អន្តរជាតិ ៖ ស្តេចប្រដាល់ហ្វីលីពីន Manny Pacquiao នឹងត្រូវជួបប្រកួតជាមួយអតីតម្ចាស់ជើងឯកគុនចម្រុះពិភពលោក UFC ប្រភេទទម្ងន់២ផ្សេងគ្នាសញ្ជាតិអៀរឡង់ Conor McGregor នៅឆ្នាំក្រោយ ហើយផ្នែកខ្លះនៃប្រាក់ដែលបានពីការប្រកួតនេះ នឹងត្រូវយកទៅជួយជនរងគ្រោះ ដោយសារផលប៉ះពាល់នៃកូវីដ១៩ នៅប្រទេសខ្លួន។
លោក Jayke Joson ជំនួយការផ្ទាល់របស់ Pacquiao ដែលជាសមាជិកព្រឹទ្ធសភាហ្វីលីពីនផងនោះ បាននិយាយថា «ដើម្បីជាប្រយោជន៍ដល់ប្រជាជនហ្វីលីពីន ដែលរងផលប៉ះពាល់ដោយសារកូវីដ១៩ Manny Pacquiao នឹងត្រូវឡើងសង្វៀនប្រកួតជាមួយ Conor McGregor នៅឆ្នាំក្រោយ»។
«មេធាវីភាគីទាំង២កំពុងធ្វើការងារ ដើម្បីបញ្ចប់រាល់ព័ត៌មានសម្ងាត់ទាំងអស់។ ខណៈដែលកីឡាករទាំង២ សុទ្ធតែបានត្រៀមខ្លួនរួចរាល់ សម្រាប់ការប្រកួតដ៏អស្ចារ្យមួយនេះ»។
ទោះយ៉ាងមិនទាន់មានការប្រកាស កាលបរិច្ឆេទផ្លូវការណាមួយនៅឡើយទេ ប៉ុន្តែលោក Joson បានបន្ថែមថា ដោយសារតែការរីករាលដាលនៃកូវីដ១៩ ការប្រកួតរវាងអ្នកទាំង២ អាចនឹងត្រូវធ្វើឡើងនៅតំបន់មជ្ឈឹមបូព៌ា និងដើម្បីឆ្លើយតបទៅនឹងការបង្ហោះសារលើ Twitter របស់ McGregor កាលពីថ្ងៃទី២៦ ខែកញ្ញាកន្លងទៅ។
សូមរំលឹកថា McGregor ទើបតែបានប្រកាសចូលនិវត្តន៍ពីអាជីពកីឡាក្បាច់គុនចម្រុះរបស់ខ្លួនជាលើកទី៣ នៅលើបណ្តាញសង្គម Twitter កាលពីខែមិថុនាកន្លងទៅ។ ខណៈដែលគ្រូបង្វឹកផ្ទាល់របស់ Pacquiao ក៏ធ្លាប់បានបញ្ជាក់ថា បុរសហ្វីលីពិនរូបនេះ ចង់ធ្វើការប្រកួតមួយ ឬពីរលើកចុងក្រោយ មុនបញ្ចប់អាជីពជាផ្លូវការ ដើម្បីឈានជើងប្រឡុកឆាកនយោបាយក្នុងប្រទេសរបស់ខ្លួន៕ (ដកស្រង់ចេញពី Aljazeera)
ចែករំលែកព័តមាននេះ