លោកមហាសេដ្ឋី ប៊ីល ហ្គេតស៍ (Bill Gates) ដែលជាសហស្ថាបនិកក្រុមហ៊ុន Microsoft ធ្លាប់ជាមនុស្សដែលមិនពូកែនិយាយ និងចូលមិនចុះក្នុងសង្គម។ កាលពីឆ្នាំមុន លោកបានទទួលស្គាល់ដែរថា ប្រសិនបើលោកអាចត្រលប់ទៅអតីតកាលវិញ លោកនឹងពង្រឹងការយល់ដឹងពីខ្លួនឯង និងជំនាញក្នុងការទាក់ទងជាមួយអ្នកដទៃ។
ភាពឆ្លាតវៃផ្នែកសតិអារម្មណ៍ និងចេះយល់ពីអ្នកដទៃគឺជាគុណសម្បត្តិរបស់អ្នកដឹកនាំក្រុមហ៊ុនបច្ចេកវិទ្យាធំៗជាច្រើន។ ខាងក្រោមគឺជាវិធីដែលអ្នកអាចពង្រឹងចំណុចទាំងពីរខាងលើបាន៖
១. ទទួលយកសារៈសំខាន់នៃការកសាងទំនាក់ទំនង
អ្នកដឹកនាំមួយចំនួនទម្លាប់ខ្លួននឹងការដោះស្រាយបញ្ហាឡូហ្សីក និងចំណោទគណិតវិទ្យាផ្សេងៗ។ ប៉ុន្តែអ្នកដឹកនាំត្រូវតែរៀនកសាងទំនាក់ទំនងជាមួយអ្នកដទៃដែរ។ ជាដំបូង ការរៀនសូត្រពីមនុស្សម្នាក់ និងព្យាយាមធ្វើឲ្យខ្លួនចាប់អារម្មណ៍នឹងមនុស្សម្នាក់គឺជាជំហានល្អមួយក្នុងការកសាងទំនាក់ទំនងជាមួយអ្នកដទៃ។
២. ចាត់ទុកអ្នកដទៃជាមិត្ត
អ្នកដឹកនាំភាគច្រើនមានតួនាទីក្នុងការលក់ផលិតផល សេវាកម្ម ឬឈ្មោះក្រុមហ៊ុនទៅកាន់អតិថិជន។ ដើម្បីទទួលបានជំនឿទុកចិត្តពីអតិថិជនរបស់អ្នកបាន អ្នកគួរតែចាត់ទុកពួកគេដូចជាមិត្ត ឬបងប្អូនរបស់អ្នក។ អ្នកគួរតែចាត់ទុកខ្លួនជាអ្នកណែនាំដែលគួរឲ្យជឿជាក់ និងព្យាយាមគោរពតាមពាក្យសន្យាដែលបានប្រាប់ទៅអ្នកដទៃជានិច្ច។
៣. កុំចាត់ទុកទំនាក់ទំនងជាការដោះដូរ
ពេលខ្លះ ការកសាងទំនាក់ទំនងជាមួយមនុស្សម្នាក់មិនចាំបាច់នាំយកអត្ថប្រយោជន៍មកឲ្យអ្នកវិញទេ។ វាមិនជាបញ្ហាឡើយក្នុងការចេញទៅផឹកកាហ្វេ ឬស្រាបៀជាមួយមនុស្សម្នាក់ដែលមិនបានជួយរកលុយឲ្យក្រិមហ៊ុនអ្នក។ ការបង្ហាញនូវចំណុចនេះភាគច្រើនអាចធ្វើឲ្យភាគីម្ខាងទៀតងាយនឹងចូលចិត្តអ្នក។
៤. បង្ហាញភាពលេចធ្លោក្នុងពេលដែលមានបញ្ហា
ជីវិតមិនតែងតែល្អជានិច្ចកាលទេ។ បញ្ហាផ្សេងៗតែងតែកើតមានឡើងនិងរាំងស្ទះការងារ ឬអាជីវកម្មរបស់អ្នក។ ប៉ុន្តែអ្នកមិនត្រូវចុះចាញ់ទេ អ្នកត្រូវតែហ៊ានប្រឈមមុខនិងក្រោកឈរឡើងវិញដើម្បីដោះស្រាយ។ វាជាឱកាសមួយក្នុងការធ្វើឲ្យអតិថិជន ឬមិត្តរួមការងារដទៃភ្ញាក់ផ្អើលនិងគោរពអ្នក ៕
ចែករំលែកព័តមាននេះ