រាជធានីភ្នំពេញ ៖ បុរសជាអ្នករត់ម៉ូតូកង់បីឥណ្ឌាម្នាក់ ត្រូវបានគេប្រទះបញ្ចប់ជីវិតដោយចងកនៅលើម៉ូតូកង់បីរបស់ខ្លួន បង្កអោយមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះមកពិនិត្យកន្លែងកើតហេតុកាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី៣ ខែតុលា ឆ្នាំ២០២០ តាមបណ្តោយផ្លូវ១៣០ កែងផ្លូវលេខ៥ នៅចំណុចក្បែរនឹងមាត់ទន្លេ ស្ថិតក្នុងសង្កាត់ផ្សារកណ្តាល១ ខណ្ឌដូនពេញ រាជធានីភ្នំពេញ ។
បុរសរងគ្រោះឈ្មោះ លី អាយុជាង៦០ឆ្នាំ ស្នាក់នៅលើម៉ូតូកង់បីជាង១០ឆ្នាំមកហើយ ។
តាមប្រភពពីសាក្សីដែលឃើញហេតុការណ៍បានអោយដឹងថា មុនពេលមានការភ្ញាក់ផ្អើលដោយសារតែឃើញម៉ូតូកង់បី ពណ៌លឿងមួយគ្រឿងនោះចតនៅតាមចិញ្ចើមផ្លូវមុខផ្ទះប្រជាពលរដ្ឋជាច្រើនម៉ោងមកហើយ មិនឃើញចេញទៅដឹកភ្ញៀវសោះ ទើបសន្តិសុខដែលយាមនៅហាងក្បែរកន្លែងកើតហេតុបានដើរទៅមើល ស្រាប់តែប្រទះឃើញបុរសរងគ្រោះខាងលើចងកនៅជាប់នឹងកង់បី ដោយចងភ្ជាប់ពីដែកកាងនៅលើដំបូលកង់បីទម្លាក់មកខាងក្រោម បណ្តាលឱ្យបាត់បង់ជីវិតទៅហើយ និងបង្កឲ្យមានការភ្ញាក់ផ្អើលដល់ប្រជាពលរដ្ឋរាយការណ៍ទៅសមត្ថកិច្ចឱ្យចុះមកពិនិត្យនៅកន្លែងកើតហេតុ ។
តាមការបញ្ជាក់របស់សមត្ថកិច្ចបានឲ្យដឹងថា បុរសរងគ្រោះខាងលើនេះមានកូនប្រុស២នាក់ គាត់បានស្នាក់នៅ និងរត់ម៉ូតូកង់បីនៅទីនេះអស់ពេលជាង១០ឆ្នាំមកហើយ ប៉ុន្តែមិនដឹងថា គាត់មានរឿងអ្វីនោះទេ តែសង្ស័យគាត់មានវិបត្តិផ្លូវចិត្ត ទើបបានជាសម្រេចចិត្តបញ្ចប់ជីវិតដោយចងកនៅលើម៉ូតូកង់បីបែបនេះតែម្តង ។
ក្រោយពេលកើតហេតុ សមត្ថកិច្ចធ្វើកោសល្យវិច្ច័យរួចបានដឹកសពយកទៅតម្កល់ទុកនៅវត្តឬស្សីសាញ់រង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