រាជធានីភ្នំពេញ ៖ និស្សិតម្នាក់បានបាត់បង់ជីវិតក្នុងហេតុការណ៍គ្រោះថ្នាក់ចរាចរណ៍រវាងរថយន្តដឹកទំនិញមួយគ្រឿងកៀរ និងបុកម៉ូតូមួយគ្រឿង ខណៈជនរងគ្រោះរូបនោះកំពុងជិះម៉ូតូធ្វើដំណើរស្របទិសគ្នា ។
ហេតុការណ៍គ្រោះថ្នាក់ចរាចរណ៍ខាងលើនេះ បង្កអោយមានការភ្ញាក់ផ្អើលកើតឡើងកាលពីវេលាម៉ោង១១និង៣០នាទីថ្ងៃត្រង់ថ្ងៃទី៣០ ខែកញ្ញា ឆ្នាំ២០២០ ស្ថិតតាមបណ្តោយផ្លូវលេខ៣៧១ ក្បែរខ្លោងទ្វារច្រកចូលបុរីមួយកន្លែង ស្ថិតក្នុងភូមិក្បាលទំនប់ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ ។
ជនរងគ្រោះឈ្មោះ ចាន់ វឌ្ឍនះ ភេទប្រុស អាយុ២០ឆ្នាំ ជានិស្សិត មានទីលំនៅ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ជាអ្នកបើកបរម៉ូតូមួយគ្រឿងម៉ាកហុងដាឃ្លីក ពណ៌ស ពាក់ស្លាកលេខ ភ្នំពេញ 1HP-1535 ។ ចំណែករថយន្តដឹកទំនិញធុនធំមួយគ្រឿងខាងលើ ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3D-8785 បើកបរដោយបុរសម្នាក់មិនស្គាល់អត្តសញ្ញាណ ។
យោងតាមប្រភពព័ត៌មាននៅកន្លែងកើតហេតុអោយដឹងថា មុនពេលកើតហេតុ គេឃើញជនរងគ្រោះជិះម៉ូតូមួយគ្រឿងធ្វើដំណើរតែម្នាក់ឯងតាមបណ្តោយផ្លូវលេខ៣៧១ ក្នុងទិសដៅពីជងទៅត្បូង ។ លុះដល់ចំណុចកើតហេតុ ស្រាប់តែមានរថយន្តដឹកទំនិញធុនធំមួយគ្រឿង បើកបរដោយបុរសម្នាក់ ធ្វើដំណើរក្នុងទិសដៅស្របគ្នា ក៏បានបើកទៅកៀរនិងបុកម៉ូតូជនរងគ្រោះពីក្រោយ បណ្តាលអោយជនរងគ្រោះដួលខ្ទាតចូលក្រោមកង់រថយន្តផ្នែកខាងក្រោយ បែកក្បាលហូរឈាមបាត់បង់ជីវិតនៅនឹងកន្លែងភ្លាមៗតែម្តង ។ ចំណែករថយន្តបង្កបានបើកហួសពីចំណុចកើតហេតុប្រមាណ១០០ម៉ែត្រ អ្នកបើកបររថយន្តក៏បានបើកទ្វារចុះរួចរត់គេចខ្លួនបាត់ស្រមោលផងដែរ ។
ក្រោយកើតហេតុ គេសង្គេតឃើញកម្លាំងនគរបាលមូលដ្ឋាន រួមជាមួយជំនាញបានចុះអន្តរាគមន៍ធ្វើការវាស់វែងអូសយកម៉ូតូជនរងគ្រោះ រួមទាំងរថយន្តបង្កទៅរក្សាទុកនៅការិយាល័យនគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរងចាំដោះស្រាយទៅតាមផ្លូវច្បាប់នៅពេលក្រោយ ។ ចំណែកសពជនរងគ្រោះ ត្រូវបានសមត្ថកិច្ចធ្វើកំណត់ហេតុប្រគល់ជូនសាច់ញាតិ ដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