ខេត្តបន្ទាយមានជ័យ ៖ ក្រោយចេញផ្សាយពីជីវិតកម្សត់វេទនារបស់យោធិនពិការម្នាក់ដែលយករទេះធ្វើជាទីជម្រក(ដេកក្នុងរទេះ) នៅភូមិនិងសង្កាត់, ក្រុងប៉ោយប៉ែត កាលពីពេលថ្មីៗលើគេហទំព័រ និងកាសែតកោះសន្តិភាពរួចមក នាព្រឹកថ្ងៃទី២ តុលា ឆ្នាំ២០២០…
ខេត្តបន្ទាយមានជ័យ ៖ ក្រោយចេញផ្សាយពីជីវិតកម្សត់វេទនារបស់យោធិនពិការម្នាក់ដែលយករទេះធ្វើជាទីជម្រក(ដេកក្នុងរទេះ) នៅភូមិនិងសង្កាត់, ក្រុងប៉ោយប៉ែត កាលពីពេលថ្មីៗលើគេហទំព័រ និងកាសែតកោះសន្តិភាពរួចមក នាព្រឹកថ្ងៃទី២ តុលា ឆ្នាំ២០២០ លោកគាត ហ៊ុល អភិបាលនៃគណៈអភិបាលក្រុងប៉ោយប៉ែតបានដឹកនាំក្រុមការងារសង្កាត់និងភូមិនាំយកអំណោយរួមមានអង្ក១ការ៉ុងស្មើនឹង៥០គីឡូក្រាម, មី១កេស និងថវិកា២០ម៉ឺនរៀល ផ្តល់ជូនគ្រួសារខាងលើដើម្បីដោះស្រាយទុក្ខលំបាកក្នុងសម័យកូវីដ។ គួររំលឹកថា ជីវិតយោធិនពិការម្នាក់យករទេះធ្វើទីជម្រក រស់យ៉ាងកម្សត់វេទនា (វីដេអូ)
ជាការគិតគូរយ៉ាងយកចិត្តទុកដាក់តាមសំណូមពរដែលអតីតយោធិនពិការខាងលើបានទទូចសុំជម្រក លោកអភិបាលក្រុងប៉ោយប៉ែតប្រាប់គ្រួសារនេះថា អាជ្ញាធរខេត្តពិសេសលោកឧបនាយករដ្ឋមន្ត្រីកែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀននិងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យនិងប្រគល់ដី១ឡូតិ៍និងផ្ទះ១ខ្នង ធ្វើអំពីឈើប្រក់ស័ង្កសីជូនគ្រួសារមួយកំសត់នេះ នាពេលឆាប់ៗខាងមុខ ហើយគ្រួសារនេះក៏បានសម្រេចចិត្តទទួលយកយ៉ាងត្រេកអរបំផុត ។
អតីតយោធិនពិការខាងលើឈ្មោះស៊ុន ពៅ អាយុ៤៨ឆ្នាំ ជាអតីតយោធាវរៈ១ចល័ត្រខេត្តបាត់ដំបងចូលបំរើជាតិនៅឆ្នាំ១៩៨៥ និងរងរបួស៣កន្លែង ដោយសារគ្រាប់កាំភ្លើងទ័ពព្រៃខ្មែរក្រហមឆ្នាំ១៩៩៤ ពេលឡើងសមរភូមិនៅភ្នំវែងខេត្តប៉ៃលិន ហើយក្លាយជាយោធាកាត់រំសាយប្រភេទ២នៅឆ្នាំ២០០១ ។
នៅព្រឹកថ្ងៃដដែលនេះដែរ ជនចាស់ជរានិងជនពិការ២គ្រួសាផ្សេងទៀតនៅក្នុងភូមិសង្កាត់ខាងលើក៍ទទួលបានអំណោយជាអង្ករ ក្នុង១គ្រួសារ១ការ៉ុងស្មើ៥០គីឡូក្រាមនិងថវិកាមួយចំនួនទៀតផងដែរ ។
លោកគាត ហ៊ុល អភិបាលក្រុងប៉ោយប៉ែតប្រាប់កោះសន្តិភាពតាមទូរស័ព្ទថា ចាប់តាំងពីថៃបិទព្រំដែនដោយសារទប់ស្កាត់មេរោគកូវីដ ថ្នាក់ដឹកនាំខេត្ត ពិសេសលោកឧបនាយករដ្ឋមន្ត្រីកែ គឹមយ៉ាន បានណែនាំឲ្យអាជ្ញាធរគ្រប់ស្រុកក្រុងក្នុងខេត្តយកចិត្តទុកដាក់ជួយដល់ពលរដ្ឋក្រីក្រ និងជួបបញ្ហាផ្សេងៗ។
ជាមួយគ្នានេះ លោកអភិបាលក្រុងបន្តថា មានពលរដ្ឋជាង៧០០០គ្រួសាក្នុងក្រុងប៉ោយប៉ែតបានទទួលអំណោយពីអាជ្ញាធរជាបន្តបន្ទាប់ ហើយពេលនេះរដ្ឋបាលក្រុងបាននិងកំពុងកៀងគររកជំនួយពីសប្បុរសជន ដើម្បីយកមកជួយប្រជាពលរដ្ឋដែលកំពុងជួបប្រទះការខ្វះខាតបន្ថែមទៀតក្នុងសម័យកូវី១៩នេះ៕ (កែសម្រួលដោយ ៖ ធីតា)
ចែករំលែកព័តមាននេះ