ខេត្តសៀមរាប ៖ ស្ត្រីម្នាក់ជាជាងអ៊ុតសក់បង្កប់ល្បែងស៊ីសងខុសច្បាប់ (ឆ្នោត) ត្រូវបានប៉េអឹមចាប់ខ្លួនបញ្ជូនទៅតុលាការ បង្កការភ្ញាក់ផ្អើលដល់តូបអ្នកជិតខាង។ ហេតុការណ៍ឃាត់ខ្លួនជាងអ៊ុតសក់នោះធ្វើឡើងនៅវេលាម៉ោង០៣ និង៤០នាទីរសៀល ថ្ងៃទី២៦ ខែកញ្ញា ឆ្នាំ២០២០ ស្ថិតនៅចំណុច ភូមិទក្សិណត្បូង សង្កាត់គោកចក ក្រុង/ ខេត្តសៀមរាប។
បើតាមការបញ្ជាក់ពីមន្ត្រីកងរាជអាវុធហត្ថខេត្តបានប្រាប់ថា កម្លាំងមន្ទីរយុត្តិធម៌ ចំនួន០៤នាក់ រថយន្តចំនួន០១គ្រឿង ដឹកនាំដោយលោកវរៈសេនីយ៍ត្រី កឹម អាង ប្រធានមន្ទីរយុត្តិធម៌បានបង្ក្រាបល្បែងស៊ីសងដោយខុសច្បាប់ (ឆ្នោត) នៅចំណុច ភូមិទក្សិណត្បូង សង្កាត់គោកចក ក្រុង/ខេត្តសៀមរាប និងដោយមានការសម្របសម្រួលពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប ឈានដល់ធ្វើការឃាត់ខ្លួនបាន ០១នាក់ មានឈ្មោះ អ៊ាង រដ្ឋា ភេទស្រី អាយុ២៦ឆ្នាំ មុខរបរ ជាងអ៊ុតសក់ មានទីលំនៅភូមិ ឃុំខាងលើ រួចយកមកសួរនៅទីបញ្ជាការកងរាជអាវុធហត្ថខេត្ត ដើម្បីរៀបចំកសាងសំណុំរឿងបញ្ជូនទៅតុលាការខេត្ត។
បន្ទាប់ពីឃាត់ខ្លួនបានស្ត្រី អ៊ុតសក់ ក្នុងនោះដកហូត វត្ថុតាងរួមមាន៖ ១.សៀវភៅសម្រាប់កត់ឆ្នោតចំនួន ០២ក្បាល។ ២.ម៉ាស៊ីនគិតលេខចំនួន ០១គ្រឿង។ ៣.ប៊ិចចំនួន ០២ដើម។ ៤.ប្រាក់រៀលចំនួន ១៤០,០០០៛។ ៥.ទូរស័ព្ទដៃចំនួន ០១គ្រឿង (ម៉ាកអូប៉ូ ០១គ្រឿង)។ បច្ចុប្បន្ន៖ ជនសង្ស័យ(ស្ត្រី)លក់ឆ្នោតត្រូវបានកម្លាំងជំនាញ នៃកងរាជអាវុធហត្ថខេត្តឃាត់ខ្លួន យកមកសួរនាំ ដើម្បីអនុវត្តតាមនីតិវិធីច្បាប់ ហើយរៀបចំកសាងសំណុំរឿងបញ្ជូនខ្លួន និងវត្ថុតាងទៅតុលាការខេត្ត ចាត់ការបន្តតាមនីតិវិធីនៃច្បាប់ស្តីពីល្បែងស៊ីសងខុសច្បាប់។
ពលរដ្ឋក្នុងខេត្តសៀមរាបបានគ្នាមានមតិផ្សេងៗគ្នាថា សមត្ថកិច្ចជំនាញដូចជា ប៉ូលិស, ប៉េអឹម ចាប់ល្បែង បានតែអ្នកតូចតាច អត់បង់លុយ ចាប់យកទៅដាក់គុកទាំងអស់ជាក់ស្តែងដូចករណីស្ត្រីអ៊ុតសក់នៅក្នុងក្រុងសៀមរាប ម្នាក់នេះស្រាប់គាត់អ៊ុតសក់ផងឆ្លៀតលក់ឆ្នោតយកក្បាលកាក់គ្រាន់បានលុយបន្ថែមដើម្បីចិញ្ចឹមកូនទៅរៀនផងដែរថា។ ពលរដ្ឋមានមតិបន្ថែមថា ចំពោះអ្នកលក់ឆ្នោតយួន នៅពេញក្នុងក្រុងសៀមរាប រហូតហ៊ា ចូលភូមិឃុំសង្កាត់ទៀត សុទ្ធតែប្រពន្ធអ្នកធ្វើការ និង អ្នករកស៊ីធំៗបើកលក់សេរី មិនដែលឃើញសមត្ថកិច្ចកិច្ចណាម្នាក់ចាប់ដាក់គុកឡើយ៕ ដោយ ៖ ច័ន្ទ រស្មី
ចែករំលែកព័តមាននេះ