ខេត្តបន្ទាយមានជ័យ ៖ ស្ត្រីជាអាជីវករខ្មែរម្នាក់បានបាត់បង់ជីវិតដោយសារគាំងបេះដូងនាព្រឹកថ្ងៃទី២៩ កញ្ញា ឆ្នាំ២០២០ នៅផ្សាររុងក្លឿ ស្រុកអារញ្ញ ខេត្តស្រះកែវ ប្រទេសថៃ។
ស្ត្រីរងគ្រោះឈ្មោះនុ រស្មី អាយុ៣០ឆ្នាំ មានទីលំនៅភូមិប្រជាធម្ម សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
តាមប្រភពព័ត៌មានបានឱ្យដឹងថា ក្រោយជនរងគ្រោះបាត់បង់ជីវិត ភាគីថៃបានយកសពទៅធ្វើកោសលវិច្ច័យនៅមន្ទីរពេទ្យក្នុងស្រុកអារញ្ញ ជាលទ្ធផលបញ្ជាក់ថា ជនរងគ្រោះបាត់បង់ជីវិតដោយសារជំងឺគាំងបេះដូង។
ពាក់ព័ន្ធនឹងករណីខាងលើ បើទោះជាជំហ៊ានដំបូងមានគេបង្ហោះតាមបណ្តាញសង្គមហ្វេសប៊ុកសង្ស័យថា ស្ត្រីរងគ្រោះអាចចូលទៅផ្សាររុងក្លឿលក់ដូរបែបកញ្ឆក់កន្តៀត និងខ្លះលើកឡើងបែបផ្សេង តែក្រុមមន្ត្រីបំរើការងារនៅច្រកទ្វារអន្តរជាតិប៉ោយប៉ែតប្រាប់ថាជនរងគ្រោះជាអាជីវករស្នាក់នៅផ្សាររុងក្លឿ ប្រើប្រាស់លិខិតឆ្លងដែនត្រឹមត្រូវ មិនមែនខុសច្បាប់ឡើយ។
សពត្រូវបានគេបញ្ជូនត្រឡប់មកកម្ពុជាតាមច្រកទ្វារអន្តរជាតិប៉ោយប៉ែតនៅថ្ងៃដដែលដើម្បីធ្វើបុណ្យតាមប្រពៃណីនៅគេហដ្ឋានរបស់ជនរងគ្រោះក្នុងភូមិសង្កាត់ខាងលើ៕ (កែសម្រួលដោយ ៖ ធីតា)
ចែករំលែកព័តមាននេះ