ខេត្តព្រះសីហនុ ៖ រសៀលថ្ងៃទី២៤ ខែកញ្ញា ឆ្នាំ២០២០ កម្លាំងកងរាជអាវុធហត្ថខេត្ត បានធ្វើការបង្ក្រាបករណីចាប់ជំរិតជនជាតិចិនដូចគ្នា ដោយឃាត់ខ្លួនជនសង្ស័យចំនួន២នាក់ និងរំដោះជនរងគ្រោះបានម្នាក់ នៅកាស៊ីណូខ្សាច់មាសអន្តរជាតិ ស្ថិតក្នុងភូមិ៤ សង្កាត់លេខ៤ ក្រុងព្រះសីហនុ ។
លោកឧត្តមសេនីយ៍ត្រី ហេង ប៊ុនទី មេបញ្ជាការអាវុធហត្ថខេត្ត ថ្លែងថា ការបង្ក្រាបនេះធ្វើឡើងក្រោមការបញ្ជាផ្ទាល់ពីនាយឧត្តមសេនីយ៍សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងឯកឧត្តម គួច ចំរើន អភិបាលខេត្ត និងជាប្រធានគណៈបញ្ជាការឯកភាពខេត្ត ក្រោមការសម្របសម្រួលពីព្រះរាជអាជ្ញាអមសាលាដំបូងខេត្ត ឯកឧត្តម សៀង សុខ ។
ជនសង្ស័យទាំង២នាក់ដែលត្រូវបានចាប់ខ្លួននេះ ម្នាក់ឈ្មោះ Waing Ai Ming ភេទប្រុស អាយុ៤៨ឆ្នាំ ជនជាតិចិន និងជាបុគ្គលិកផ្នែកទីផ្សារក្រុមហ៊ុនអ៊ីនធើរណេត ស្នាក់នៅភូមិ៣
សង្កាត់លេខ៤ ក្រុងព្រះសីហនុ និងម្នាក់ទៀតឈ្មោះ ទូច សំណាង ភេទប្រុស អាយុ៣៩ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅភូមិ៤ សង្កាត់លេខ៤ ក្រុងព្រះសីហនុ ។
ដោយឡែក ជនរងគ្រោះឈ្មោះ Cai Changchun ភេទប្រុស អាយុ៣០ឆ្នាំ ជនជាតិចិនជាបុគ្គលិកកាស៊ីណូ ស្នាក់នៅភូមិ១ សង្កាត់លេខ១ ក្រុងព្រះសីហនុ ។
លោកឧត្តមសេនីយ៍ត្រី ហេង ប៊ុនទី បានឲ្យដឹងទៀតថា ជាមួយនឹងការបង្ក្រាបនេះ កម្លាំងកងរាជអាវុធហត្ថក៏បានដកហូត ទូរស័ព្ទដៃ៤គ្រឿង ប័ណ្ណបើកបររថយន្ត១សន្លឹក អត្តសញ្ញាណ
ប័ណ្ណសញ្ជាតិខ្មែរ១សន្លឹក កាតផ្សេងៗ១៤សន្លឹក ប្រាក់៦ដុល្លារនិង១៥.០០០រៀល កាបូបលុយមនុស្សប្រុសចំនួន១៧ និងរថយន្ត១គ្រឿង ម៉ាក ឡិចស៊ីស RX ៣៣០ ពណ៌ទឹកមាស ពាក់ផ្លាកលេខ ភ្នំពេញ ២P-៣៩៣៦ ។
ពាក់ព័ន្ធនឹងករណីចាប់ឃុំឃាំងនិងបង្ខាំងមនុស្ស នៅកាស៊ីណូខ្សាច់មាសអន្តជាតិនេះ ជន
សង្ស័យត្រូវបានសមត្ថកិច្ចសាកសួរតាមនីតិវិធី ៕
ចែករំលែកព័តមាននេះ