ខេត្តត្បូងឃ្មុំ ៖ បើតាមសេចក្តីរាយការណ៍បឋមបានឱ្យដឹងថា ភ្លៀងបានបង្អុរធ្លាក់ និងមានផ្លេកបន្ទោរខ្វែងខ្វាត់លើអាកាស ហើយមិនបានប៉ុន្មានក៏ស្រាប់តែមានរន្ទះបាញ់ចំត្រាក់ទ័រសណ្តោងរ៉ឺម៉ក់ដឹកដំឡូងមួយគ្រឿងដែលបានជ្រកក្រោមដើមឈើធំមួយក្នុងចំការ ខណៈកម្មករជាច្រើននាក់កំពុងតែនាំគ្នាលើកដាក់លើរ៉ឺម៉ក បណ្តាយឱ្យបាត់បង់ជីវិតម្នាក់ និងរបួសធ្ងន់-ស្រាល១៧នាក់ បង្កឱ្យមានការភ្ញាក់ផ្អើលកាលពីម៉ោង២និង៣០នាទីរសៀល ថ្ងៃទី២៧ ខែកញ្ញា ឆ្នាំ២០២០ នៅចំណុចចំការដំឡូងជាប់ព្រំដែនវៀតណាម ចន្លោះបង្គោលលេខ ៨២,៨៣ ខាងត្បូង ភូមិសាទុំ ឃុំជាំក្រវៀន ស្រុកមេមត់ ខេត្តត្បូងឃ្មុំ។
សេចក្តីរាយការណ៍បន្តថា ជនរងគ្រោះដែលបាត់បង់ជីវិតខាងលើឈ្មោះ វិន ថាង ភេទប្រុស អាយុ៣៥ឆ្នាំ រស់នៅចំណុចចំការដំឡូងជាប់ព្រំដែនវៀតណាម ស្ថិតក្នុងភូមិសាទុំ ឃុំជាំក្រវៀន ស្រុកមេមត់ ខេត្តត្បូងឃ្មុំ ។ ក្រៅពីនេះបានរងរបួសធ្ងន់-ស្រាលចំនួន១៧នាក់ ត្រូវបានបញ្ជូនមកសង្គ្រោះនៅមន្ទីរពេទ្យបង្អែកស្រុកមេមត់ នេះជាគ្រោះធម្មជាតិមិនដែលកើតមាននោះទេ នៅតំបន់ចំការដំឡូងរបស់អ្នកភូមិតំបន់ដាច់ស្រយាលនេះ។
បើតាមសមត្ថកិច្ចមូលដ្ឋានបានឲ្យដឹងថា មុនពេលកើតហេតុ ដោយសារតែមេឃក្តៅ គេក៏បានឲ្យត្រាក់ទ័រសណ្ដោងរម៉កដឹកដំឡូងជ្រកក្រោមដើមឈើធំមួយក្នុងដីចំការ ដោយមានកម្មករជាច្រើននាក់បាននាំគ្នាលើកដាក់លើរ៉ឺម៉ក់នោះ ។ បន្ទាប់មកស្រាប់តែមេឃបានបង្អុរធ្លាក់ភ្លៀងចុះ ហើយក៏មានរន្ទះបាញ់ផាំង បណ្តាយអោយបាត់បង់ជីវិត និងរងរបួសមនុស្សជាច្រើននាក់តែម្តង ។
លោកអ៊ូច យឿន មេឃុំជាំគ្រវៀន ប្រាប់ឱ្យដឹងដែរថា មុនពេលមេឃភ្លៀងធ្លាក់មានក្រុមកម្មករប្រុសស្រីជិត២០នាក់នាំគ្នាកាប់គាស់លើកដំឡូងមីក្នុងដីចំការរបស់ឈ្មោះដេត បន្ទាប់មកស្រាប់តែមេឃខ្មៅងងឹត ហើយភ្លៀងបង្អុរធ្លាក់ មិនបានប៉ុន្មានផង ស្រាប់តែមានរន្ទះបាញ់ បណ្ដាលឲ្យបាត់បង់ជីវិតបុរសម្នាក់ជាអ្នកបើកបរត្រាក់ទ័រដឹកដំឡូងមី ខណៈពេលកំពុងរៀបចំលើកដាក់ដំឡូងដែលជ្រកនៅក្រោមដើមឈើធំមួយដើម។ ក្រៅពីបុរសម្នាក់នេះបានបាត់បង់ជីវិតហើយ នៅសល់ចំហាយរន្ទះបាញ់ក៏បានបង្កឲ្យរងរបួសមនុស្សនៅក្បែរនោះចំនួន១៧នាក់ទៀត ក្នុងនោះមានទាំងប្រុស ទាំងស្រី ហើយម្ចាស់ចំការក៏រងរបួសផងដែរ។
ក្រោយពេលកើតហេតុ ជនរងគ្រោះរងគ្រោះទាំងអស់ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកមេមត់ ចំណែកបុរសដែលបាត់បង់ជីវិតដោយសាររន្ទះបាញ់នោះ គឺជាជនជាតិវៀតណាម ហើយក៏ត្រូវបានក្រុមសាច់ញាតិដឹកយកទៅធ្វើបុណ្យនៅប្រទេសវៀតណាមតាមប្រពៃណីផងដែរ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