រាជធានីភ្នំពេញ ៖ កម្មករអូសរទេះផ្សារដើមគម្នាក់បានរអិលធ្លាក់ពីលើកាំជណ្តើរបោកក្បាលទៅក្រោយបណ្តាលអោយស្លាប់បាត់បង់ជីវិត ខណៈពេលដែលរើអីវ៉ាន់ចេញពីផ្ទះជួល ដែលគ្រោះថ្នាក់នេះបានកើតឡើង កាលពីវេលាម៉ោងប្រមាណ៧និង៣០នាទីព្រឹក ថ្ងៃទី០១ ខែតុលា ឆ្នាំ២០២០ នៅចំណុចផ្ទះជួលលេខ១២…
រាជធានីភ្នំពេញ ៖ កម្មករអូសរទេះផ្សារដើមគម្នាក់បានរអិលធ្លាក់ពីលើកាំជណ្តើរបោកក្បាលទៅក្រោយបណ្តាលអោយស្លាប់បាត់បង់ជីវិត ខណៈពេលដែលរើអីវ៉ាន់ចេញពីផ្ទះជួល ដែលគ្រោះថ្នាក់នេះបានកើតឡើង កាលពីវេលាម៉ោងប្រមាណ៧និង៣០នាទីព្រឹក ថ្ងៃទី០១ ខែតុលា ឆ្នាំ២០២០ នៅចំណុចផ្ទះជួលលេខ១២ ក្រុមទី៤៣ សង្កាត់បឹងសាឡាង ខណ្ឌទួលគោក រាជធានីភ្នំពេញហើយបានស្លាប់បាត់បង់ជីវីតនៅវេលាម៉ោងប្រមាណ១២ថ្ងៃត្រង់ នៅលើដងផ្លូវមាត់ប្រឡាយពេលដែលនាំគ្នាសែង ប្រុងបញ្ជូនទៅកាន់មន្ទីរពេទ្យ ។
ជនរងគ្រោះដែលធ្លាក់ស្លាប់នោះត្រូវបាននគរបាលអោយដឹងថា ឈ្មោះ សេង សាត អាយុ៤៣ឆ្នាំ ជាកម្មករអូសរទេះនៅផ្សារដើមគ ស្នាក់នៅបន្ទប់B១២ ជាន់ទី១កន្លែងកើតហេតុ ខាងលើ និងមានស្រុកកំណើត ភូមិព្រែក អំបិល ឃុំ ព្រែកអំបិល ស្រុកស្អាង ខេត្តកណ្តាល ។
តាមព័ត៌មានអោយដឹងថា នៅមុនពេលកើតហេតុជនរងគ្រោះអត់លុយបង់ថ្លៃផ្ទះក៏បានរើអីវ៉ាន់ចេញពីផ្ទះជួល ខណៈពេលនោះក៏បានដើរកាំជណ្តើចុះឡើងដោយសារតែជនរងគ្រោះផឹកស្រវឹងទាំងព្រឹកនៅពេលឡើងជណ្តើរបានប្រមាណ២ទៅ៣កាំ ក៏បានដាច់ផ្ញារក្រោយបណ្តាលអោយបោកក្បាលរងរបួសធ្ងន់ហើយបានស្លាប់នៅលើដងផ្លូវមាត់ប្រឡាយ ខណៈពេលដែលរងចាំម៉ូតូកង់៣ដឹកបញ្ចូនទៅកាន់មន្ទីរពេទ្យ ។
តាមស្ត្រីឈ្មោះ មូម ហួយ ជាអ្នកបើកការខុសត្រូវផ្ទះជួលបានអោយដឹងថា ជនរងគ្រោះបានមកជួលផ្ទះស្នាក់នៅចំនួន៣ខែមកហើយ ក្នុង១ខែ ៥៥ដុល្លារ ។ នៅខែចុងក្រោយនេះដោយសារតែជនរងគ្រោះ អត់មានប្រាក់អោយហើយ លើសប្រមាណកន្លះខែមកហើយព្រមទាំងកន្លងមកគាត់មានជំងឺប្រចាំកាយ ចេះតែប្រកាច់ និងផឹកស្រវឹងរាល់ថ្ងៃ គាត់ក៏បានសុំអោយគាត់រើអីវ៉ាន់ចេញ ។ លុះនៅព្រឹកនោះជនរងគ្រោះក៏បានយល់ព្រម ហើយបានរៀបចំរើអីវាន់ចេញដោយខ្លួនឯង ។
ស្ត្រីជាអ្នកមើលការបានអោយដឹងទៀតថា នៅព្រឹកនោះ សន្តិសុខ ក៏បានជួយជញ្ជូនអីវ៉ាន់ផងដែរ ។ ដោយសារតែគាត់ស្រវឹង និងដើរចុះឡើងហត់នឿយក៏បានរអិលធ្លាក់ពីលើកាំជណ្តើរបោកក្បាល ។ ភ្លាមៗ គាត់ និងអ្នកភូមិ ព្រមទាំងបងស្រីរបស់គាត់ក៏បាននាំគ្នាជួយសែងមកក្រៅ ដើម្បីរកម៉ូតូកង់៣ដឹកទៅមន្ទីរពេទ្យ ដោយពុំមាននណាហ៊ានដឹកឡើយក្រោយមកនៅវេលាម៉ោងប្រមាណ១២ថ្ងៃត្រង់ ក៏ដាច់ខ្យល់ស្លាប់ទើបរាយការណ៍ប្រាប់នគរបាលមូលដ្ឋាន៕
ចែករំលែកព័តមាននេះ