រាជធានីភ្នំពេញ ៖ ជនជាតិចិនប្រុស-ស្រីមួយក្រុម បើករថយន្តមួយគ្រឿងជូនសាច់ញាតិទៅផ្ទះ ខណៈពេលធ្វើដំណើរមកដល់មុខផ្ទះ ក៏ចុះពីលើរថយន្ដទាំងអស់គ្នាទៅបើកទ្វារផ្ទះ និងឈរជជែកគ្នា ដោយមិនបានពន្លត់ម៉ាស៊ីនរថយន្ត រវល់តែនិយាយគ្នាភ្លេចខ្លួនមួយភ្លែត ក៏ត្រូវជនសង្ស័យ២នាក់ជិះម៉ូតូមួយគ្រឿងមកឈប់ក្បែរ ហើយជនសង្ស័យម្នាក់ក្នុងចំណោមបក្សជនសង្ស័យទាំងពីរនាក់នោះ បានឡើងបើករថយន្តលួចយកចេញទៅបាត់ស្រមោលភ្លាមៗ បង្កជាការភ្ញាក់ផ្អើលកាលពីវេលាម៉ោង១០យប់ ថ្ងៃទី០១ តុលា ស្ថិតនៅតាមបណ្ដោយផ្លូវបុរីភ្នំពេញថ្មី ចំណុចមុខផ្ទះលេខ51A សង្កាត់អូរបែកក្អម ខណ្ឌសែនសុខ ។
រថយន្តដែលជនសង្ស័យលួចយកទៅបាត់ម៉ាក Lexus RX330 ពណ៌ទឹកប្រាក់ នៅក្នុងរថយន្តមានឯកសារឡានcopy មួយកំប្លេរ និង លុយដុល្លារជាង2.000ដុល្លារ ។ យោងតាមប្រភពព័ត៌មានពីកន្លែងកើតហេតុ បានប្រាប់អោយដឹងថា ម្ចាស់រថយន្តរងគ្រោះជាជនជាតិចិន ហើយមុនកើតហេតុនោះ ពួកគាត់បានជូនសាច់ញាតិគាត់ត្រលប់មកផ្ទះនៅកន្លែងកើតហេតុ ដោយនៅក្នុងរថយន្តនោះពួកគាត់មិនចាំថាមានគ្នាប៉ុន្មាននាក់នោះទេ ។
ខណៈពេលធ្វើដំណើរមកដល់មុខផ្ទះ ពួកគាត់ក៏បានចុះពីរថយន្ដទៅបើកទ្វារផ្ទះទាំងអស់គ្នានិងឈរជជែកគ្នាលេងភ្លេចខ្លួនតែមួយភ្លែត ស្រាប់តែក្រឡេកភ្នែក ទៅមើលរថយន្តគាត់មិនឃើញ ក៏បង្កជាការភ្ញាក់ផ្អើលឆោឡោពេញកន្លែងកើតហេតុ ពេលឆែកកាមេរ៉ាសុវត្ថិភាពទើបឃើញសកម្មភាពជនសង្ស័យ2នាក់ ជិះម៉ូតូមួយគ្រឿងមកឈប់ក្បែររថយន្តគាត់ ហើយជនសង្ស័យម្នាក់ក្នុងចំណោមបក្សពួកពីរនាក់បានធ្វើសកម្មភាពបើកទ្វាររថយន្តឡើងបើករត់គេចខ្លួនភ្លាមៗបាត់ស្រមោលតែម្តង ។
ក្រោយកើតហេតុ ជនរងគ្រោះបានត្រឹមទៅដាក់ពាក្យនៅប៉ុស្តិ៍នគរបាលអូរបែកក្អមអោយសមត្ថកិច្ចជួយអន្តរាគមន៍ស្វែងរករថយន្តគាត់ត្រឡប់មកវិញ ៕
ចែករំលែកព័តមាននេះ