រាជធានីភ្នំពេញ ៖ នៅក្នុងវិស័យកីឡាចំបាប់ គឺមានមនុស្សតិចណាស់មិនស្គាល់អតីតកីឡាការិនី ចូវ សុធារ៉ា ដោយសារតែនាងធ្លាប់ដណ្ដើមបានមេដាយមាសច្រើនជំនាន់ពីស៊ីហ្គេម ហើយត្រូវបានបណ្ដាញសារព័ត៌មានចុះផ្សាយភ្លូកទឹកភ្លូកដី ។ ក្នុងរយៈពេល៣ឆ្នាំចុងក្រោយនេះ…
រាជធានីភ្នំពេញ ៖ នៅក្នុងវិស័យកីឡាចំបាប់ គឺមានមនុស្សតិចណាស់មិនស្គាល់អតីតកីឡាការិនី ចូវ សុធារ៉ា ដោយសារតែនាងធ្លាប់ដណ្ដើមបានមេដាយមាសច្រើនជំនាន់ពីស៊ីហ្គេម ហើយត្រូវបានបណ្ដាញសារព័ត៌មានចុះផ្សាយភ្លូកទឹកភ្លូកដី ។ ក្នុងរយៈពេល៣ឆ្នាំចុងក្រោយនេះ នាងបានបាត់មុខពីវិស័យកីឡាសូន្យឈឹង ដោយការបាត់មុខនេះ គឺដោយសារតែនាងលែងត្រូវបានគេចាប់អារម្មណ៍ដូចមុន ព្រោះតែលែងមានការប្រកួត ពោលគឺមិនមែនផ្ដាច់ខ្លួនពីសហព័ន្ធនោះឡើយ ។ នៅក្នុងពេលនេះកោះសន្តិភាព នឹងនាំអារម្មណ៍លោកអ្នកមកស្វែងយល់ពីស្ថានភាពឯកជនរបស់នាង ក្រោយពេលលាឈប់ពីកីឡាចំបាប់ទាំងស្រុង។
ចូវ សុធារ៉ា បានថ្លែងប្រាប់កោះសន្តិភាពថា នាងបានលាឈប់ពីកីឡាចំបាប់ចំនួន៣ឆ្នាំហើយ ដោយសារតែនាងយល់ថាខ្លួនមានវ័យចាស់ហើយ និងមានបញ្ហាសុខភាពមិនដូចមុនស្របពេលដែលនាងក៏មានស្វាមីនោះផង ។ មកទល់ពេលនេះ នាងគឺជាម្ដាយក្មេងប្រុសវ័យជាង១០ខែ ដោយនាងស្ថិតនៅសរសៃខ្ចីនៅឡើយទេ ទើបអ្នកនាងមិនសួវទៅណាមកណា ។ អ្នកនាងថា ក្រោយឈប់ទទួលប្រកួត នាងនៅតែបម្រើការនៅក្នុងសហព័ន្ធចំបាប់ដដែលទេ ដោយធ្វើជាហិរញ្ញឹក ដែលជាអ្នកគ្រប់គ្រងចំណូលចំណាយ និងទូទាត់លុយកាក់ផ្សេងៗនៅក្នុងសហព័ន្ធ។
យ៉ាងណាមិញការងារថ្មីនេះ កំពុងក្លាយជាសម្ពាធរបស់នាង ដោយសារតែការងារគិតបញ្ជីមិនមែនជាការងារដែលត្រូវជំនាញរបស់ខ្លួន បើទោះជាខាងសហព័ន្ធបានបញ្ជូនឱ្យនាងទៅរៀនជំនាញរដ្ឋបាលដល់ប្រទេសហ្វីលីពីនរហូតដល់ជិតកន្លះខែក្ដី ។ អ្នកនាងថា អ្វីដែលស្មុគស្មាញសម្រាប់ការងារនេះ គឺការរៀបចំឯកសារចំណូលចំណាយ និងការងារគ្រប់គ្រងចំណូលចំណាយតែម្ដង ។ អ្នកនាងពេលខ្លះមានបំណងចង់បោះបង់ការងារនេះ និងចង់ដោះដូរតួនាទីនោះផង ប៉ុន្តែដោយសារតែខាងសហព័ន្ធនៅមិនទាន់មានធនធានមនុស្សគ្រប់គ្រាន់ទើបអ្នកនាងនៅបន្តជួយ។
