ខេត្តកណ្ដាល ៖ បើតាមសេចក្តីរាយការណ៍បានឱ្យដឹងថា មានការភ្ញាក់ផ្អើលមួយបន្ទាប់ពីម្ចាស់បានយកស្មៅទៅដាក់ឲ្យគោស៊ី ស្រាប់តែបាត់អស់២ក្បាល ដោយត្រូវចោរលួចដឹកចេញពីក្រោលបាត់ បង្កឱ្យមានការភ្ញាក់ផ្អើលងកាលពីព្រឹកថ្ងៃទី២៧ ខែកញ្ញា ឆ្នាំ២០២០ ស្ថិតនៅភូមិទីទុយពង ឃុំសំរោងលើ ស្រុកអង្គស្នួល ខេត្តកណ្តាល ។
សេចក្តីរាយការណ៍បន្តថា ជនរងគ្រោះជាម្ចាស់គោខាងលើឈ្មោះ សួង ឃឹម ភេទប្រុស អាយុ៤៩ឆ្នាំ មុខរបរជាកសិករ រស់នៅភូមិ-ឃុំកើតហេតុខាងលើនេះ ។
បើតាមជនរងគ្រោះរៀបរាប់ប្រាប់សមត្ថកិច្ចឲ្យដឹងថា នៅមុនពេលកើតហេតុ វេលាម៉ោងប្រហែល៥ល្ងាច ថ្ងៃទី២៦ ខែកញ្ញា រូបគាត់បានដឹកគោ៥ក្បាល ក្នុងនោះញី២ក្បាល ទៅចងនៅក្នុងក្រោលខាងជើងផ្ទះ ហើយបានដាក់ស្មៅឲ្យគោស៊ីដូចធម្មតា បន្ទាប់មកគាត់ក៏បានចូលទៅសម្រាកនៅក្នុងផ្ទះអស់ទៅ ។
ជនរងគ្រោះបន្តថា លុះដល់ព្រឹកឡើងចូលថ្ងៃទី២៧ ខែកញ្ញា ទើបគាត់បានទៅដាក់ស្មៅ និងដុតភ្លើងរោលមុសឲ្យគោ ក៏ស្រាប់តែបាត់គោអស់២ក្បាល ក្នុងនោះញី១ក្បាល និង ឈ្មោល១ក្បាល ឃើញដូច្នោះគាត់ក៏បានស្រែកឆោឡោភ្លាមៗ ដើម្បីឲ្យអ្នកស្រុកជួយដើររក ។
ម្ចាស់គោបន្តថា ពេលនោះអ្នកស្រុកភូមិ ក៏បានជួយរកភ្លាមៗផងដែរ និងតាមស្វែងរករហូតដល់ចំណុចគុម្ពោតព្រៃខាងលិចភូមិព្រៃទទឹង ឃុំទួលព្រេជ ស្រុកអង្គស្នួល ក៏បានឃើញគោទាំង២ក្បាលមកវិញ ប៉ុន្តែត្រូវបានពន្លះយកសាច់អស់ រួចច្រកក្នុងបាវទុកចោលនៅទីនោះ។ ឃើញដូច្នោះរូបគាត់ជាម្ចាស់ក៏បានដឹកយកសាច់គោទៅផ្ទះ និងបានរាយការណ៍ជូនសមត្ថកិច្ច ដើម្បីឲ្យដឹង និងជួយស្វែងរកមុខសញ្ញាចោរលួចគោនោះ ។
ក្រោយពេលទទួលបានសេចក្តីរាយការណ៍ពីប្រជាពលរដ្ឋ សមត្ថកិច្ចជំនាញបានចុះដល់ កន្លែងកើតហេតុ និងពិនិត្យឃើញវត្ថុតាងដែលក្រុមចោរបានបន្សល់ទុកនៅ ដូចមាន ៖ ១-កាំបិតមុខស្រួចដងឈើចំនួន១, ២-ខ្សែពួរជ័រប្រវែងប្រហែល៧ម៉ែត្រ១ខ្សែ និង៣-ដបទឹកបរិសុទ្ធ១ដប។
ក្រោយសមត្ថកិច្ចបានសន្និដ្ឋានជាជំហ៊ានដំបូងថា ចោរអាចមានបក្ខពួកចាប់ពី៤ទៅ៥នាក់ ដែលប្រថុយខ្លួនមកធ្វើសកម្មភាពលួចគោនេះ ហើយទំនងអាចមកពីការយឺតយ៉ាវនៅពេលពន្លះសាច់គោយូរពេក បណ្តាលឱ្យមេឃភ្លឺ ណាមួយខ្លាចសមត្ថកិច្ចទៅទាន់ ក៏ទុកសាច់គោចោលនៅទីនោះតែម្តងទៅ ៕
ចែករំលែកព័តមាននេះ