រាជធានីភ្នំពេញ ៖ មកទល់ពេលនេះ មានការលើកឡើងជាច្រើនពីកង្វល់នៃការរាំងស្ទះ ដែលធ្វើឱ្យពហុកីឡដ្ឋានជាតិមរតកតេជោមិនអាចរួចរាល់តាមគម្រោង បន្ទាប់ពីក្នុងពេលនេះ ការសាង សង់ត្រូវបានពន្យារពេលខុសពីការប្រកាសថានឹងរួចរាល់ត្រឹមចុងឆ្នាំ២០២០ ដើម្បីទុកពេលតុបតែង និងធ្វើតេស្តសាកល្បងការប្រកួតមួយចំនួន…
រាជធានីភ្នំពេញ ៖ មកទល់ពេលនេះ មានការលើកឡើងជាច្រើនពីកង្វល់នៃការរាំងស្ទះ ដែលធ្វើឱ្យពហុកីឡដ្ឋានជាតិមរតកតេជោមិនអាចរួចរាល់តាមគម្រោង បន្ទាប់ពីក្នុងពេលនេះ ការសាង សង់ត្រូវបានពន្យារពេលខុសពីការប្រកាសថានឹងរួចរាល់ត្រឹមចុងឆ្នាំ២០២០ ដើម្បីទុកពេលតុបតែង និងធ្វើតេស្តសាកល្បងការប្រកួតមួយចំនួន មុនកម្ពុជាធ្វើជាម្ចាស់ផ្ទះស៊ីហ្គេមនៅឆ្នាំ២០២៣នោះ។
ទោះបីក្រុមហ៊ុនចិនដែលទទួលសាងសង់ពហុកីឡដ្ឋានមរតកតេជោ អះអាងថា ពហុកីឡដ្ឋាន ដ៏ធំជាងគេនៅស្រុកខ្មែរជាជំនួយរបស់ចិនសម្រាប់កម្ពុជារៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ នឹងត្រូវបញ្ចប់ចុងឆ្នាំ២០២០ក៏ពិតមែន តែពេលនេះ អ្វីៗត្រូវបានពន្យារ។
លោក វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) និងជាអគ្គលេខាធិការ នៃគណៈកម្មាធិការជាតិ រៀបចំស៊ីហ្គេមឆ្នាំ២០២៣(CAMSOC) បាន អះអាងថា អ្វីៗពិតជាមិនអាចនឹងចប់ទៅតាម ការគ្រោងទុកឡើយ ដោយសារតែមានបញ្ហារាំងស្ទះជាច្រើន ដូចជាសម្ភារមិនអាចដឹកជញ្ជូនមកបានក្នុងអំឡុងពេលកូវីដ-១៩ផ្ទុះខ្លាំង និងបញ្ហាកម្មកររត់ចោលការងារព្រោះការភ័យខ្លាច ហើយធ្វើឱ្យការដ្ឋានទាំងមូលមិនមានកម្មករគ្រប់គ្រាន់ជាដើម ។ បញ្ហាដែលធ្វើឱ្យរាំងស្ទះក្នុងការសាងសង់មួយទៀត គឺក្នុងអំឡុងពេលកន្លងមក កម្ពុជាក៏ទទួលរងឥទ្ធិពលព្យុះ និងភ្លៀងធ្លាក់ខ្លាំង ដែលបណ្ដាលឱ្យប៉ះពាល់ដល់ដំណើរការសាងសង់នៅក្នុងទីលានការដ្ឋានទាំងមូល។
លោកពន្យល់ថា ការអូសបន្លាយពេលនៃការសាងសង់នេះ គឺ ដោយសារតែវិបត្តិកូវីដ-១៩ តែម្ដង ដែលជំងឺឆ្លងមួយនេះ បង្កឲ្យមានផល ប៉ះពាល់ដល់ការធ្វើដំណើរឆ្លងកាត់ប្រទេសនៃ អ្នកជំនាញចិន ក៏ដូចជាការដឹកជញ្ជូនសម្ភារមួយ ចំនួនសម្រាប់ការសាងសង់ ហើយធ្វើឱ្យចរន្តទាំងមូលដំណើរការមិនបាន កុំថាឡើយតែបញ្ហាសាងសង់ពហុកីឡដ្ឋាននៅកម្ពុជា ។
លោកថា មកទល់ពេលនេះ ការងារសាងសង់សម្រេច ទើបតែបានជាង៨០ភាគរយនោះទេ ដោយនៅសល់ខាងផ្នែកបំពាក់គ្រឿងលំអ និងគ្រឿងតុប តែង ខាងក្រៅជាដើម ដែលការងារនេះ ក៏ត្រូវចំណាយពេលច្រើនដែរ ប្រសិនបើសម្ភារបញ្ជូនមកយឺតយ៉ាវ ព្រោះកូវីដ-១៩ ។ លោកថាការងារទាំងអស់នេះ នឹងសម្រេចឱ្យរួចរាល់នៅ ខែមីនា ឬ ខែមេសា ឆ្នាំ២០២១ ពោលគឺធ្វើយ៉ាងណាឲ្យចប់មុនស៊ីហ្គេម លើកទី៣១ នាប្រទេសវៀតណាម ឆ្នាំ២០២១ ដែលធ្វើនៅចុងឆ្នាំ តែភាពជាក់ស្ដែងក៏មានតែចាំមើល។
លោកអះអាងថា ភាគីចិននឹងពន្លឿនឱ្យបានរួចរាល់តាមជំហានទី២នេះ ហើយលោកក៏ជំរុញឱ្យរួចរាល់នៅអំឡុងពេលនោះដែរ ដើម្បីរៀបចំដេគ័រ និងថែមថយជាច្រើនទៀត ដែលការងារនោះក៏ចំណាយពេលមិនខ្លី។
គួរបញ្ជាក់ផងដែរថា ពហុកីឡដ្ឋានដ៏ធំមួយនេះកំពុងសាងសង់ដោយក្រុមហ៊ុនប្រទេសចិន China State Construction Engineering Corporation លើផ្ទៃដីជាង៩៤ហិកតា ក្នុង សង្កាត់ព្រែកតាសេក ខណ្ឌឫស្សីកែវ ក្រោមថវិកាជំនួយឥតសំណងរបស់ចិន១៦០លាន ដុល្លារ ។ ពហុកីឡដ្ឋានជាតិមរតកតេជោនេះបានបើកការដ្ឋានសាងសង់កាលពីខែមេសា ឆ្នាំ២០១៧ ។ ក្រោយបញ្ចប់ការសាងសង់កីឡដ្ឋាននេះនឹងអាចផ្ទុកអ្នកទស្សនាបានប្រមាណ៦ម៉ឺននាក់ និងធ្វើឡើងសម្រាប់កម្ពុជាធ្វើជាម្ចាស់ផ្ទះការប្រកួតកីឡាអាស៊ីអាគ្នេយ៍(ស៊ីហ្គេម) លើកទី៣២ ឆ្នាំ២០២៣៕
ចែករំលែកព័តមាននេះ