ខេត្តបាត់ដំបង ៖ គេមិនទាន់ដឹងថា តើការបើកចំហរជើងមេឃផ្ដល់លេខទូរស័ព្ទ សម្រាប់ឱ្យពលរដ្ឋធ្វើការទំនាក់ទំនងផ្ទាល់រាល់បញ្ហាផ្សេងៗរបស់លោកសាត គឹម
សាន ស្នងការខេត្ត ដែលទើបប្រកាសចូលកាន់តំណែងថ្មីនេះ បានរយៈពេលប៉ុន្មានដង្ហើមចង្រិតនោះទេ ? ព្រោះនេះ មិនមែនជាលើកដំបូងទេ សម្រាប់មេដឹកនាំស្នងការខេត្ត ឬមេដឹកនាំស្ថាប័នដទៃទៀត ដែលតែងប្រកាសបើកចំហបែបនេះ ដើម្បីឲ្យពលរដ្ឋទំនាក់ទំនងផ្ទាល់ ក្រោយពីទទួលបានតំណែងធំដុំថ្មី។ ប៉ុន្តែជាបទពិសោធន៍សម្រាប់ពលរដ្ឋខេត្តមួយនេះ ហាក់ទទូលបានលទ្ធផលជាវិជ្ជមានតិចតួចបំផុត ពីលោកធំៗដែលចេះត្រឹមតែសន្យាមិនសូវថ្លៃ រហូតស្ទើរតែធ្វើឲ្យពលរដ្ឋអស់ជំនឿទៅហើយ។
ក្រុមប្រតិកម្មរហ័សរបស់ស្នងការខេត្ត ដែលគេដឹងថា គ្រប់គ្រងដោយលោក អ៊ឹម កុសល ស្នងការរងខេត្ត បានផ្សព្វផ្សាយលេខទូរស័ព្ទលាយឡំនឹងខ្លឹមសារនានាផង តាមរយៈ
ផេករបស់ខ្លួន ( ស្នងការដ្ឋាននគរបាលខេត្តបាត់ដំបង) កាលពីថ្ងៃទី២៦ កញ្ញា ដែលមានចំណងជើង « លោកឧត្តមសេនីយ៍ត្រី សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង ផ្ដល់លេខទូរស័ព្ទជូនដល់ប្រជាពលរដ្ឋ ដើម្បីងាយស្រូលក្នុងការផ្ដល់ព័ត៌មាន »។ ពោល លោក សាត គឹមសាន បានប្រកាសផ្ដល់លេខទូរស័ព្ទជាសាធារណៈចំនួន០២ខ្សែ តាមរយៈផេកស្នងការខេត្តបែបនេះ បន្ទាប់ពីលោកប្រកាសចូលកាន់តំណែងជាស្នងការខេត្តនេះ បានរយៈពេល៣ថ្ងៃ។
យោងលើខ្លឹមសារនៃការផ្សព្វផ្សាយនៅក្នុងផេករបស់ស្នងការដែលបានភ្ជាប់ជាមួយនូវលេខទូរស័ព្ទចំនួន០២ខ្សែផង ក្នុងគោលបំណងសំខាន់ គឺដើម្បីបង្កភាពងាយស្រូលជូនប្រជាពលរដ្ឋ សាធារណៈជនទូទៅនៅគ្រប់មជ្ឍដ្ឋាន ក្នុងការទំនាក់ទំនងផ្ដល់ព័ត៌មានទាក់ទងនឹងការងារសន្តិសុខសណ្ដាប់ធ្នាប់សង្គមនិងបញ្ហាផ្សេងៗទៀត បានឆាប់រហ័សនិងធានាអន្តរាគមន៍ដោះស្រាយជូនទាន់ពេលវេលា។ មិនតែប៉ុណ្ណោះ លោកស្នងការខេត្តថ្មី នឹងរៀបចំឲ្យគ្រប់អង្គភាពជំនាញចំណុះស្នងការ អធិការក្រុង ស្រុក និងប៉ុស្ដិ៍រដ្ឋបាល ផ្ដល់នូវលេខទូរស័ព្ទដោយចំហរ តាមរយៈផេកហ្វេសប៊ុកផ្លូវការ របស់ស្នងការខេត្ត និង បណ្ដាញសង្គមផ្សេងៗទៀត សម្រាប់ប្រជាពលរដ្ឋ សាធារណៈជនទាក់ទង។
