រាជធានីភ្នំពេញ ៖ បុរសម្នាក់បើករថយន្តទាំងខ្លួនមានជាតិស្រវឹងក្នុងខ្លួនងោកមួយភាំងបានរេចង្កូតមកខាងឆ្វេងឡើងលើខឿនទៅបុករបងសំណាញ់លួសហ្ការ៉ាសលក់រថយន្តមួយកន្លែងបណ្តាលឲ្យដួលរំលំសង្កត់លើរថយន្ដ ឡង់គ្រីស័រ មួយគ្រឿង បណ្តាលឲ្យរងការខូចខាតតិចតួចមួយកំណាត់មុខ។ ដែលហេតុការណ៍នេះបង្កការភ្ញាក់ផ្អើលកាលពីវេលាម៉ោង៣រំលងអាធ្រាត្រ ថ្ងៃទី២៤ ខែកញ្ញា ឆ្នាំ២០២០ នៅតាមបណ្ដោយផ្លូវលេខ២៧១ ទល់មុខមន្ទីរពេទ្យព្រះកុសុមៈសង្កាត់ទឹកថ្លា ខណ្ឌសែនសុខ។
យោងតាមប្រភពត៌មានពីកន្លែងកើតហេតុបានប្រាប់ឲ្យដឹងថា មុនកើតហេតុ គឺពួកគាត់បានឃើញរថយន្តបង្កម៉ាក ហាយឡាក់វីហ្គោ ពណ៌ទឹកប្រាក់ ពាក់ស្លាកលេខ ភ្នំពេញ 2AA-4995 បើកបរដោយបុរសម្នាក់ធ្វើដំណើរតាមបណ្ដោយផ្លូវលេខ២៧១ ទិសដៅពីត្បូងទៅជើង ក្នុងល្បឿនលឿន ដោយអ្នកបើកបរស្រវឹងទំនងជាងងុយគេង ហើយងោកមួយភាំងបានរេចង្កូតទៅខាងឆ្វេងប៉ះនិងរបាំងថ្មពុះចែកទ្រូងផ្លូវបណ្តាលឲ្យវៀចខូចខាតទ្រង់ទ្រាយដើមតិចតួច ហើយរថយន្តបង្កក៏បន្តជ្រុលទៅមុខទៀតទាំងរថយន្តបញ្ច្រាសទិសទិសដៅចរាចរណ៍ជ្រុលឡើងលើខឿនផ្លូវទៅបុកនឹងរបងសំណាញ់លួសរបស់ហ្ការ៉ាសលក់រថយន្ត យីហោ TH AUTO បណ្ដាលឲ្យដួលរំលំសង្កាត់លើរថយន្ដដាក់លក់មួយគ្រឿងម៉ាក ឡង់គ្រីស័រ ស៊េរីឆ្នាំ២០២០ មួយគ្រឿងបណ្ដាលឲ្យរងការខូចខាតតិចតួច ចំណែករថយន្តបង្ករងការខូចខាតមួយកំណាត់មុខយ៉ាងដំណំ តែមិនបណ្ដាលឲ្យនណារម្នាក់រងរបួសឡើយនៅក្នុងហេតុការណ៍នោះ។
ចំណែកអ្នកបើកបររថយន្ដបង្កវិញបានប្រាប់ឲ្យដឹងថា គាត់មិនបានបើករបាំងថ្មពុះចែកទ្រូងផ្លូវឡើយ គឺរូបគាត់ជូនមិត្តភក្ដិមកផ្ទះនៅជិតកន្លែងកើត ហើយបើករថយន្តទាំង
បញ្ច្រាសទិសដៅងោកមួយភាំងក៏រេចង្កូតទៅបុករបងហ្ការ៉ាសលក់រថយន្តនោះតែម្តង។ ក្រោយកើតហេតុភាគីរថយន្តបង្ក និងម្ចាស់រថយន្តបានចរចាគ្នាបញ្ចប់រឿងនៅកន្លែងកើតហេតុ ដោយម្ចាស់រថយន្តរងគ្រោះទាមទារសំណងចំនួន១៥០០ដុល្លារដើម្បីជួសជុលរថយន្ត និងរបងឡើងវិញ។
ចំណែករថយន្តបង្កត្រូវសមត្ថកិច្ចវាស់វែងយកទៅរក្សាទុកបណ្ដោះអាសន្ននៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយគ្នានៅពេលក្រោយ ព្រោះរថយន្ដបង្កបើកបុកនឹងរបាំងថ្មពុះចែកទ្រូងផ្លូវ ដែលជាទ្រព្យសម្បត្តិរបស់រដ្ឋបណ្តាលឲ្យរងការខូចខាត៕ ដោយ ៖ យឹម ឈឿន
ចែករំលែកព័តមាននេះ