តាមបទពិសោធន៍ដាំដំឡូងដៃខ្លារបស់កសិករម្នាក់ យើងខ្ញុំសូមលើកយកមកបង្ហាញជូនដូចខាងក្រោមនេះ ៖
១-ការជ្រើសរើស និងទុកដាក់ពូជ ៖ ពូជដំឡូងដែលដាំគាត់បានរក្សាទុកដោយខ្លួនឯង ។ នៅពេលដែលដំឡូងមានមើមចាស់ ស្លឹកដំឡូងបាស ចាប់ផ្ដើមស្វិតងាប់បន្ដិចម្ដងៗ គាត់បានគាស់យកមើមដំឡូង ដោយរើសយកមើមធំៗល្មម ហើយថ្លោសល្អមកទុកធ្វើពូជ ។ ក្រោយពីបានគាស់រួចគាត់បេះដីចេញដោយមិនលាងទឹក រួចរៀបដាក់ក្នុងរោង ឬម្លប់ ដែលមានខ្យល់ ចេញចូលល្អ ដោយមិនឱ្យត្រូវពន្លឺថ្ងៃក្ដៅខ្លាំងពេក និងមិនឱ្យត្រូវទឹក ។
២-ការរៀបចំដីដាំ ៖ ដីដែលគាត់ដាំ គឺជាដីទួលមិនលិចទឹកនៅរដូវភ្លៀងធ្លាក់ ។ គាត់ជីករណ្ដៅដែលមានទំហំ៨តឹកបួនជ្រុង ជំរៅ២,៥ទៅ៣តឹក ដោយមានចន្លោះគុម្ព៣ទៅ៣,៥តឹក និង ចន្លោះរង៤ទៅ៥តឹក ។
៣-ការដាក់ជី ៖ ក្រោយពេលជីករណ្ដៅរួចហើយ គាត់ចាប់ផ្ដើមប្រមូលសំរាម ស្លឹកឈើងាប់ៗ និង កំទេចកំទីផ្សេងៗមកដាក់ក្នុងរណ្ដៅឱ្យពេញ រួចដុត ធ្វើដូចនេះរហូតគ្រប់រណ្ដៅ ។ សកម្ម ភាពនេះគាត់ធ្វើបន្ដិចម្ដងៗ រហូតដល់រដូវដាំធ្វើឱ្យដីក្នុងរណ្ដៅមានជីជាតិច្រើន ។
៤-ការដាំ ៖ មុនពេលដាំគាត់ដាក់ជីកំប៉ុស្ដបន្ថែមចំនួន ៣គីឡូក្រាម ក្នុងមួយរណ្ដៅ ហើយជ្រោយឱ្យដីផុសល្អ ទើបគាត់យកមើមដំឡូងមកដាំ ។ ក្នុងមួយរណ្ដៅគាត់ដាក់ដំឡូងដាំ១មើមធំ ដែលមានទំងន់ប្រមាណ២-៣ខាំ បើមើមតូច គាត់ដាក់២មើម ។
៥-ការថែទាំ ៖ បន្ទាប់ពីដាំរួចហើយ គាត់ស្រោចទឹក៤ ទៅ៥ថ្ងៃម្ដង (ស្រោចទឹកនៅពេលដីស្ងួត) ឬ រដូវប្រាំង ។ បន្ទាប់ពីដាំបានរយៈពេល២០ ទៅ២៥ថ្ងៃ គាត់ចាប់ផ្ដើមដោតជន្លង់ (ដំឡូង ដុះបានប្រវែង១ទៅ១,៥ម៉ែត្រ) ដោយ១ រណ្ដៅ គាត់ដោតជន្លង់មួយ ដែលមានប្រវែង ៣ទៅ៣,៥ម៉ែត្រ (ជន្លង់នេះអាចប្រើបាន រយៈពេល២ទៅ៣ឆ្នាំ) ។ ការពូនដីត្រូវបាន ធ្វើក្រោយដាំបាន៥០ទៅ៦០ថ្ងៃ ការពូនរង នេះ គឺដើម្បីឱ្យដំឡូង ចុះមើមបានល្អច្រើន ហើយធំៗ ម្យ៉ាងទៀត អាចចៀសវាងនៅ ពេលមានភ្លៀងដក់ទឹក ។
៦-ការប្រមូលផល ៖ នៅខែតុលា គាត់ចាប់ផ្ដើមប្រមូលយកទៅលក់ជាបន្ដបន្ទាប់ ដោយគាត់ប្រមូលបាន ៤,៥គីឡូក្រាមក្នុង១គុម្ព គាត់ដាំបាន១១៥ គុម្ព សរុបបាន៤៨៨គីឡូក្រាម ។ គាត់លក់ ដំឡូងឆៅ១គីឡូក្រាម តំលៃ១.០០០រៀល និង១.៣០០រៀល ក្នុង១គីឡូក្រាម សំរាប់ដំឡូងឆ្អិន ។ ក្នុងនោះគាត់លក់ដំឡូងឆៅបាន ១៥៤គីឡូក្រាម និងដំឡូងឆ្អិនបាន៣៣៥ គីឡូក្រាម៕
ចែករំលែកព័តមាននេះ