រាជធានីភ្នំពេញ ៖ ថ្មីៗនេះគណនីហ្វេសប៊ុកមួយឈ្មោះ អ្នកនាង មេបក្ស បានបង្ហោះផ្សព្វផ្សាយខ្លឹមសារ ក្នុងបណ្តាញទំនាក់ទំនងសង្គមថា «ឡានបាត់ម្ចាស់រកឃើញ តែយកវិញមិនបានហេតុអ្វី»?
នាយកដ្ឋាននគរបាលព្រហ្មទណ្ឌកំរិតស្រាល សូមជម្រាបជូនថា កាលពីថ្ងៃទី០៧ ខែកញ្ញា ឆ្នាំ២០២០ នាយកដ្ឋាននគរបាលព្រហ្មទណ្ឌ បានទទួលពាក្យបណ្ដឹងពីឈ្មោះ ទូច សុធារិទ្ធ អាយុ២៧ឆ្នាំ ស្នាក់នៅផ្ទះលេខ១១៩ ផ្លូវ១០៦ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ សុំប្ដឹងឈ្មោះ វួន ម៉េងលី ភេទប្រុស អាយុ២៩ឆ្នាំ ពីបទឆបោក (ឆបោករថយន្ដ) ។
បន្ទាប់ពីទទួលបានពាក្យបណ្ដឹង ការិយាល័យព្រហ្មទណ្ឌកម្រិតស្រាល នៃនាយកដ្ឋាននគរបាលព្រហ្មទណ្ឌ បានបើកការស្រាវជ្រាវ និងឈានដល់ការឃាត់ខ្លួនឈ្មោះ វួន ម៉េងលី នៅវេលាម៉ោង០៥និង១០នាទីល្ងាច ថ្ងៃទី១១ ខែកញ្ញា ឆ្នាំ២០២០ ដោយមានការសម្របសម្រួលពីលោក គុជ គីមឡុង ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ និងដកហូតបានវត្ថុតាង ជារថយន្ដរបស់ដើមបណ្ដឹងចំនួន០១គ្រឿងផងដែរ ។
ករណីខាងលើនេះ កម្លាំងជំនាញ នៃនាយកដ្ឋាននគរបាលព្រហ្មទណ្ឌ បានកសាងសំណុំរឿងបញ្ជូនជនសង្ស័យ និងវត្ថុតាង ទៅកាន់សាលាដំបូងរាជធានីភ្នំពេញ ។
ពាក់ព័ន្ធនឹងករណីនេះ ម្ចាស់រថយន្ដដែលជាដើមបណ្ដឹង បានទំនាក់ទំនងជាមួយមន្ត្រីជំនាញ ដើម្បីស្នើសុំរថយន្ដរបស់ខ្លួន ពីមន្ដ្រីនគរបាល ប៉ុន្ដែក្នុងនាមជាមន្ដ្រីនគរបាលយុត្តិធម៌ ពុំអាចអនុញ្ញាតប្រគល់រថយន្ដនោះ ជូនដើមបណ្ដឹងវិញភ្លាមៗបាននោះទេ ដោយត្រូវរង់ចាំការសម្រេចពីតុលាការជាមុនសិន ។
ក្នុងន័យនេះ នាយកដ្ឋាននគរបាលព្រហ្មទណ្ឌ សូមធ្វើការច្រានចោលទាំងស្រុង ចំពោះការលើកឡើងថា មូលហេតុដែលមិនប្រគល់រថយន្ដជូនជនរងគ្រោះវិញ ដោយសារឲ្យលុយមិនដល់ និងចាត់ទុកថា ការចោទប្រកាន់នេះ បានប៉ះពាល់យ៉ាងធ្ងន់ធ្ងរដល់កិត្តិយសមន្ដ្រីនគរបាលយុត្តិធម៌ ដែលមានភារកិច្ចអនុវត្តច្បាប់ ។
អាស្រ័យដូចបានជម្រាបជូនខាងលើ សូមសាធារណជន និងជាពិសេសម្ចាស់គណនីហ្វេសប៊ុកខាងលើ មេត្ដាជ្រាប និងសូមចៀសវាងធ្វើការសន្និដ្ឋានលើរឿងហេតុខាងលើ ដោយពុំយល់អំពីទិដ្ឋភាពច្បាប់ ៕
ចែករំលែកព័តមាននេះ