រាជធានីភ្នំពេញ ៖ កិច្ចប្រជុំគណៈកម្មការព្រំដែនកម្ពុជា-ថៃ (JBC) ដែលបានអាក់ខានជិត១ឆ្នាំកន្លងមក ហើយលើកចុងក្រោយត្រូវបានភាគីថៃប្រកាសពន្យារពេលដោយមិនកំណត់នោះ ត្រូវបានគេដឹងថា កិច្ចប្រជុំនេះនឹងកំណត់ធ្វើពីថ្ងៃ៨ ដល់ថ្ងៃទី១០ ខែកញ្ញា ខាងមុខ រវាងរដ្ឋមន្ត្រីការពារជាតិនៃប្រទេសទាំង២ ។ តាមកាសែតថៃផ្សាយថ្ងៃ២៧ សីហា ឱ្យដឹងថា រដ្ឋមន្ត្រីក្រសួងការពារជាតិថៃ លោកឧត្តមសេនីយ៍ប្រាវីត វង្សសុវណ្ណ បានបញ្ជាឱ្យសមត្ថកិច្ចពាក់ព័ន្ធរបស់ខ្លួនត្រៀមរៀបចំការប្រជុំគណៈកម្មការព្រំដែនកម្ពុជា-ថៃ (JBC) លើកទី៧ ក្នុងរវាងពីថ្ងៃទី៨ ដល់១០កញ្ញា ខាងមុខ ដោយថៃធ្វើជាម្ចាស់ផ្ទះរៀបចំកិច្ចប្រជុំនៅសណ្ឋាគាររ៉េណឺហ្សង់ ក្នុងទីក្រុងបាងកក ។ គួរបញ្ជាក់ថា មុននេះ ភាគីថៃបានពន្យារពេលកិច្ចប្រជុំដែលធ្លាប់កំណត់ធ្វើក្នុងរវាងថ្ងៃទី២៧-២៨ សីហា ដោយសារតែថៃមានបញ្ហាផ្ទៃក្នុង តែបានក្រឡាស់មកនិយាយថា ព្រោះសម្ព័ន្ធភាពរវាងប្រទេសទាំង២ កាលពីដើមខែកន្លងមកមិនសូវល្អប្រសើរ ដោយសារគណៈកម្មាធិការបេតិកភណ្ឌពិភពលោកបានឯកភាពទទួលយកផែនការសំរាប់ពិចារណាដល់ការអភិវឌ្ឍបរិវេណជុំវិញប្រាសាទព្រះវិហាររបស់ខ្មែរ ។
កាសែតថៃដដែលបន្តថា យោងតាមរបាយការណ៍របស់ក្រសួងការពារជាតិបានឱ្យដឹងថា កិច្ចសហប្រតិបត្តិការររវាងលោកឧត្តមសេនីយ៍ប្រាវីត វង្សសុវណ្ណ រដ្ឋមន្ត្រីក្រសួងការពារជាតិថៃ និងលោកនាយឧត្តមសេនីយ៍ទៀ បាញ់ រដ្ឋមន្ត្រីក្រសួងការពារជាតិកម្ពុជាតាមរយៈទូរស័ព្ធបានធ្វើឱ្យកិច្ចប្រជុំ JBC កើតឡើងក្នុងរយៈពេលដ៏ឆាប់រហ័សរវាងប្រទេសទាំង២ ។ នៅក្នុងរបាយការណ៍បានបញ្ជាក់ទៀតថា ក្របខណ្ឌនៃការចរចារបស់ JBC ដែលនឹងមាននៅក្នុងកិច្ចប្រជុំលើកនេះ បានឆ្លងកាត់ការយល់ស្របពីរដ្ឋសភា កាលពីឆ្នាំមុន ដោយមិនពាក់ព័ន្ធនឹងកិច្ចព្រមព្រៀងពីលទ្ធផលនៃកិច្ចប្រជុំលើកមុន ដែលសភាថៃមិនទាន់អនុម័តនោះទេ ។ កម្ពុជាបានប្រកាសរួចហើយថា ការចរចាថ្នាក់រដ្ឋមន្ត្រីក្រសួងការបរទេសអាចធ្វើទៅបាន ល្គឹកណាសភាថៃអនុម័តលើកំណត់ហេតុនៃកិច្ចប្រជុំទាំង៣លើករួចសិន ព្រោះថា បើគ្មានការអនុម័តទេការចរចាក៏គ្មានន័យអ្វីដែរ ។ អ្នកសង្កេតការណ៍កម្ពុជានិយាយថា ការពន្យារពេលរបស់សភាថៃក្នុងការពិភាក្សាអនុម័តនោះគឺមិនអាចទទួលយកបានទេ ហើយការចរចាណាមួយក៏ទៅមិនរួចដែរ ។
