បានសំណូមដល់ម្ចាស់គោ ក៏ ដូចអាជ្ញាធរពាក់ព័ន្ធទាំងអស់ ជាពិសេសអប្សរា ជួយមើលសត្វគោទាំងនេះផងកុំឱ្យវាដើរប្រសេច ប្រសាចពេញតែផ្លូវ អាចមានគ្រោះថ្នាក់ណាមួយជាយថាហេតុជាក់ជាមិនខាន។ ករណីនេះអាជ្ញាធរដែលគ្រប់គ្រងតំបន់ខាងលើហាក់បីមិនចាប់អារម្មណ៍ឡើយ។ ទោះយ៉ាងណាប្រជាពលរដ្ឋ បានស្នើសុំឲ្យអាជ្ញាធរដែលមានការពាក់ព័ន្ធជួយមានវិធានការរឿងផង៕ ដោយ ៖ ច័ន្ទ រស្មី
ចែករំលែកព័តមាននេះ