រាជធានីភ្នំពេញ ៖ រថយន្តម៉ាសឺដេសស៊េរីទំនើបមួយគ្រឿងបើកបរដោយជនជាតិចិនជ្រុលទៅបុកនឹង រថយន្តស៊េរីទំនើបម៉ាក អូឌី ដែលចតលើចិញ្ចើម បណ្ដាលឲ្យរថយន្ត អូឌី ជ្រុលទៅបុកខឿនមុខហាងមួយកន្លែងរងការខូចខាតយ៉ាងដំណំ។ ហេតុការណ៍នេះដែរបានកើតឡើងនៅវេលាម៉ោង១២ និង៤០នាទី រំលងអធ្រាត្រឈានចូលថ្ងៃទី២៥ ខែកញ្ញា ឆ្នាំ២០២០ ជិតនឹងភោជនីយដ្ឋាន ACE ផ្លូវក្រោយផ្សារទំនើប អ៊ីអន សង្កាត់ទន្លេបាសាក់ ខណ្ឌចំការមន។
តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញជនជាតិចិនមួយក្រុម មានស្រីមានប្រុស បានបើករថយន្តម៉ាក ម៉ាសឺដេស 4MATIC ពណ៌ស ពាក់ស្លាកលេខ ភ្នំពេញ 2W-6623 ធ្វើដំណើរតាមបណ្ដោយផ្លូវក្រោយផ្សារទំនើបអ៊ីអនក្នុងទិសដៅពីត្បូងទៅជើង ក្នុងល្បឿនលឿន ដោយសង្ស័យថាអ្នកបើកបរស្រវឹង លុះមកដល់ចំណុចកើតហេតុក៏រេចង្កូតទៅខាងស្ដាំជ្រុលទៅបុកគូទរថយន្តស៊េរីទំនើប ម៉ាកអូឌី ពណ៌ស ពាក់ស្លាកលេខ ភ្នំពេញ 2R -011 ដែលចតលើចិញ្ចើម រុញផ្ទប់នឹងខឿនថ្ម មុខហាងមួយកន្លែងបណ្តាលឲ្យរងការខូចខាតក្រពឹតផ្នែកខាងមុខចំហៀងខាងស្ដាំ និងគូទក្រោយ។
ដោយឡែករថយន្តបង្កម៉ាសឺដេស វិញ រងការខូចខាតក្រពឹតផ្នែកខាងមុខចំហៀងខាងស្ដាំ តែមិនបង្កឲ្យមានគ្រោះថ្នាក់ដល់មនុស្សនោះទេ។ ភ្លាមៗនោះដែលភាគីខាងរថយន្តជនជាតិចិន និងគ្នីគ្នាមករំដោះទៅម្ដងមួយៗបាត់អស់ ដោយឲ្យតំណាងមកសម្របសម្រួលជាមួយនឹងរថយន្តរងគ្រោះផងដែរ។ ក្នុងហេតុការណ៍នេះដែរ ភាគីខាងរថយន្តជនជាតិចិនបានយល់ព្រមសងសំណងទៅខាងរថយន្ត អូឌី ចំនួន៣០០០ដុល្លារ ហើយនៅពេលដែលកំពុងរាប់លុយសងក៏ស្រាប់តែមានអ្នកទី២ ចេញមកឆក់យកលុយទៅវិញមិនព្រមសងវិញ ទើបបង្កការភ្ញាក់ផ្អើលដល់សមត្ថកិច្ចមូលដ្ឋាន ក៏ដូចជាជំនាញចុះទៅវាស់វែងផងដែរ។
ក្រោយពេលកើតហេតុ រថយន្ដទាំង២គ្រឿង ត្រូវបានសមត្ថកិច្ចជំនាញចរាចរណ៍ក្រុងចុះទៅវាស់វែងយកទៅរក្សាទុកនៅការិយាល័យនគរបាលចរាចរណ៍ជើងគោករាជធានីភ្នំពេញ រង់ចាំធ្វើការដោះស្រាយនៅពេលក្រោយជាបន្តទៀត៕ ដោយ ៖ យឹម ឈឿន
ចែករំលែកព័តមាននេះ