រាជធានីភ្នំពេញ ៖ ជនសង្ស័យ២នាក់បានធ្វើសកម្មភាពគាស់ចម្រឹងបង្អួចផ្ទះមួយកន្លែងលួចយកទ្រព្យសម្បត្តិ ហើយខណៈលួចបានយកចេញក្រៅផ្ទះ បម្រុងគេចខ្លួនទៅហើយ ក៏ត្រូវបានប្រជាពលរដ្ឋ និងសន្តិសុខបុរីពិភពថ្មី ប្រទះឃើញក៏ស្រែកឆោឡោថា «ចោរៗ» បង្កឲ្យមានការភ្ញាក់ផ្អើល…
រាជធានីភ្នំពេញ ៖ ជនសង្ស័យ២នាក់បានធ្វើសកម្មភាពគាស់ចម្រឹងបង្អួចផ្ទះមួយកន្លែងលួចយកទ្រព្យសម្បត្តិ ហើយខណៈលួចបានយកចេញក្រៅផ្ទះ បម្រុងគេចខ្លួនទៅហើយ ក៏ត្រូវបានប្រជាពលរដ្ឋ និងសន្តិសុខបុរីពិភពថ្មី ប្រទះឃើញក៏ស្រែកឆោឡោថា «ចោរៗ» បង្កឲ្យមានការភ្ញាក់ផ្អើល គាប់ជួនពេលនោះកម្លាំងនគរបាលប៉ុស្តិ៍ព្រែកកំពឹស កំពុងល្បាតជិតនោះផងក៏ធ្វើការឃាត់ខ្លួនបានម្នាក់ ចំណែកម្នាក់ទៀតរត់គេចខ្លួនបាត់ស្រមោល។
ហេតុការណ៍ខាងលើនេះបានកើតឡើងកាលពីម៉ោង១១និង៣០នាទីព្រឹក ថ្ងៃទី២៧ ខែកញ្ញា ឆ្នាំ២០២០ នៅត្រង់ចំណុចផ្ទះលេខ៨៤ ផ្លូវលេខ៦ បុរីពិភពថ្មីកួរស្រូវ ស្ថិតនៅភូមិ ក្រាំងស្វាយ សង្កាត់ព្រែកកំពឹស។
ជនសង្ស័យដែលត្រូវឃាត់ខ្លួនខាងលើនេះ ឈ្មោះ ម៉េង ជីវ័ន្ត ហៅហ័រ ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួល ក្នុងភូមិចុងដី សង្កាត់ច្បារអំពៅ២ ខណ្ឌច្បារអំពៅ និងបក្សពួកម្នាក់ទៀតរត់គេចខ្លួនបាត់ ចំណែកវត្ថុតាងមួយចំនួនដែលដកហូតបានរួមមាន ឈើជ្រុងប្រវែង៨០សង់ទីម៉ែត្រ១ដើម, ដែកចម្រឹងបង្អួចគាស់ដាច់ប្រវែង៥០សង់ទីម៉ែត្រចំនួន៣កំណាត់, ទូរទស្សន៍ម៉ាកសាំសុង ពណ៌ខ្មៅ១គ្រឿង និងតេឡេទូរទស្សន៍ម៉ាកសាំសុង១ផងដែរ ។ រីឯម្ចាស់ផ្ទះរងគ្រោះឈ្មោះថេង សុវត្ថឌី ភេទប្រុស អាយុ៣៩ឆ្នាំ មុខរបរលក់ដូរ ទីលំនៅភូមិលេខ៣ សង្កាត់ ផ្សារដេប៉ូទី១ ខណ្ឌទួលគោក ។
បើតាមនគរបាលបាននិយាយថា ផ្ទះកើតហេតុខាងលើនេះ ត្រូវបានម្ចាស់បិទទ្វារចាក់សោរទុកចោល គ្មានមនុស្សរស់នៅ ឬដេកយាមនោះទេ ដោយម្ចាស់បានចេញ-ចូលម្តងម្កាលតែប៉ុណ្ណោះ ។ ដោយឡែកនៅថ្ងៃកើតហេតុ ជនសង្ស័យទាំង២នាក់បាននាំគ្នាចូលទៅគាស់ចម្រឹងបង្អួចចូលទៅលួចយកទ្រព្យសម្បត្តិខាងលើ។
ប្រភពដដែលបន្តថា លុះលួចបានហើយ ក៏នាំគ្នាជញ្ជូនចេញក្រៅផ្ទះបម្រុងនឹងដឹកតាមម៉ូតូ១គ្រឿងម៉ាកហុងដា Beat ពណ៌ក្រហម យកចេញ ដើម្បីគេចខ្លួនទៅហើយ ប៉ុន្តែត្រូវប្រជាពលរដ្ឋ និងសន្តិសុខបុរីពិភពថ្មី ប្រទះឃើញក៏ស្រែកឆោឡោថា «ចោរៗ» បង្កឲ្យមានការ ភ្ញាក់ផ្អើលតែម្តង គាប់ជួនពេលនោះកម្លាំងនគរបាលប៉ុស្តិ៍ព្រែកកំពឹស កំពុងល្បាតជិតនោះស្រាប់ ក៏បានធ្វើការឃាត់ខ្លួនជនសង្ស័យបានម្នាក់ ចំណែកម្នាក់ទៀតរត់គេចខ្លួនបាត់ស្រមោល។
ប្រភពដដែលបានបន្តថា ក្រោយពេលចាប់ខ្លួនបាន កម្លាំងនាំទៅធ្វើការសាកសួរ ហើយជនសង្ស័យបានឆ្លើយសារភាពថា ខ្លួន និងបក្សពួក ពិតជាបានធ្វើសកម្មភាពគាស់ចម្រឹងបង្អួចផ្ទះរបស់ជនរងគ្រោះ រួចចូលលួចយកទ្រព្យសម្បត្តិប្រាកដមែន ហើយកន្លងមកក៏ធ្លាប់បានធ្វើសកម្មភាពគាស់ផ្ទះលួចយកទ្រព្យសម្បត្តិរបស់ប្រជាពលរដ្ឋក្នុងបុរីពិភពថ្មីនេះបានសម្រេចម្ដងរួចមកហើយដែរ៕
ចែករំលែកព័តមាននេះ