ប៉ុន្តែសារបើកចំហរជើងមេឃរបស់លោក សាត គឺមសាន ដែលទើបចូលកាន់តំណែងស្នងការថ្មីនេះ ត្រូវបានមតិភាគច្រើនដែលធ្លាប់មានបទពិសោធន៍ជាមួយលោកធំៗ ដែលកាន់តំណែងមុនៗ បានរិះគន់និងចាត់ទុកថា «វាជារឿងដដែលៗ និងជាទម្លាប់សម្រាប់មន្ត្រីធំៗដែលទើបចូលកាន់តំណែងថ្មី តែងតែប្រកាសបើកចំហរជើងមេឃបែបនេះជាមួយពលរដ្ឋ។ លុះអង្គុយកៅអីក្ដៅគូទបន្តិច ស្គាល់ច្រក ស្គាល់ផ្លូវ ភ្លេចអស់នូវការសន្យា»។
គេនៅចាំបានថា កាលពីនៅរាជ្ជកាលស្នងការចាស់ លោក អ៊ុច សុខុន ក៏ធ្លាប់ប្រកាសបើកចំហជើងមេឃបែបនេះដែរ ជាមួយពលរដ្ឋនិងអ្នកសារព័ត៌មាន នាប៉ុន្មានខែក្រោយលោកចូលកាន់តំណែង ដើម្បីឲ្យប្រជាពលរដ្ឋមានការទំនាក់ទំនងផ្ដល់ព័ត៌មានឲ្យបានទូលំទូលាយ។ ប៉ុន្តែមិនទាន់បានប៉ុន្មានដង្ហើមចង្រិតផង ជើងមេឃហាក់បិទរួមចង្អៀតណែនវិញ ស្ទើរមើលគ្នាមិនឃើញ ហៅគ្នាមិនឮរវាងសមត្ថកិច្ចនិងប្រជាពលរដ្ឋ។ ជាពិសេស នៅតាមបណ្ដាអធិការស្រុកមួយចំនួន សមត្ថកិច្ចហាក់មិនខ្វល់ខ្វាយចំពោះសុខទុក្ខពលរដ្ឋឡើយ នៅពេលពលរដ្ឋស្នើសុំអន្តរាគមន៍ពេលមានបទល្មើសកើតឡើងម្ដងៗ។
ប៉ុន្តែនៅក្នុងរាជ្ជកាលថ្មី នៃស្នងការខេត្ត ដែលដឹកនាំដោយ លោក សាត គឹមសាន នៅពេលនេះ គេមិនទាន់ដឹងថា តើលោកនឹងត្រូវដើរតាមគន្លងចាស់ ឬ ត្រូវផ្លាសគន្លងថ្មីនោះទេ ? ប៉ុន្តែពលរដ្ឋនៅក្នុងខេត្តបាត់ដំបង ហាក់ដូចជាមានបទពិសោធន៍ច្រើនពេកហើយ ជាមួយនឹងរឿងសន្យាខ្យល់ដដែលៗបែបនេះ។ បើតាមប្រវត្តិ លោក សាត គឹមសាន បានប្រឹងប្រែងឡើងតំណែងយ៉ាងខ្លាំងក្លា ពីប្រធានការិយាល័យចរាចរណ៍ខេត្ត ទៅកាន់តំណែងជាស្នងការរង ទទូលបន្ទុកការងារចរាចរណ៍ និងចុងក្រោយនេះ លោកទទូលបានតំណែងធំបំផុត គ្រប់គ្រងស្នងការខេត្តទាំងមូលតែម្ដង។ ប៉ុន្តែលោកនៅមិនទាន់ជ្រះស្រឡះនៅឡើយទេ បើនិយាយពីរឿងអាស្រូវនៅក្នុងអង្គភាពចរាចរណ៍ ។
កន្លងទៅ កាលនៅរាជ្ជកាល លោកស្នងការចាស់ លោក សាត គឹមសាន ត្រូវបានគេរិះគន់យ៉ាងចាស់ដៃ ដោយសង្ស័យថា លោកជាអ្នកនៅពីក្រោយខ្នង នៃរថយន្តល្មើសច្បាប់ចរាចរណ៍ ។ ដូចជា រថយន្តដឹកទិញសំពីសំពោងគ្មានសណ្ដាប់ធ្នាប់ រថយន្តដឹកគ្រឿងសំណង់ រថយន្តក្រុមហ៊ុនដឹកដី និងរថយន្តកែច្នៃនានា ដែលរថយន្តទាំងនោះភាគច្រើនគ្មានឯកសារបញ្ជាក់ត្រឹមត្រូវ កែច្នៃខុសបច្ចេកទេស អ្នកបើកបរគ្មានប័ណ្ណបើកបរ។ ប៉ុន្តែរថយន្តទាំងនោះ នៅតែអាចធ្វើចរាចរណ៍បានលើដងផ្លូវនានា ឆ្លងកាត់យ៉ាងរលូនគ្រប់គោលដៅរបស់មន្ត្រីចរាចរណ៍ទាំងអស់ ក្នុងខេត្តបាត់ដំបង រហូតដល់សព្វថ្ងៃនេះ។
