សក្តានុពល គឺជាចំណុចមួយដែលអ្នកសម្ភាស៍នការងារជាច្រើនព្យាយាមរកពេលដែលកំពុងជ្រើសរើសបុគ្គលិកថ្មី ។ មានពេលខ្លះទៀត សក្តានុពលរបស់មនុស្សម្នាក់មានតម្លៃជាងបទពិសោធន៍ដែលពួកគេមានទៅទៀត ។ សក្តានុពលគឺជាសមត្ថភាពក្នុងការក្លាយខ្លួន ឬអភិវឌ្ឍន៍ខ្លួនទៅជាអ្វីមួយនៅថ្ងៃអនាគត ។
ពួកគេគឺជាមនុស្សដែលមិនចូលចិត្តនៅនឹងមួយកន្លែងទេ និងចូលចិត្តព្យាយាមរកឱកាសដើម្បីអភិវឌ្ឍន៍ខ្លួនទៅមុខជានិច្ច ។ ប៉ុន្តែទោះជាអ្នកមានសក្តានុពលពិតមែនក្តី ប្រសិនបើអ្នកបរាជ័យក្នុងការបង្ហាញនូវចំណុចនេះដល់អ្នកសម្ភាសន៍ នោះអ្នកប្រហែលជាមិនមានឱកាសជោគជ័យខ្ពស់ទេ ។ ខាងក្រោមគឺជាគន្លឹះមួយចំនួនដែលជួយឲ្យអ្នកបង្ហាញទៅអ្នកសម្ភាសន៍ថាអ្នកមានសក្តានុពល ៖
១. រកមើលចំណុចស្រដៀងគ្នារវាងគោលដៅអ្នក និងការងារដែលអ្នកកំពុងចង់បាន
តើអ្នកគិតថាអ្នកកើតមកលើលោកនេះដើម្បីអ្វី? ក្រុមហ៊ុនជាច្រើនក្នុងសម័យថ្មីនេះចូលចិត្តមនុស្សដែលដឹងថាពួកគេចង់សម្រេចបានអ្វីខ្លះក្នុងជីវិត ឬមានជាគោលដៅខ្លះៗក្នុងអាជីពរបស់ពួកគេ ។ ពួកគេនឹងចង់ដឹងពីទិសដៅរបស់អ្នក និងយល់ដឹងបន្ថែមពីមូលហេតុដែលអ្នកគិតថាការងារថ្មីនឹងជួយដល់អ្នកក្នុងការឆ្ពោះទៅរកទិសដៅនោះ ។
២. និទានរឿង
ការនិយាយរឿង គឺជាវិធីដ៏មានប្រសិទ្ធភាពមួយក្នុងការផ្ទេរព័ត៌មាន ។ វាជួយធ្វើឲ្យមនុស្សចាប់អារម្មណ៍នឹងព័ត៌មាននោះ និងមានអារម្មណ៍កាន់តែជិតស្និទ្ធជាមួយនឹងអ្នកនិទាន ។ អ្នកគួរតែព្យាយាមនិទានជារឿងដែលទាក់ទិននឹងបទពិសោធន៍ក្នុងការងាររបស់អ្នកដូចជាពេលដែលអ្នកអាចដោះស្រាយបញ្ហាអ្វីមួយដោយមានភាពច្នៃប្រឌិត ឬពេលដែលអ្នកត្រូវធ្វើការសម្រេចចិត្តដ៏ពិបាកជាដើម ។អ្នកអាចចាប់ផ្តើមពីស្ថានការ កិច្ចការដែលអ្នកបានធ្វើ លទ្ធផល និងមេរៀនដែលអ្នកបានរៀនសូត្រ ។
៣. ការហ្វឹកហាត់
អ្នកត្រូវចងចាំថា បេក្ខជនមានតួនាទីក្នុងការធ្វើឲ្យការសម្ភាសន៍ក្លាយជាបទពិសោធន៍ដ៏វិជ្ជមានមួយ ។ អ្នកអាចគ្រប់គ្រងអារម្មណ៍របស់អ្នកដទៃពេលដែលនិយាយជាមួយអ្នកបាន ។ ដូច្នេះអ្នកគួរតែព្យាយាមហ្វឹកហាត់និយាយពីខ្លួនអ្នកជាមួយមិត្តភក្តិនិងសុំមតិយោបល់ពីពួកគេផងដែរ ។
មានពេលខ្លះ កាយវិការរបស់អ្នកក៏អាចជះឥទ្ធិពលលើការសម្រេចចិត្តរបស់អ្នកសម្ភាសន៍ដែរដូច្នេះអ្នកត្រូវមានការប្រុងប្រយ័ត្ន និងលុបបំបាត់នូវទម្លាប់មិនល្អៗផ្សេងៗ ៕
ចែករំលែកព័តមាននេះ