ទោះជាយ៉ាងណាក៏ដោយ ក្របខណ្ឌនៃកិច្ចប្រជុំ JBC លើកទី៧នេះនឹងសង្កត់ធ្ងន់លើកិច្ចសហប្រតិបត្តិការផ្នែកសន្តិសុខ និងយោធារវាងប្រទេសទាំង២ ដូចជាបញ្ហាថ្នាំញៀន ស្ថានការណ៍សន្តិសុខលើដែនសមុទ្រ កិច្ចសហប្រតិបត្តិការរបស់យោធាក្នុងតំបន់ និងការដោះមីនជាដើម ។ ជាមួយគ្នានេះ ក៏មានការជឿជាក់ថា ការពិភាក្សាក្នុងកិច្ចប្រជុំនឹងមានទិសដៅជាវិជ្ជមាន ព្រោះស្ថានការណ៍សម្ព័ន្ធភាពថ្នាក់ជាតិនៃប្រទេសទាំង២ មានទិសដៅល្អប្រសើរ ហើយមេដឹកនាំនៃប្រទេសទាំង២ ក៏មានគំរោងនឹងជួបគ្នានៅវេទិកាអន្តរជាតិនាពេលខាងមុខផងដែរ ។ មុននេះ១ថ្ងៃ កាសែតបាងកកប៉ុស្តិ៍ចេញផ្សាយថ្ងៃទី២៦ សីហា បានដកស្រង់សំដីលោកអាប់ភីស៊ីត វ៉េចាជីវ៉ា នាយករដ្ឋមន្ត្រីថៃ ដែលបានថ្លែងថា ការសុំលាលែងពីតំណែងរបស់លោកថាក់ស៊ីន ស៊ីណាវ៉ាត្រា ពីទីប្រឹក្សាផ្នែកសេដ្ឋកិច្ចរបស់កម្ពុជា បានត្រួសត្រាយផ្លូវសំរាប់ប្រទេសថៃ និងប្រទេសកម្ពុជាដោះស្រាយជំលោះ តែលោកអាប់ភីស៊ីត បានព្រលយពាក្យថា លោកថាក់ស៊ីន មិនទាន់ទៅណាឆ្ងាយនៅឡើយទេ ។ មន្ត្រីកម្ពុជាបានច្រានចោលចំពោះការដែលថា លោកថាក់ស៊ីន គឺជាដើមចមនៃជម្លោះគ្នានេះ តែបានអះអាងច្បាស់ថា មកពីខាងសៀមឈ្លានពានទឹកដីកម្ពុជាតែប៉ុណ្ណោះ ។
លោកអាប់ភីស៊ីត បន្តថា លោកថាក់ស៊ីន បានសុំបញ្ចប់តំណែងរបស់លោកជាមួយកម្ពុជាមិនមែនមានន័យថា លោកបញ្ចប់ការធ្វើសកម្មភាពនយោបាយនោះទេ ។ លោកអាប់ភីស៊ីត គូសបញ្ជាក់ថា ទោះបីជាបែបណា ឥឡូវនេះរដ្ឋាភិបាលរបស់លោកកំពុងព្យាយាមស្តារឡើងវិញនូវទំនាក់ទំនងរវាងប្រទេសថៃ និងប្រទេសកម្ពុជា ព្រមទាំងដោះស្រាយជំលោះនៅតំបន់ប្រាសាទព្រះវិហារ ។ ទាក់ទិនទៅនឹងបញ្ហាទំនាក់ទំនងរវាងថៃ និងកម្ពុជាផងដែរ លោកស៊ូថេប ធឿកស៊ូបាន់ ឧបនាយករដ្ឋមន្ត្រីថៃថ្លែងថា ក្រោយពីប្រទេសទាំងពីរថៃ-កម្ពុជាបានដាក់ឯកអគ្គរាជទូតប្រចាំប្រទេសទាំងពីរវិញ ទំនាក់ទំនងទ្វេភាគីរវាងប្រទេសទាំងពីរនឹងមានលក្ខណៈល្អប្រសើរជាងមុន ។ ចំណែកទាក់ទិនទៅនឹងការជួបពិភាក្សាទ្វេភាគីរវាងថ្នាក់ដឹកនាំប្រទេសទាំង២ លោកស៊ូថេប ថ្លែងថា ឥឡូវនេះវាស្ថិតលើមេដឹកនាំទាំង២រង់ចាំពេលវេលា និងកន្លែងសមស្រប ។ ឯកអគ្គរាជទូតកម្ពុជាប្រចាំប្រទេសថៃ លោកជំទាវយូ អយ បានអញ្ជើញទៅដល់ទីក្រុងបាងកក ដើម្បីបន្តការងាររបស់លោកជំទាវកាលពីថ្ងៃទី២៥ សីហា គឺមួយថ្ងៃ ក្រោយពីឯកអគ្គរាជទូតថៃប្រចាំប្រទេសកម្ពុជា លោក Prasat Prasavinitchai បានអញ្ជើញមកដល់រាជធានីភ្នំេពញដើម្បីបន្តការងាររបស់លោកទៀត ៕
ចែករំលែកព័តមាននេះ