មិនតែប៉ុណ្ណោះ លោកសាត គឹមសាន ក៏ត្រូវបានគេសង្ស័យដែរថា ជាខ្នងបង្អែក នៃរថយន្តខ្នាតយក្សរបស់ក្រុមហ៊ុនដឹកជញ្ជូននានា ដែលដឹកទំនិញបើកចូលលុកលុយពាសពេញក្រុងបាត់ដំបង បំពានស្លាកសញ្ញាហាមឃាត់ ជាថ្នូរនឹងផលប្រយោជន៍ ព្រោះលោកតែងអន្តរាគមន៍ជានិច្ច នៅពេលមន្ត្រីតូចតាចចាប់រថយន្តល្មើសច្បាប់ទាំងនោះម្ដងៗ។ ប៉ុន្តែការចោទប្រកាន់នេះ ត្រូវបានលោកបដិសេធជាបន្តបន្ទាប់ថា លោកមិនបានការពារ ឬ នៅពីក្រោយ នៃរថយន្តល្មើសច្បាប់ចរាចរណ៍ទាំងនេះទេ។ ផ្ទុយទៅវិញ លោកតែងប្រឹងប្រែងយ៉ាងខ្លាំងក្លា ក្នុងការទប់ស្កាត់ និងតាមចាប់រថយន្តល្មើសច្បាប់ទាំងនោះ ដើម្បីឲ្យគោរពច្បាប់ចរាចរណ៍ហើយក៏មិនជាប់ពាក់ព័ន្ធនឹងការទទួលសំណូកប្រចាំខែពីបទល្មើសឡើយ។
យ៉ាងនេះក្ដី ពេលនេះ លោកសាត គឹមសាន បានទទួលតំណែងថ្មី ជាស្នងការដ្ឋានខេត្តពេញលេញហើយ។ ដូច្នេះ រាល់កិច្ចការអ្វីៗទាំងអស់នៅក្នុងស្នងការខេត្ត គឺលោកជាអ្នកសម្រេច។ ប៉ុន្តែជាកិច្ចចាប់ផ្ដើមនៃរាជកាលថ្មី ក្រោមកណ្ដាប់ដៃរបស់លោកនៅពេលនេះ លោកស្នងការថ្មី ក៏ត្រូវជម្រះឲ្យអស់នូវមន្ទិលនានា ដែលជាប់ពាក់ព័ន្ធនឹងរឿងអាស្រូវចរាចរណ៍កន្លងមកដែរ។ បើមិនដូច្នេះទេ ទំនងលោកពិបាកអូសទាញទឹកចិត្តពលរដ្ឋឲ្យជឿជាក់លើការដឹកនាំរបស់លោកណាស់ រាប់ទាំងមន្ត្រីរាជការនៅក្នុងខេត្តមួយចំនួនផង។ ព្រោះរឿងអាស្រូវខ្លះៗរបស់លោកបានជ្រូតជ្រាបយ៉ាងស៊ីជម្រៅដល់មហាជន។
នៅក្នុងផេករបស់ស្នងការខេត្ត ដែលទើបប្រកាសបើកចំហរជើងមេឃ សម្រាប់រាជ្ជកាលថ្មីនេះ លោកស្នងការបានប្រកាសឲ្យប្រជាពលរដ្ឋសាធារណៈជនទូទៅ ចូលរួមសហការជាមួយសមត្ថកិច្ចនគរបាល ដោយបានភ្ជាប់ជាមួយនូវលេខទូរស័ព្ទចំនួន០២ខ្សែ អមនៅក្បែររូបថតលោកសាត គឹមសាន ផង។ លេខទូរស័ព្ទទាំង០២ខ្សែនោះ គឺលេខ ០១២ ៦៥៤ ៤៤៩ ជាលេខស្នងការផ្ទាល់ និង លេខ ០១២ ៥៣០ ២៣០ ជាលេខក្រុមព័ត៏មាននិងប្រតិកម្មរហ័ស នៃស្នងការខេត្ត។
នៅក្នុងផ្ទាំងរូបភាពនេះ បានបញ្ជាក់ផងដែរនូវខ្លឹមសារថា «គ្រប់ការិយាល័យជំនាញ អធិការស្រុកប៉ុស្ដិ៍រដ្ឋបាល ត្រូវតែមានមន្ត្រីប្រចាំការ២៤ម៉/២៤ម៉ ដើម្បីដោះស្រាយបញ្ហាផ្សេងៗ និងទទូលពាក្យបណ្ដឹងពីប្រជាពលរដ្ឋ»។ នេះជាផែនការថ្មីរបស់លោកស្នងការថ្មី ហើយសង្ឃឹមថា ផែនការថ្មីនេះ នឹងមានប្រសិទ្ធភាព មិនមែនដូចផែនស្ករឡើយ។ ដូច្នេះ សូមប្រជាពលរដ្ឋត្រូវតែផ្ដល់ទំនុកចិត្តជាថ្មី ដល់ផែនការលោកស្នងការថ្មី បើមានបញ្ហាអ្វីត្រូវទូរស័ព្ទទៅកាន់លោកស្នងការភ្លាម ៕
ចែករំលែកព័តមាននេះ