ខេត្តបាត់ដំបង៖ « ទឹកធ្លាក់ភ្នំ៥៣ » គឺជាឈ្មោះរមណីយដ្ឋានថ្មីមួយ តែវាជាទឹកជ្រោះធម្មជាតិ ដែលគ្មាននរណាម្នាក់បានដឹងអំពីប្រវត្តិជាក់លាក់នៃកំណើតទឹកជ្រោះនេះឡើយ។ ទឹកជ្រោះនេះ បានហូរគគ្រាំបែកផ្កាត្រែង ធ្លាក់ពីលើកំពូលភ្នំលាន់រំពងព្រៃ ចុះទៅផ្នែកខាងក្រោម មានកំពស់ប្រហែលជាង២០០ម៉ែត្រដែលអាជ្ញាធរ និងមន្ទីរទេសចរាចរណ៍ខេត្ត បានឯកភាពឲ្យមានការវិនិយោគ កែលំអឲ្យក្លាយទៅជាតំបន់ទេសចរណ៍យ៉ាងល្អឥតខ្ចោះ ហើយម្ចាស់ទីតាំង ទើបចាប់ផ្ដើមបើកទ្វារស្វាគមន៍ភ្ញៀវជាតិ និងអន្តរជាតិ ប្រមាណជិតកន្លះឆ្នាំកន្លងទៅនេះប៉ុណ្ណោះ។
រមណីយដ្ឋាន «ទឹកធ្លាក់ភ្នំ៥៣» ស្ថិតនៅលើកំពូលភ្នំ៥៣ ក្នុងតំបន់ជួរភ្នំព្រឹក នៅភូមិភ្នំព្រឹក ឃុំភ្នំព្រឹក ស្រុកភ្នំព្រឹក ។ ភ្ញៀវទេសចរប្រាកដជាបានសប្បាយរីករាយ មានអា
រម្មណ៍ល្អ បរិសុទ្ធ ជាមួយនឹងចំការដំណាំសុទ្ធសាស្ត្រ អមនៅសងខាងផ្លូវយ៉ាងខៀវស្រង៉ាត់ នៅពេលធ្វើដំណើរទៅកាន់រមណីយដ្ឋានធម្មជាតិមួយនេះ។ យើងនឹងបានគយគន់នូវទិដ្ឋភាពស្រស់បំព្រងនៅលើកំពូលភ្នំនេះ ហើយថែមទាំងបានឃើញទិដ្ឋភាពនានា ឆ្ងាយដាច់កន្ទុយភ្នែករហូតដល់ទឹកដីនៃប្រទេសថៃទៀតផង ពេលយើងបានទៅដល់លើទីតាំងនៃជួរភ្នំ៥៣នោះ។
ម្ចាស់រមណីយដ្ឋាន«ទឹកធ្លាក់ភ្នំ៥៣» លោកម៉ី តឹង បានប្រាប់កោះសន្តិភាពថា គេមិនបានដឹងពីប្រវត្តិនៃទឹកជ្រោះនេះទេ តែវាជាទឹកជ្រោះធម្មជាតិ ដែលផុសឡើងពីក្នុងថ្មភ្នំ រួចហូរធ្លាក់ទៅខាងក្រោម ដែលមានកំពស់ប្រហែលជាង២០០ម៉ែត្រ ។ លោកបានប្រាប់ថា កាលដើមឡើយ ទីនោះគ្របដណ្ដប់ទៅដោយព្រៃភ្នំក្រំថ្មយ៉ាងក្រាស់ និងស្ងាត់ជ្រងំ និង ជាតំបន់ដែលគ្រប់គ្រងដោយខ្មែរក្រហម នៅសម័យសង្ក្រាម។ ប៉ុន្តែក្រោយធ្វើសមាហរ័ណកម្ម លោកបានចូលទៅកាន់ទីនោះ កាប់ឆ្ការព្រៃធ្វើចំការ ដាំដំណាំរហូតមកដល់ពេលនេះ តែកាលនោះលោកមិនបានចាប់អារម្មណ៍ទៅលើទឹកធ្លាក់ទេ។
