រាជធានីភ្នំពេញ ៖ តាំងពីថ្ងៃទី២៦ ខែកញ្ញា ឆ្នាំ២០២០ មកម្ល៉េះ ដែលអាងហែលទឹកធំមួយនៅស្ដាតអូឡាំពិកបានបើកដំណើរការប្រកួតកីឡាហែលទឹកថ្នាក់ជាតិប្រចាំឆ្នាំ២០២០ ដើម្បីបង្អួត និងបង្ហាញពីអាងហែលទឹកមួយនេះ បន្ទាប់ពីចំណាយពេលសាងសង់អស់ជាច្រើនខែ…
រាជធានីភ្នំពេញ ៖ តាំងពីថ្ងៃទី២៦ ខែកញ្ញា ឆ្នាំ២០២០ មកម្ល៉េះ ដែលអាងហែលទឹកធំមួយនៅស្ដាតអូឡាំពិកបានបើកដំណើរការប្រកួតកីឡាហែលទឹកថ្នាក់ជាតិប្រចាំឆ្នាំ២០២០ ដើម្បីបង្អួត និងបង្ហាញពីអាងហែលទឹកមួយនេះ បន្ទាប់ពីចំណាយពេលសាងសង់អស់ជាច្រើនខែ ។ នេះក៏ជាអាងហែលទឹកស្ដង់ដារមួយរបស់កម្ពុជា ដែលនឹងត្រូវជ្រើសធ្វើជាទីកន្លែងប្រកួតហែលទឹកសម្រាប់ព្រឹត្តិការណ៍ស៊ីហ្គេមដែលកម្ពុជាធ្វើជាម្ចាស់ផ្ទះផងដែរ ទើបទីតាំងមួយនេះ ទទួលបានការចាប់អារម្មណ៍ដែលមនុស្សភាគច្រើនចង់ស្វែងយល់ពីលក្ខណៈពិសេស បន្ទាប់ពីត្រូវគេដឹងថា គ្រាន់តែចំណាយការជួសជុលកែលម្អគឺអស់ដល់៣លានដុល្លារនោះ។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហព័ន្ធខ្មែរកីឡាហែលទឹក បានថ្លែងក្នុងឱកាសចុះត្រួតពិនិត្យវឌ្ឍនភាពការដ្ឋានសាងសង់អាងហែលទឹកនៅពហុកីឡដ្ឋានជាតិអូឡាំពិកថា នេះគឺជាអាងហែលទឹករបស់កម្ពុជា ដែលមានស្ដង់ដាអន្ដរជាតិ។
លោកថា សហព័ន្ធខ្មែរកីឡាហែលទឹក សម្រេចឱ្យមានការប្រកួតជ្រើសរើសជើងឯកថ្នាក់ជាតិ ឆ្នាំ២០២០ និង អបអរសាទរ ពិធីសម្ពោធដាក់ឲ្យប្រើប្រាស់ជាផ្លូវការនូវអាងហែលទឹកនៃពហុកីឡដ្ឋានជាតិដែលបានធ្វើឡើងពីថ្ងៃទី២៦ដល់ថ្ងៃទី២៨ ខែកញ្ញា ឆ្នាំ២០២០នេះ គឺជាការសាកល្បងដើម្បីស្វែងយល់ពីចំណុចពិសេស និងចំណុចខ្សោយក្រោយពីការជួសជុលអាងហែលទឹកមួយនេះទុកសម្រាប់ការទទួលស៊ីហ្គេម។
