ខេត្តកំពង់ឆ្នាំង ៖ បុគ្គលិកក្រុមហ៊ុនអចលនទ្រព្យ LOD ចំនួន៤នាក់ ត្រូវបានសមត្ថកិច្ចកងរាជអាវុធហត្ថខេត្ត កសាងសំណុំរឿងបញ្ជូនទៅសាលាដំបូងខេត្តកំពង់ឆ្នាំង នៅរសៀលថ្ងៃទី៣០ កញ្ញា ឆ្នាំ២០២០…
ខេត្តកំពង់ឆ្នាំង ៖ បុគ្គលិកក្រុមហ៊ុនអចលនទ្រព្យ LOD ចំនួន៤នាក់ ត្រូវបានសមត្ថកិច្ចកងរាជអាវុធហត្ថខេត្ត កសាងសំណុំរឿងបញ្ជូនទៅសាលាដំបូងខេត្តកំពង់ឆ្នាំង នៅរសៀលថ្ងៃទី៣០ កញ្ញា ឆ្នាំ២០២០ ដោយបានចោទប្រកាន់ពីបទ«បំផ្លិចបំផ្លាញទ្រព្យសម្បត្តិអ្នកដទៃដោយចេតនា» ដែលបានប្រព្រឹត្តឡើងកាលពីរសៀលថ្ងៃទី២៩ កញ្ញា នៅភូមិកំពងបាស្រូវខាងត្បូង ឃុំជលសា ស្រុកជលគីរី ។
លោកវរសេនីយ៍ទោ ហង្ស សុជាតិ មេបញ្ជាការរងកងរាជអាវុធហត្ថខេត្តកំពង់ឆ្នាំង បានបញ្ជាក់ពីដំណើររឿងនៃការឃាត់ខ្លួនបុគ្គលិកក្រុមហ៊ុនអចលនទ្រព្យនេះថា នៅថ្ងៃកើតហេតុ គឺវេលាម៉ោង៣និង៣០នាទីរសៀល បុគ្គលិករបស់ក្រុមហ៊ុនអចលនទ្រព្យ LOD បានទៅទារបំណុលពីកូនបំណុលឈ្មោះលាង គឹមឈៀង អាយុ២០ឆ្នាំ មានទីលំនៅភូមិកំពង់បាស្រូវ ឃុំជលសា ស្រុកជលគីរី ។ ប៉ុន្តែការទារប្រាក់នោះ មិនបានសម្រេច ព្រោះកូនបំណុលគ្មានប្រាក់សងទាន់ពេល។ ពេលនោះ បុគ្គលិករបស់ក្រុមហ៊ុនខាងលើ បានរឹបអូសយកម៉ូតូមួយគ្រឿងពីកូនបំណុល ដោយបង្ខំ និង ពុំមានការឯកភាព ពីភាគីកូនបំណុល ឬមានការចូលរួមរបស់តំណាងស្ថាប័នតុលាការនោះឡើយ ។
លោកមេបញ្ជារការរងកងរាជអាវុធហត្ថបានបញ្ជាក់ទៀតថា៖ កូនបំណុលឈ្មោះ លាង គឹមឈៀង បានទិញម៉ូតូបង់រំលោះពីក្រុមហ៊ុនអចលនទ្រព្យ LOD ចំនួន១គ្រឿង ហើយបានបង់ប្រចាំខែបាន៣ខែ។ ប៉ុន្តែក្រោយមក ដោយសារការបង់ប្រាក់មិនទៀងទាត់ ទើបនៅថ្ងៃកើតហេតុ បុគ្គលិករបស់ក្រុមហ៊ុន LOD បានសម្រេចរឹបអូសយកម៉ូតូនោះត្រឡប់មកវិញ ដោយបានប្រើមធ្យោបាយកាត់ច្រវ៉ាក់ និងឆ្កិះសោម៉ូតូ (ដូចមានក្នុងរូបភាពវីដេអូ) យកម៉ូតូដោយបង្ខំ គ្មានការយល់ព្រមពីកូនបំណុល និង ការចូលរួមពីស្ថាប័ន្នតុលាការឡើយ ដែលជាអំពើខុសទៅនឹងច្បាប់ ។ ក្រោយពីយកម៉ូតូបានពីកូនបំណុលហើយ បុគ្គលិករបស់ក្រុមហ៊ុនអចលនទ្រព្យ LOD បានយកម៉ូតូនោះទៅផ្ញើនៅផ្ទះលោកមេភូមិ ។
លោកហង្ស សុជាតិ បានបន្ថែមថា៖ ដោយសារតែបែបយ៉ាងនេះហើយ ទើប កូនបំណុលកើតទុក្ខមិនសុខចិត្តដាក់ពាក្យប្ដឹងទៅកាន់តុលាការ ហើយត្រូវបាន លោក អ៊ិត សុធា ព្រះរាជអាជ្ញា អមសាលាដំបូងខេត្តកំពង់ឆ្នាំងបញ្ជាឲ្យឃាត់ខ្លួនបុគ្គលិករបស់ក្រុមហ៊ុនអចលនទ្រព្យទាំង ៤ នាក់ ក្នុងនោះមាន១-ហេង គង្គា អាយុ២៨ឆ្នាំ ជាប្រធានក្រុមហ៊ុនអចលនទ្រព្យ LOD សាខាខេត្តកំពង់ឆ្នាំង រស់ភូមិស្រែព្រីង សង្កាត់កំពង់ឆ្នាំង ២-ឈ្មោះ អៀន វណ្ណា អាយុ ២៧ ឆ្នាំ រស់នៅភូមិននៀមទទឹង ឃុំទឹកហូត ស្រុករលាប្អៀរ ៣-ឈ្មោះ ញ៉េស សារីន អាយុ ២១ ឆ្នាំរស់នៅភូមិពារាំង ឃុំចោងម៉ោង ស្រុកទឹកផុស និង៤-ឈ្មោះ វ៉ែន សារិត អាយុ ២៧ ឆ្នាំ រស់នៅភូមិជ្រៃបាក់ ឃុំជ្រៃបាក់ ស្រុករលាប្អៀរ ។
ចំពោះវត្ថុតាង ដែលត្រូវបញ្ជូនទៅតុលាការរួមមាន រថយន្ដ ០១ គ្រឿង ,ម៉ូតូ០២ គ្រឿង ,ទូរសព្ទ័ដៃ០៦គ្រឿង ,ច្រវ៉ាក់ ០២ ខ្សែ, ពូថៅ០១ ,កូនសោរ០២ និង ដែកទីប១ដើម ។
ចែករំលែកព័តមាននេះ