ខេត្តបន្ទាយមានជ័យ ៖ ពលករចំនួន៤នាក់ រួមទាំងអ្នកបើកបររថយន្តពាក់ស្លាកលេខថៃម្នាក់តែជាខ្មែរដូចគ្នាត្រូវសមត្ថកិច្ចចម្រុះថៃធ្វើការឃាត់ខ្លួន ក្នុងភូមិនិងឃុំណងសាំងស្រុកអារញ្ញ ខេត្តស្រះកែវ កាលពីព្រឹកថ្ងៃទី២៩ កញ្ញា ២០២០ ខណៈកំពុងនៅក្នុងរថយន្តជំគ្នា…
ខេត្តបន្ទាយមានជ័យ ៖ ពលករចំនួន៤នាក់ រួមទាំងអ្នកបើកបររថយន្តពាក់ស្លាកលេខថៃម្នាក់តែជាខ្មែរដូចគ្នាត្រូវសមត្ថកិច្ចចម្រុះថៃធ្វើការឃាត់ខ្លួន ក្នុងភូមិនិងឃុំណងសាំងស្រុកអារញ្ញ ខេត្តស្រះកែវ កាលពីព្រឹកថ្ងៃទី២៩ កញ្ញា ២០២០ ខណៈកំពុងនៅក្នុងរថយន្តជំគ្នា ។ ពលករខ្មែរទាំង៥នាក់ខាងលើគេដឹងថា ជាអ្នកស្រុកស្វាយចេក ខេត្តបន្ទាយមានជ័យ ។
ប្រភពថា មុនកើតហេតុមានពលករខ្មែរម្នាក់ឈ្មោះយឹង បូរី អាយុ៣៩ឆ្នាំ ធ្វើការផ្នែកសំណង់នៅទីរួមខេត្តស្រះកែវ ១៥ឆ្នាំ និងមានទីលំនៅក្នុងស្រុកស្វាយចេកជាមួយពលករ៤នាក់ខាងលើបានបើករថយន្តនីសាន់ពាក់ស្លាកលេខថៃ១គ្រឿង ទៅព្រំដែនក្នុងស្រុកតាប្រាយ៉ា ខេត្តស្រះកែវឈមទឹកដីកម្ពុជាស្រុកថ្មពួកទទួលពលករ៤នាក់ ស្រីម្នាក់ដែលជាអ្នកស្រុកជាមួយគ្នា ដើម្បីយកទៅធ្វើការជាមួយ។
លុះកំពុងធ្វើដំណើរតាមផ្លូវចេញពីស្រុកតាប្រាយ៉ាឆ្ពោះទៅការដ្ឋានសំណង់វិញដល់ផ្លូវជាតិមួយក្នុងស្រុកអារញ្ញក៏ត្រូវសមត្ថកិច្ចចម្រុះថៃធ្វើកាដាក់បារ៉ាស់សុំឆែករថយន្ត និងឈានទៅឃាត់ខ្លួនទាំងអស់គ្នាយកទៅសាកសួរតែម្តង។
អ្នកបើកបររថយន្តនិយាយថា ដោយសារពលករទាំង៤នាក់បានទាក់ទងតាមហ្វេសប៊ុកឲ្យជួយយកទៅធ្វើការជាមួយផងទើបខ្លួនយករថយន្តប្អូនថ្លៃបើកមកព្រំដែនដឹកអ្នកស្រុកជាមួយគ្នាដឹងអីក៏ត្រូវគេចាប់តាមផ្លូវមិនទាន់ដល់គោលដៅផង ។
ពលករទាំង៥នាក់ត្រូវបានគេបញ្ជូនឲ្យសមត្ថកិច្ចជំនាញ ដើម្បីចាត់ការបន្ត ។ គួរបញ្ជាក់ថា មួយរយៈចុងក្រោយនេះភាគីថៃបានដាក់ពង្រាយបន្លាលួសតាមច្រករបៀងក្នុងស្រុកមួយចំនួនក្នុងខេត្តស្រះកែវបន្ថែម ដើម្បីទប់ស្កាត់ពលករបរទេសលួចចូលប្រទេសរបស់គេក្នុងពេលបង្កាទប់ស្កាត់មេរោគកូវីត១៩។
ទោះជាបែបនេះក្តីពលករខ្មែរនៅតែមានលួចឆ្លងដែនទាំងប្រថុយប្រថានហើយត្រូវបានសមត្ថកិច្ចថៃចាប់ជាបន្តបន្ទាប់លើទឹកដីរបស់គេចោទថា លួចឆ្លងដែនខុសច្បាប់៕
ចែករំលែកព័តមាននេះ