ក្រៅពីទទួលខុសត្រូវលើការងារនេះ អ្នកនាងក៏ជាគ្រូបង្វឹកផ្នែកចំបាប់ប្រចាំសហព័ន្ធផងដែរ
ដោយក្នុងសហព័ន្ធគឺមានកីឡាករកីឡាការិនីជម្រើសជាតិឈុតធំ១៥នាក់ និងឈុតតូច១៥នាក់ ដែលសុទ្ធសឹងតែជាកូនសិស្សរបស់នាង។
ចូវ សុធារ៉ា បន្តថា ក្នុងរយៈពេលនេះ នាងនៅតែជាបុគ្គលិកសហព័ន្ធ និងនៅតែជាគ្រូបង្វឹកផ្នែកកីឡាប្រចាំនៅវិទ្យាល័យផ្សារដើមថ្កូវដដែល បើទោះជានាងនៅផ្ទះច្រើនជាង ដោយសារតែកូវីដ-១៩។ អ្នកនាងថា អ្នកនាងមិនអាចចូលប្រកួតណាមួយទៀតទេ ដោយសារតែមានកូនមើលខុសត្រូវ ហើយវ័យក៏៣៧ឆ្នាំក្នុងឆ្នាំនេះ ដែលកាន់តែចុះខ្សោយជាងមុន ។
ម្យ៉ាងមកពីស្វាមីរបស់អ្នកនាង ក៏មិនសូវចង់ផង ទើបអ្នកនាងលាឈប់មិនងាកក្រោយពីក្នុងវិស័យចំបាប់ ។ អ្នកនាងថា ពីមុនស្វាមីរបស់អ្នកនាង ក៏ជាកីឡាករផ្នែកចំបាប់ដែរ តែក្រោយមកក៏លាឈប់ដាច់តែម្ដង ហើយទៅធ្វើការជាអ្នកគ្រប់គ្រងសណ្ឋាគារ ទុកឱ្យអ្នកនាងត្រាំត្រែងនៅក្នុងអាជីពជាគ្រូបង្វឹក និងជាហិរញ្ញឹកនៅក្នុងពេលនេះ ដើម្បីបន្តតួនាទីជាមួយសហព័ន្ធ។ ក្រោយពេលកូវីតស្ងប់ស្ងាត់ អ្នកនាងថា ឈុតធំ និងឈុតតូច ចាប់ផ្ដើមប្រមូលផ្ដុំគ្នាហ្វឹកហាត់វិញហើយ ដោយនាងក៏រវល់នឹងការបង្ហាត់ផងដែរ តែខាងសហព័ន្ធមានការយោគយល់ចំពោះនាងច្រើន ដោយសារតែអ្នកនាងសរសៃខ្ចី ហើយមិនមានអ្នកណាមើលកូនតូច ។ អ្នកនាងនៅតែអះអាងថា បើទោះជាអ្នកនាងធូរស្រាលដៃជើងរឿងកូន តែក៏មិនអាចត្រឡប់ប្រកួតដូចមុនទៀតដែរ គឺសម្រេចចិត្តសុំឈប់ទាំងស្រុងតែម្ដង។
គួរបញ្ជាក់ថា ក្នុងការប្រកបអាជីពជាកីឡាការិនីចំបាប់ជាង១០ឆ្នាំមកនេះ ចូវ សុធារ៉ា ធ្លាប់ដណ្ដើមបានមេដាយមាសលើឆាកអន្ដរជាតិជាច្រើន ពិសេសគឺការប្រកួតស៊ីហ្គេមតែម្ដង ដែលនាងធ្លាប់ឈ្នះមេដាយមាស២ដង គឺស៊ីហ្គេមលើកទី២៥ នៅឡាវ កាលពីឆ្នាំ២០០៩ រួមទាំងស៊ីហ្គេម លើកទី២៧ នៅមីយ៉ាន់ កាលពីឆ្នាំ២០១៣ រួមទាំងមេដាយប្រាក់ និងមេដាយសំរឹទ្ធផងដែរ៕
ចែករំលែកព័តមាននេះ