បុរសវ័យ៥៦ឆ្នាំរូបនេះ បានបញ្ជាក់ថា ដោយសារតែទិដ្ឋភាព នៃទឹកធ្លាក់ពីលើភ្នំនេះ មានសក្ដានុពលទាក់ទាញផ្នែកទេសចរណ៍ខ្លាំង លោកក៏បានផ្ដើមគំនិត រៀបចំទីតាំងនេះឲ្យមានលក្ខណៈល្អប្រសើរម្ដងបន្តិចៗ ដើម្បីបើកឲ្យភ្ញៀវចូលទៅលេង និង ផ្ដិតយករូបភាពជាមួយនឹងទិដ្ឋភាពទឹកធ្លាក់នេះ។ លោកថា ទឹកធ្លាក់នេះ ហាក់ចាប់ផ្ដើមល្បីខ្លាំង នៅពេលមានភ្ញៀវថតយកទៅបង្ហោះលេងកំសាន្តតាមបណ្ដាញសង្គមនានា ធ្វើឲ្យល្បីតៗគ្នារហូតមក ទើបលោកចាប់ផ្ដើរកដៃគួវិនិយោគតំបន់នេះ។ ដោយមានការឯកភាពពីអាជ្ញាធរ និងការជួយជ្រោមជ្រែងពីមន្ទីរទេសចរណ៍ខេត្តផង ទើបលោកសម្រេចពង្រីកទីតាំង«ទឹកធ្លាក់ភ្នំ៥៣»នេះ ជាផ្លូវការ ដើម្បីស្វាគមន៏ភ្ញៀវ។ បើគិតមកដល់ពេលនេះ រមណីយដ្ឋាន«ទឹកធ្លាក់ភ្នំ៥៣» ចាប់ដំណើរការជាផ្លូវការបានរយៈពេលជិតកន្លះឆ្នាំហើយ។ ប៉ុន្តែភ្ញៀវបានចូលទៅកាន់រមណីយដ្ឋាននេះច្រើនបំផុត នៅថ្ងៃបុណ្យប្រពៃណីជាតិធំៗ និងបន្ទាប់បន្សំនៅថ្ងៃចុងសប្ដាហ៍។
ក្នុងចម្ងាយផ្លូវតូចមួយ ដែលអមទៅដោយដំណាំខៀវស្រងាត់ កាត់តាមជ្រលងបុព្វត្តា ប្រមាណ២,៧០០ម៉ែត្រ ដោយគិតចាប់ពីផ្លូវជាតិលេខ៥៩ (ផ្លូវក្រវ៉ាត់ព្រំដែន ចំណុចលើភ្នំព្រឹក) គេនឹងទៅដល់រមណីយដ្ឋាន«ទឹកធ្លាក់ភ្នំ៥៣» និងមានចម្ងាយប្រមាណ១,០០០ម៉ប៉ុណ្ណោះ ពីព្រំដែនខ្មែរ.ថៃ។ រមណីយដ្ឋាន«ទឹកធ្លាក់ភ្នំ៥៣» ត្រូវបានគេមើលឃើញយ៉ាងជាក់ច្បាស់នឹងភ្នែកនៅត្រង់ប្រភព នៃចំណុចទឹកផុស។ ទឹកនោះមានស្ថានភាពថ្លាយង់ដែលផុសឡើងលើ យ៉ាងសន្សឹមៗចេញពីក្នុងថ្មភ្នំ ស្ទើរមើលមិនដឹង។ វាជាទឹកជ្រោះធម្មជាតិដ៏បរិសុទ្ធ រួចហូរតាមជ្រលងតូចមួយធ្លាក់ទៅកាន់ផ្នែកខាងក្រោម ដែលមើលទៅយ៉ាងសន្លិមលាយឡំនឹងសន្ធឹកទឹកធ្លាក់យ៉ាងគគ្រាំរណ្ដំព្រៃព្រឹក្សា។
បើតាមលោក ម៉ី តឹង ដង្ខៅរមណីយដ្ឋានធម្មជាតិដ៏ស្រស់បំព្រងនេះ បានពិព័រនាអំពីរឿងរ៉ាវខ្លះៗដែលលោកបានជួបប្រទះកន្លងមកថា « ខ្ញុំធ្លាប់បានប្រទះឃើញ វត្ថុបុរាណមួយចំនួនផងដែរ នៅពេលខ្ញុំជីកកកាយដីនៅទីនោះ ដើម្បីសាងសង់តូបលក់ដូរ។ វត្ថុបុរាណទាំងនោះ មានដូចជា កងដៃ និង ថ្មសំលៀង រួមទាំងវត្ថុនានា មួយចំនួនទៀត ដែលមើលទៅស្រដៀងទៅនឹងថ្ម ឬ ភ្លុកដំរី។ បើយោងលើវត្ថុទាំងនេះ ខ្ញុំយល់ថា នៅទីនេះអាចជាទីតាំងប្រវត្តិសាស្ត្រ ដែលមានមនុស្សបុរាណធ្លាប់រស់នៅរាប់ពាន់ឆ្នាំមកហើយ ទើបមានសំណល់បុរាណកប់នៅក្នុងដីលើតំបន់ភ្នំបែបនេះ»។
