ខេត្តស្វាយរៀង៖ ទំនាស់ដីធ្លីដ៏រ៉ាំរ៉ៃរវាងប្រជាពលរដ្ឋចំនួន២គ្រួសារ នៅក្នុងភូមិចំបក់សង្កាត់ចេក ក្រុងស្វាយរៀង ខេត្តស្វាយរៀង ដែលអូសបន្លាយអស់រយៈពេល២០ឆ្នាំរហូតប្តឹងទៅតុលាការទៀតនោះ ត្រូវបានបញ្ចប់ដោយជោគជ័យ ក្រោមការសម្របសម្រួលឈ្នះ=ឈ្នះពីសំណាក់លោក ឌី វិជ្ជា…
ខេត្តស្វាយរៀង៖ ទំនាស់ដីធ្លីដ៏រ៉ាំរ៉ៃរវាងប្រជាពលរដ្ឋចំនួន២គ្រួសារ នៅក្នុងភូមិចំបក់សង្កាត់ចេក ក្រុងស្វាយរៀង ខេត្តស្វាយរៀង ដែលអូសបន្លាយអស់រយៈពេល២០ឆ្នាំរហូតប្តឹងទៅតុលាការទៀតនោះ ត្រូវបានបញ្ចប់ដោយជោគជ័យ ក្រោមការសម្របសម្រួលឈ្នះ=ឈ្នះពីសំណាក់លោក ឌី វិជ្ជា អគ្គស្នងការរងនគរបាលជាតិ និងជាប្រធានសហភាពសហព័ន្ធយុវជនកម្ពុជាខេត្តស្វាយរៀង។ សូមរំលឹកថា៖ ម្ខាងអះអាងថាមានច្បាប់ ឯម្ខាងទៀតថាជាដីចំណីបឹងទេ !
ក្រោយពីភាគីដើមបណ្ដឹងបានស្នើសុំអន្តរាគមន៍ពីលោកឌី វិជ្ជា ដោយផ្ទាល់កាលពី
សប្តាហ៍មុន និងទទួលឯកសារសំណុំរឿងរួច លោកក៏បានស្នើដល់អាជ្ញាធរដែនដីធ្វើការត្រួតពិនិត្យនិងដោះស្រាយឡើងវិញ។ លោកតូច ប៉ូលីវ៉ា អភិបាលរងខេត្តស្វាយរៀង បានបញ្ជាក់ប្រាប់អ្នកសារព័ត៌មានប្រចាំខេត្តស្វាយរៀងថា នៅថ្ងៃទី២ខែតុលា ឆ្នាំ២០២០ ដោយមានការចូលរួមពីព្រះរាជ្ញារងនៃអយ្យការអមសាលាដំបូងខេត្ត លោកចៅក្រម សាលាដំបូងខេត្តស្វាយរៀង អាជ្ញាធរដែនដី និងភាគីពាក់ព័ន្ធ ក្រុមការងារបានចុះទៅពិនិត្យដល់ទីតាំងកើតមានទំនាស់រវាងភាគីឈ្មោះម៉ិល ធឿន និងភាគីឈ្មោះចាន់ សាវ៉ាន់ រួមទាំងការធ្វើអត្តសញ្ញាណដីទំនាស់ បានរកឃើញថាភាគីឈ្មោះម៉ិល ធឿន បានរស់នៅលើដីចំណីព្រែក បានចាក់ដីចូលទៅលើព្រំដីឈ្មោះចាន់ សាវ៉ាន់ បន្ថែមទៀត។
ក្រោយពីបានចុះពិនិត្យរួច ក្រុមការងារបានហៅភាគីទាំង២ មកសម្របសម្រួលពន្យល់ណែនាំទាំងផ្លូវច្បាប់ និងភាពជាក់ស្តែងរួចមក ភាគីទាំង២ បានយល់ព្រមបញ្ចប់ទំនាស់ដោយភាគីឈ្មោះ ម៉ិល ធឿន យល់ព្រមប្រគល់ដីស្រែទំនាស់ឱ្យភាគីចាន់ សាវ៉ាន់ ហើយភាគី ម៉ិល ធឿន ត្រូវធ្វើពាក្យស្នើសុំខ្ចីដីចំណីព្រែកដែលខ្លួនអាស្រ័យផលមកចៅសង្កាត់ ព្រមទាំងធ្វើកិច្ចសន្យាព្រមព្រៀង បញ្ចប់ទំនាស់ដីធ្លី និងដកពាក្យបណ្តឹងទាំងសង្ខាង នៅទីតាំងទំនាស់ចាប់ពីពេលនេះតទៅ ប្រកបដោយទំនុកចិត្ត និងស្មារតីទទួលខុសត្រូវ។ លោកបានបញ្ជាក់ថា យុទ្ធសាស្ត្រឈ្នះឈ្នះតាមការណែនាំរបស់លោក ឌី វិជ្ជា ទទួលបានស្នាមញញឹម និងភាពសុខដុមរម្យនាទាំងអស់គ្នាអរគុណសន្តិភាព ៕
ចែករំលែកព័តមាននេះ