យោងតាមលោក ហែម គិរី អគ្គលេខាធិការ សហព័ន្ធខ្មែរកីឡាហែលទឹកឲ្យដឹងថា សម្រាប់ ការប្រកួតកីឡាហែលទឹកជ្រើសរើសជើងឯក ថ្នាក់ជាតិ គឺមានការចូលរួមប្រកួតទាំងផ្នែកបុរស និងនារី ។ សម្រាប់បុរសជាកីឡាករគឺមានអាយុចាប់ពី១២ឆ្នាំឡើងទៅ ចំណែកនារីជាកីឡាការិនីត្រូវមានអាយុចាប់ពី១០ឆ្នាំឡើងទៅ និងផ្នែកជនពិការជាកីឡាករគិតចាប់ពី (S3-S10)។ លោកបានឲ្យដឹងទៀតថា ក្នុងឱកាសសម្ពោធដាក់ឲ្យប្រើប្រាស់ជាផ្លូវការនូវអាងហែលទឹកនៃពហុកីឡដ្ឋានជាតិនេះ ប្រភេទកីឡាបាល់ទឹកក៏បានរៀបចំឲ្យប្រកួតដែរ គឺរួមមានក្រុមរាជធានី ភ្នំពេញ ប្រកួតជាមួយក្រុមខេត្តកំពង់ចាម ។ កីឡាករ កីឡាការិនីម្នាក់ៗ មានសិទ្ធិអាចប្រកួត បានចំនួន៤វិញ្ញាសា គឺវិញ្ញាសាឯកត្តជនមាន ៣វិញ្ញាសា និងវិញ្ញាសាបណ្តាក់មាន១វិញ្ញាសា។
លោករដ្ឋមន្ត្រីស៊ុន ចាន់ថុល ប្រធានសហព័ន្ធខ្មែរកីឡាហែលទឹក បានឲ្យដឹងទៀតថា ការសាងសង់អាងហែលទឹកនៅពហុកីឡដ្ឋានជាតិអូឡាំពិកនេះ គឺបានធ្វើរួចរាល់ហើយដោយប្រើប្រាស់ពេលវេលាអស់១៨ខែ និងចំណាយថវិកាអស់ជិត៣លានដុល្លារ ជាជំនួយរបស់ក្រុមហ៊ុនសៀងហៃ ខនស្ត្រាកស្ហឹន (Shanghai Construction Company )។
លោកបានបន្តថា ការសាងសង់នេះរួមបញ្ចូលទាំងការជួសជុលនិងពង្រីកទាំងអាងហែលទឹក និងកន្លែងលោតទឹក។ ក្រៅពីនោះទៀតគឺ មានការដំឡើងថ្មីទាំងអស់នូវម៉ាស៊ីនបូមទឹក ម៉ាស៊ីនចម្រោះទឹក និងបានដាក់កៅអីអង្គុយបានជាង១.៦០០កៅអី និងបានធ្វើជាបន្ទប់ដាក់ឧបករណ៍ហ្វឹកហាត់បន្ថែមទៀតផង ។ លោកក៏បានអំពាវនាវឱ្យយុវជនទាំងអស់ នាំគ្នាចូលរួមហ្វឹកហាត់កីឡាហែលទឹកដោយឥតគិតថ្លៃដើម្បីត្រៀមខ្លួនយកមេដាយជូនជាតិក្នុងព្រឹត្តិការណ៍កីឡាស៊ីហ្គេម ដែលកម្ពុជានឹងធ្វើជាម្ចាស់ផ្ទះនាឆ្នាំ២០២៣ ខាងមុខនេះ។
គួរបញ្ជាក់ផងដែរថា បច្ចុប្បន្ននេះ កម្ពុជាក្រៅពីមានអាងហែលទឹកពហុកីឡដ្ឋានជាតិអូឡាំពិកក៏មានអាងហែលទឹកស្ដង់ដារនៅខេត្តកំពង់ចាម នៅពហុកីឡដ្ឋានជាតិមរតកតេជោ និងអាងហែលទឹកកីឡដ្ឋានស្រុកកោះធំ ដែលទើបសាងសង់រួចរាល់ជាស្ថាពរ និងត្រៀមសម្រាប់ធ្វើជាម្ចាស់ផ្ទះក្នុងកម្មវិធីប្រកួតកីឡាស៊ីហ្គេម ឆ្នាំ២០២៣ ៕
ចែករំលែកព័តមាននេះ