រាជធានីភ្នំពេញ ៖ យុវជនអ្នកជួញដូរគ្រឿងញៀនម្នាក់ត្រូវបានកម្លាំងនគរបាល នៃអធិការដ្ឋានខណ្ឌដង្កោ និងនគរបាលប៉ុស្តិ៍ព្រៃវែងធ្វើការស្រាវជ្រាវរហូតឃាត់ខ្លួនបានព្រមទាំងធ្វើការដកហូតបានគ្រឿងញៀន និងអាវុធច្នៃ១ដើមផងដែរ។ ការចាប់ខ្លួននោះបានធ្វើឡើងកាលពីវេលាម៉ោង៤ល្ងាច ថ្ងៃទី២៧ ខែកញ្ញា ឆ្នាំ២០២០ នៅចំណុចផ្ទះគ្មានលេខ ស្ថិតនៅតាមបណ្ដោយផ្លូវបេតុង ភូមិកំរៀង សង្កាត់ព្រៃវែង ខណ្ឌដង្កោ រាជធានីភ្នំពេញ។
ជនសង្ស័យខាងលើនេះឈ្មោះ ណាំ សុខគៀន ហៅជ្រូក អាយុ២៥ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិខាងលើ នៅក្នុងខណៈនោះកម្លាំងនគរបាលដកហូតបានវត្ថុតាងមួយចំនួនរួមមានថ្នាំញៀនចំនួន១៦កញ្ចប់ ក្នុងនោះកញ្ចប់តូចចំនួន១៥កញ្ចប់ និងកញ្ចប់ធំល្មម១កញ្ចប់,កាំភ្លើងច្នៃ១ដើម,ប្រអប់ជ័រពណ៌សលាយខៀវ១។ នគរបាលបានប្រាប់ឲ្យដឹងថា ប្រតិបត្តិការបង្ក្រាបការជួញដូរគ្រឿងញៀននេះក្រោមការដឹកនាំដោយលោក វរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានចុះស្រាវជ្រាវរកមុខសញ្ញាដែលប្រព្រឹត្តបទល្មើសគ្រប់ប្រភេទនៅក្នុងមូលដ្ឋានដើម្បីបង្ក្រាប។
ខណៈនោះបានទទួលព័ត៌មានពីមហាជនល្អបានបង្ហើបប្រាប់អំពើមុខសញ្ញាជួញដូរដោយខុសច្បាប់នូវសារធាតុញៀនខាងលើដែលកំពុងធ្វើសកម្មភាពយ៉ាងសកម្មនៅត្រង់ចំណុចផ្ទះគ្មានលេខ ផ្លូវបេតុង ភូមិកំរៀង សង្កាត់ព្រៃវែង ខណ្ឌដង្កោ។ ប្រភពដដែលបានបន្តថា ពេលនោះកម្លាំងក៏បានចុះទៅកាន់ចំណុចនោះធ្វើការឃាត់ខ្លួនជនសង្ស័យឈ្មោះ ណាំ សុខគៀន ហៅជ្រូក នោះបានភ្លាមហើយបានធ្វើការឆែកឆេរត្រួតពិនិត្យរកឃើញថ្នាំញៀនដែលជនសង្ស័យលាក់ទុកក្នុងប្រអប់ពណ៌ខៀវ និងដាក់នៅក្នុងហោប៉ៅខោខាងមុខ ខាងស្ដាំ ព្រមទាំងវត្ថុតាងខាងលើដោយជាក់ស្ដែង។ បន្ទាប់មកកម្លាំងបាននាំទៅកាន់អធិការដ្ឋាននគរបាលខណ្ឌដង្កោដើម្បីសាកសួរ និងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់៕ ដោយ ៖ យន់ ស៊ីថា
ចែករំលែកព័តមាននេះ