ពាក់ព័ន្ធនឹងការអភិវឌ្ឍន៍តំបន់ទេសចេណ៍«ទឹកធ្លាក់ភ្នំ៥៣» ខាងលើនេះ ប្រធានមន្ទីរទេសចរណ៍ខេត្ត លោក អ៊ុចអ៊ុំ ភីនីស្សារ៉ា បានថ្លែងថា តាមពិតទឹកធ្លាក់ភ្នំ៥៣នេះ មានយូរហើយ តែអ្នកគ្រប់គ្រងតំបន់នេះ ទើបរៀបចំឲ្យមានភ្ញៀវចូលមកកំសាន្ត។ លោកនិយាយថា ដោយសារតែទឹកធ្លាក់នេះមានអំណោយផល ក្នុងការទាក់ទាញភ្ញៀវទេសចរយ៉ាងខ្លាំងក្លា យើងមិនគួរទុកចោលទេ ដូច្នេះហើយទើបខាងមន្ទីរជំនាញ ក៏ដូចជាអាជ្ញាធរខេត្ត ជាពិសេសក្រសួងទេសចរណ៍បានជម្រុញឲ្យម្ចាស់ដែនដី មានការរៀចចំធ្វើសួនច្បារ ធ្វើផ្លូវចូល និងរៀបចំឲ្យមានចំណតយានយន្ត ដើម្បីស្វាគមន៍ភ្ញៀវ។
បើនិយាយអំពីសក្ដានុពល នៃតំបន់ទេសចរណ៍ធម្មជាតិ ដែលមានលក្ខណៈជាប្រវត្តិសាស្ត្រមួយនេះ លោក អ៊ុចអ៊ុំ ភីនីស្សារ៉ា បានបង្ហាញយ៉ាងដូច្នេះថា « រមណីយដ្ឋាន ទឹកធ្លាក់ភ្នំ៥៣នេះ មានសក្ដានុពលទាក់ទាញភ្ញៀវទេសចរណ៏ខ្លាំងបំផុត។ បើយើងនិយាយពីការចាប់ផ្ដើម នៃផ្លូវចូលទៅកាន់រមណីយដ្ឋាននេះ ដំបូងយើងនឹងបានឃើញតំបន់រុករករ៉ែមាស ដែលពលរដ្ឋ និង ក្រុមហ៊ុនកំពុងធ្វើអាជីវកម្មសព្វថ្ងៃ ទិដ្ឋភាពដ៏ស្រស់បំព្រង នៃជួរភ្នំព្រឹក ដំណាំកសិកម្មនៅអមសាងខាងផ្លូវ ទាំងនៅលើភ្នំ ទាំងនៅតាមដងផ្លូវចូលទៅកាន់រមណីយដ្ឋាន ដែលមានលក្ខណៈជាជ្រលងភ្នំ»។
លោក ភីនីស្សារ៉ា បានបញ្ជាក់ថា ទិដ្ឋភាពទាំងនេះ ភ្ញៀវអាចធ្វើដំណើរទៅទស្សនា និង ថតរូបកំសាន្តយ៉ាងត្រជាក់ភ្នែក ឬ អាចស្វែងយល់ពីការរុករករ៉ែមាសនៅទីនោះផងដែរ។ លោកក៏បានបញ្ជាក់ដែរថា ពិតមែនតែរមណីយដ្ឋាន«ទឹកធ្លាក់ភ្នំ៥៣» នេះ ទើបនឹងចាប់ផ្ដើមធ្វើការអភិវឌ្ឍន៍បានជិតកន្លះឆ្នាំកន្លងទៅនេះ តែម្ចាស់រមណីយដ្ឋាននេះ ជាមួយនិងដៃគួរ ហាក់បានប្រឹងប្រែងធ្វើឲ្យមានការរីកចំរើនយ៉ាងខ្លាំង និង មានទិដ្ឋភាពស្រស់ស្ងាត់បំផុត។ ដូច្នេះ លោករំពឹងថា នៅថ្ងៃអនាគតរមណីយដ្ឋាន«ទឹកធ្លាក់ភ្នំ៥៣» នេះនឹងទទូលបាននូវការចាប់អារម្មណ៍យ៉ាងច្រើនកុះករ ពីសំណាក់ភ្លៀវទេសចរជាតិនិងអន្តរជាតិ ឲ្យធ្វើដំណើរទៅទស្សនាកំសាន្ត៕
ចែករំលែកព័តមាននេះ