ខេត្តកំពង់ស្ពឺ ៖ បើធ្វើដំណើរចេញតាមបណ្តោយផ្លូវជាតិលេខ៤ ទៅដល់ផ្សារថ្នល់ទទឹងមានផ្លូវបំបែកបត់ឆ្វេងតាមបណ្តោយផ្លូវលេខ៤១ ប្រមាណជាង៣០ម៉ែត្រ នឹងឃើញខ្លោងទ្វារវត្តមួយឈ្មោះ«វត្តឧត្តុង្គមានជ័យ» (ហៅវត្តបាក់ក) ស្ថិតក្នុងភូមិបាក់ក ឃុំព្រៃញាតិ ស្រុកគងពិសី ខេត្តកំពង់ស្ពឺ ។
ប្រវត្តិឈ្មោះវត្តបាក់កនោះ ព្រះតេជគុណប៊ិន សារីម ព្រះគ្រូចៅអធិការវត្តបានឱ្យដឹងកាលពីពេល ថ្មីៗនេះថា កាលពីអំឡុងខ្មែរ និងសៀមមានចម្បាំងជាមួយគ្នា ក្សត្រមួយអង្គ(មិនចាំព្រះនាម)បានលើករេហ៍ពលទៅតាំងបន្ទាយនៅស្រុកគងពិសី ដើម្បីច្បាំងតទល់ជាមួយទ័ពសៀមដែលចង់បានទឹកដីខ្មែរ ។ ពេលនោះការច្បាំងគ្នាធ្វើឱ្យទ័ពសៀមរត់ខ្ចាត់ខ្ចាយទៅ នៅសល់តែមេទ័ព និងស្តេចសៀមជិះនៅលើដំរីមួួយក្បាល ។ កាលបើមនុស្សច្បាំងគ្នាហើយសត្វដំរីរបស់ព្រះចៅខ្មែរ ក៏មិនព្រងើយកន្តើយដែរ បានជល់គ្នាជាមួយដំរីស្តេចសៀម ខណៈដែលស្តេចទាំងពីរអង្គនៅលើខ្នងដំរីនៅឡើយ ។ ព្រះចៅក្រុងខ្មែរមានឱកាសកាប់ត្រូវស្តេចសៀមមួយលំពែងចំដើមទ្រូងធ្លាក់ពីលើខ្នងដំរីសុគតបាត់ទៅ ។
និយាយពីព្រះចៅខ្មែរកាលបើស្តេចសៀមសុគតហើយ ព្រះអង្គក៏យាងចុះពីលើខ្នងដំរី ពេលនោះហើយដែលដំរីរបស់ស្តេចខ្មែរ និងដំរីស្តេចសៀមចាប់ផ្តើមជល់គ្នាជាថ្មីម្តងទៀត ។ ដំបូងឡើយមិនទាន់ដឹងឈ្នះចាញ់ទេ លុះជល់គ្នា យូរៗទៅ ដំរីស្តេចសៀមថមថយកម្លាំងក៏រត់ដល់ទីទួលមួយដែលជាកន្លែងរបស់ស្តេចខ្មែរ និងកងទ័ពរស់នៅ(វត្តបាក់កបច្ចុប្បន្ន) ពេលនោះដំរីស្តេចខ្មែរក៏ដេញតាមជល់ដំរីស្តេចសៀមបណ្តាលឱ្យមានរបួសសុសពេញខ្លួន ។ ការជល់គ្នាបានបន្តម្តងទៀត មិនយូរប៉ុន្មានដំរីព្រះចៅខ្មែរបានជល់ដំរីរបស់ស្តេចសៀមរហូតបាក់កងាប់នៅនឹងកន្លែង ។
ព្រះតេជគុណប៊ិន សារីម បន្តថា ក្រោយស្រុកទេសចប់សង្គ្រាម កន្លែងដែលដំរីជល់គ្នាកាក់ក ក៏ក្លាយទៅជាទីអារាមដែលពុទ្ធបរិស័ទ និងបណ្តាប្រជានុរាស្ត្រគោរពបូជាមកដល់សព្វថ្ងៃ ។ ទីនោះអ្នកស្រុកដាក់ឈ្មោះថា «វត្តដំរីបាក់ក» តែក្នុងភាសាផ្លូវការ គឺ «វត្តឧត្តុង្គមានជ័យ» ។
ក្រោយៗមកវត្តដំរីបាក់កអ្នកស្រុកចេះតែនាំគ្នាហៅថា «វត្តបាក់ក»មកដល់បច្ចុប្បន្ន ។
ក្រោមការដឹកនាំរបស់ព្រះគ្រូចៅអធិការវត្តបាក់ក មានព្រះវិហារដ៏ស្រស់ស្អាត មានសាលាបាលីរង និងសាលាឆាន់ មានស្រះទឹក ព្រមទាំងសមិទ្ធផលជាច្រើនទៀតដែលកើតឡើងតាំងពីសម័យព្រះគ្រូចៅអធិការ មុនៗ ។
ព្រះគ្រូចៅអធិការវត្តបាក់កមានសង្ឃដីកាថា ដោយមានការឯកភាពគ្នាជាឯកច្ឆន្ទ ព្រះអង្គបានជួលជាងធ្វើរូបដំរីជល់គ្នាមួយគូនៅក្បែរទីតាំងចាស់ មានតម្លៃ៣.២០០ដុល្លារ ហើយពេលនេះព្រះអង្គមានប្រាក់១០០០ដុល្លារហើយ នៅខ្វះ២២០០ដុល្លារទៀត ។
ដូច្នេះព្រះចៅអធិការអំពាវនាវរកការចូលរួមតាមសទ្ធាពីពុទ្ធបរិស័ទជិតឆ្ងាយ ។ គោលបំណងដែលព្រះអង្គធ្វើរូបដំរីជល់គ្នានេះគឺឱ្យសមទៅនឹងប្រវត្តិពីដើមរបស់វត្ត ។
ព្រះចៅអធិការបញ្ជាក់ថា ប្រវត្តិដំរីបាក់កនេះ គឺព្រះអង្គបានដឹងតាំងពីព្រះអង្គនៅក្មេងម្ល៉េះ គឺជីតាទួតរបស់ព្រះអង្គនិទានឱ្យស្តាប់ ៕
ចែករំលែកព័តមាននេះ