ចិត្តរបស់មនុស្សសំខាន់ណាស់សម្រាប់ខ្លួនឯង មានតម្លៃជាទីបំផុត ត្រូវថែទាំឲ្យក្រៃលែង កុំឱ្យលុះទៅក្នុងអំណាចនៃចិត្តទាក់ទាញឱ្យសោះ ។
មនុស្សយើងនឹងទៅជាបុគ្គលយ៉ាងណានោះ គឺស្រេចហើយតែចិត្តរបស់គេនោះឯង ដូចព្រះសិទ្ធត្ថៈ ដែលក្រោយមកបានជាព្រះសម្មាសម្ពុទ្ធ ក៏ព្រោះមកអំពីចិត្តរបស់ព្រះអង្គលុះក្នុងអំណាចនៃសេចក្តីល្អត្រាំជាប់នៅក្នុងសន្តានដែរ ឯពួកជនខ្លះជាមនុស្សធម្មតាទេ តែក្រោយមកបានក្លាយជាព្រះអរហន្តជាទីគោរពបូជានៃមនុស្ស និងទេវតាទាំងឡាយ នេះក៏ព្រោះតែចិត្តរបស់លោកស្អាតប្រាសចាកកិលេសហ្នឹងឯង ។
ចំណែកមនុស្សពួកខ្លះមានមុខមាត់ស្អាតបាត តែជាទីរង្កៀសដល់អ្នកដទៃ នេះក៏ព្រោះចិត្តអាក្រក់ ធ្វើអាក្រក់ និយាយអាក្រក់ ទៅតាមចិត្តដែលអាក្រក់នោះៗ ។
ត្រូវចាំថាបើចិត្តអាក្រក់ហើយ អ្វីៗដទៃទៀតដែលអាក្រក់នឹងតាមមក តែបើចិត្តល្អវិញ សេចក្ដីល្អគ្រប់យ៉ាងនឹងតាមមកក្រោយដែរ ដូចកង់រទេះ វិលតាមស្នាមជើងគោដែលអូសនូវរទេះនោះ ឬក៏ដូចស្រមោលអន្ទោលតាមប្រាណ ដូច្នេះឯង ។ សាន សារិន
ចែករំលែកព័តមាននេះ