ខេត្តកំពង់ចាម ៖ ឃាតករម្នាក់ដែលបានសម្លាប់ប្អូនរបស់ខ្លួនបង្កើតនៅស្រុកស្នួល ខេត្តក្រចេះ ហើយបានរត់គេចខ្លួនមកសំងំនៅស្រុកកំពង់សៀម ខេត្តកំពង់ចាម ត្រូវបានកម្លាំងសមត្ថកិច្ច ធ្វើការស្រាវជ្រាវដឹងរហូតដល់ឈានចាប់ខ្លួន ។ ប្រតិបត្តិការនេះបានធ្វើឡើងនៅវេលាម៉ោង១១…
ខេត្តកំពង់ចាម ៖ ឃាតករម្នាក់ដែលបានសម្លាប់ប្អូនរបស់ខ្លួនបង្កើតនៅស្រុកស្នួល ខេត្តក្រចេះ ហើយបានរត់គេចខ្លួនមកសំងំនៅស្រុកកំពង់សៀម ខេត្តកំពង់ចាម ត្រូវបានកម្លាំងសមត្ថកិច្ច ធ្វើការស្រាវជ្រាវដឹងរហូតដល់ឈានចាប់ខ្លួន ។
ប្រតិបត្តិការនេះបានធ្វើឡើងនៅវេលាម៉ោង១១ និង៣០នាទីព្រឹកថ្ងៃទី០២ តុលា ២០២០ ក្រោមកិច្ចសហការជាមួយកម្លាំងនាយកដ្ឋានព្រហ្មទណ្ឌក្រសួងមហាផ្ទៃ ។
លោកឧត្តមសេនីយ៍ត្រី ហេង វុទ្ធី ស្នងការរងនគរបាលខេត្តកំពង់ចាម ទទួលផែនព្រហ្មទណ្ឌ បានឲ្យដឹងថា កម្លាំងជំនាញរបស់ផែននគរបាលព្រហ្មទណ្ឌ នៃស្នងការដ្ឋាននគរបាលខេត្តកំពង់ចាម ដឹកនាំដោយរូបលោក សហការជាមួយកម្លាំងជំនាញរបស់នាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ដឹកនាំដោយលោកឧត្តមសេនីយ៍ទោ ជាវ វិបុល អនុប្រធាននាយកដ្ឋាន ចុះអនុវត្តន៍ដីកាបញ្ជាឲ្យចូលខ្លួនលេខ៤៧៥/២០ ចុះថ្ងៃទី០២ ខែតុលា ឆ្នាំ២០២០ ចេញដោយលោក ជា សុភ័ក្ត្រ ព្រះរាជអាជ្ញារង នៃអយ្យការអមសាលាដំបូងខេត្តក្រចេះ ។
ជនសង្ស័យដែលចាប់ខ្លួនបានខាងលើនេះ មានឈ្មោះ ថេង សុធី ហៅថ្លាង ភេទប្រុស អាយុ៣១ឆ្នាំ ជាតិខ្មែរ មានទីលំនៅភូមិថ្ពង ឃុំស្នួល ស្រុកស្នួល ខេត្តក្រចេះ ពីបទហិង្សាដោយចេតនា មានស្ថានទម្ងន់ទោស (ដោយសារមរណៈភាពជនរងគ្រោះ) ប្រព្រឹត្តនៅភូមិថ្ពង់ ឃុំស្នួល ស្រុកស្នួល ខេត្តក្រចេះ កាលពីថ្ងៃទី២០ ខែកញ្ញា ឆ្នាំ២០២០ កន្លងទៅ ។
លោកឧត្តមសេនីយ៍ត្រី ហេង វុទ្ធី បានបន្តថា ក្រោយពីកម្លាំងសមត្ថកិច្ច បានធ្វើការស្រាវជ្រាវយ៉ាងល្អិតល្អន់ដឹងថា ឃាតករដែលសម្លាប់ប្អូនរបស់ខ្លួនបង្កើត មកសំងំលាក់ខ្លួននៅចំណុចភូមិគគរ២ ឃុំគគរ ស្រុកកំពង់សៀម ខេត្តកំពង់ចាម ទើបកម្លាំងតាមមកចាប់ខ្លួន និងនាំមកកាន់ស្នងការដ្ឋាននគរបាលខេត្តកំពង់ចាម មកសាកសួរបន្ថែម។
មូលហេតុដែលសម្លាប់ប្អូនបង្កើតរបស់ខ្លួនឯង ដោយសារតែរូបគេ វាយប្រដៅ ប៉ុន្តែជ្រុលដៃ ជាហេតុបណ្ដាលឲ្យស្លាប់តែម្ដង រួចក៏រត់គេចខ្លួនចេញពីស្រុកស្នួលខេត្តក្រចេះ ។
បច្ចុប្បន្ន កម្លាំងជំនាញ បានប្រគល់ជនសង្ស័យខាងលើ ប្រគល់ឱ្យម្ចាស់ករណី ស្នងការដ្ឋាននគរបាលខេត្តក្រចេះ ចាត់ការបន្តតាមនីតិវិធីច្បាប់ ។
សូមរម្លឹកថា កាលពីថ្ងៃទី២០ កញ្ញា ២០២០ នៅចំណុចបន្ទាយអាមេរិក ភូមិថ្គង ឃុំស្នួល ស្រុកស្នួល ខេត្តក្រចេះ មានករណីឃាតកម្មមួយ ដោយបងវាយសម្លាប់ប្អូន ហើយជនជាឃាតករគេខ្លួនបាត់ ។
ជនសង្ស័យឈ្មោះ ថេង សុធី ហៅថ្លាង ត្រូវជាបងបានយកដំបងវាយជនរងគ្រោះឈ្មោះ ថេង សុ ថុន ត្រូវជាប្អូនខ្លួនឯងបង្កើត បណ្តាលឲ្យស្លាប់ ព្រោះជនរងគ្រោះតែងតែរករឿងជាមួយម្តាយ បងប្អូន លួចរបស់ក្នុងផ្ទះលក់គ្មានសល់ វាយបំផ្លាញទ្រព្យសម្បត្តិក្នុងផ្ទះ ជាហេតុធ្វើអោយជនសង្ស័យជាបងបង្កើត ដាច់ចិត្តយកដំបងឈើ ប្រវែងប្រហែលកន្លះម៉ែត្រ វាយបណ្តាលសម្លាប់តែម្តង រួចគេចខ្លួន មកស្នាក់នៅផ្ទះម្តាយមីង ភូមិគគរ ឃុំគគរ ស្រុកកងមាស ខេត្តកំពង់ចាម ៕
ចែករំលែកព័តមាននេះ