រាជធានីភ្នំពេញ ៖ កម្មករអូសរទេះនៅផ្សារដើមគម្នាក់ បានរអិលធ្លាក់ពីលើកាំជណ្តើរបោកក្បាលទៅក្រោយបណ្តាលឱ្យស្លាប់បាត់បង់ជីវិត ខណៈរើអីវ៉ាន់ចេញពីផ្ទះជួល ព្រោះតែគ្មានលុយបង់ថ្លៃផ្ទះ ។ គ្រោះអកុសលនេះ កើតឡើងកាលពីវេលាម៉ោងប្រមាណ៧និង៣០នាទីព្រឹកថ្ងៃទី១ ខែតុលា…
រាជធានីភ្នំពេញ ៖ កម្មករអូសរទេះនៅផ្សារដើមគម្នាក់ បានរអិលធ្លាក់ពីលើកាំជណ្តើរបោកក្បាលទៅក្រោយបណ្តាលឱ្យស្លាប់បាត់បង់ជីវិត ខណៈរើអីវ៉ាន់ចេញពីផ្ទះជួល ព្រោះតែគ្មានលុយបង់ថ្លៃផ្ទះ ។ គ្រោះអកុសលនេះ កើតឡើងកាលពីវេលាម៉ោងប្រមាណ៧និង៣០នាទីព្រឹកថ្ងៃទី១ ខែតុលា ឆ្នាំ២០២០ នៅចំណុចផ្ទះជួលលេខ
១២ ក្រុមទី៤៣ សង្កាត់បឹងសាឡាង ខណ្ឌទួលគោក និងបានស្លាប់បាត់បង់ជីវិតនៅវេលាម៉ោងប្រមាណ១២ថ្ងៃត្រង់ នៅលើដងផ្លូវមាត់ប្រឡាយពេលនាំគ្នាសែងបម្រុងបញ្ជូនទៅមន្ទីរពេទ្យ ។
ជនរងគ្រោះត្រូវបាននគរបាលឱ្យដឹងថា ឈ្មោះ សេង សាត អាយុ៤៣ឆ្នាំ ស្នាក់នៅបន្ទប់
B១២ ជាន់ទី១ កន្លែងកើតហេតុខាងលើ និងមានស្រុកកំណើតនៅភូមិព្រែកអំបិល ឃុំព្រែកអំបិល ស្រុកស្អាង ខេត្តកណ្តាល ។ តាមព័ត៌មានឱ្យដឹងថា មុនពេលកើតហេតុជនរងគ្រោះដោយសារអត់លុយបង់ថ្លៃផ្ទះ ក៏បានរើអីវ៉ាន់ចេញពីផ្ទះជួល ។ ខណៈនោះ ដោយសារតែផឹកស្រវឹងផង នៅពេលឡើងជណ្តើរបាន២ទៅ៣កាំ ជនរងគ្រោះក៏ផ្ងារក្រោយបណ្តាលឱ្យបោកក្បាលរងរបួសធ្ងន់ និងបានស្លាប់នៅលើដងផ្លូវមាត់ប្រឡាយ ខណៈរង់ចាំម៉ូតូកង់៣ដឹកបញ្ចូនទៅមន្ទីរពេទ្យ ។
ស្ត្រីឈ្មោះ មូម ហួយ ជាអ្នកមើលការខុសត្រូវផ្ទះជួល បានឱ្យដឹងថា ជនរងគ្រោះបានមកជួលផ្ទះស្នាក់នៅចំនួន៣ខែមកហើយ ដែលក្នុង១ខែ៥៥ដុល្លារ ។ នៅខែចុងក្រោយនេះ ដោយសារតែជនរងគ្រោះអត់មានប្រាក់ឱ្យថ្លៃជួលផ្ទះហើយលើសប្រមាណកន្លះខែមកហើយ ព្រមទាំងកន្លងមកមានជំងឺប្រចាំកាយចេះតែប្រកាច់និងផឹកស្រវឹងរាល់ថ្ងៃផងនោះ គាត់ក៏បានសុំឱ្យរើអីវ៉ាន់ចេញ ។ នៅព្រឹកថ្ងៃនោះ ជនរងគ្រោះក៏បានយល់ព្រមហើយបានរៀបចំរើអីវាន់ចេញដោយខ្លួនឯង ។
ស្ត្រីជាអ្នកមើលការខុសត្រូវឱ្យដឹងទៀតថានៅព្រឹកថ្ងៃនោះ សន្តិសុខក៏បានជួយជញ្ជូនអីវ៉ាន់ផងដែរ ។ ដោយសារតែគាត់ស្រវឹងនិងដើរចុះឡើងហត់នឿយ ក៏បានរអិលធ្លាក់ពីលើកាំជណ្តើរបោកក្បាលរងរបួស ។ ភ្លាមៗ គាត់និងអ្នកភូមិ ព្រមទាំងបងស្រីរបស់គាត់ក៏បាននាំគ្នាជួយសែងមកក្រៅ ដើម្បីរកម៉ូតូកង់៣ដឹកទៅមន្ទីរពេទ្យ លុះនៅវេលាម៉ោងប្រមាណ១២ថ្ងៃត្រង់ ក៏ស្លាប់ទើបរាយការណ៍ប្រាប់នគរបាលមូលដ្ឋាន ៕
ចែករំលែកព័តមាននេះ