ខេត្តឈៀងម៉ៃ,ថៃ ៖ នៅម៉ោង៧យប់ថ្ងៃទី២៣ ខែកញ្ញា ឆ្នាំ២០២០ កម្លាំងប៉ូលីសថៃ នៃស្នងការដ្ឋាននគរបាល ស្រុកដយសាកេត ក្នុងខេត្តឈៀងម៉ៃ បានឃាត់ខ្លួនបុរសម្នាក់ ករណីសម្លាប់កូនស្រីទី៣ របស់ខ្លួន ដែលទារិកាមានអាយុទើបបាន០៦ថ្ងៃ ដោយឪពុកចិត្តឃោរឃៅរូបនេះ បានចាក់សាប៊ូលាងបង្គន់ ចូលពេញមាត់ រួចយកទៅកប់ដីក្នុងព្រៃ ។
ជនសង្ស័យជាឪពុកមានឈ្មោះ Anupap Jo Panya អាយុ៤៥ឆ្នាំ ជាជនជាតិភាគតិច ក្នុងកុលសម្ព័ន្ធភ្នំលីយូ ដែលជាម្ចាស់អាជីវកម្ម ហាងលក់វត្ថុអនុស្សាវរីយ៍មួយមានទីតាំងនៅខាងក្រោយផ្សារ Thanin ។
បន្ទាប់ពីឃាត់ខ្លួន នាយប់ថ្ងៃដដែលនោះ កម្លាំងប៉ូលិសបាននាំខ្លួនជនសង្ស័យទៅចង្អុលបង្ហាញពីចំណុចដែលបញ្ចុះសព ដើម្បីជីករកសពកូនស្រីមកវិញ ដែលឪពុករូបនេះបានយកកប់នៅក្នុងព្រៃ នៅខាងក្រោយភូមិម៉ៃសានខុង ក្នុងស្រុកដយសាកេត ខេត្ដឈៀងម៉ៃ ។ បន្ទាប់ពីជីករកឃើញទារិកា រុំដោយកន្ទបពណ៌ស មន្ត្រីជំនាញក៏បានយកចេញពីរណ្តៅ ។
បើតាមរបាយការណ៍របស់ប៉ូលិសថៃ អោយដឹងថា ជនសង្ស័យឈ្មោះ Anupap បានសារភាពថា រូបគាត់ពិតជាបានសម្លាប់កូនស្រីដោយផ្ទាល់ដៃ ប្រាកដមែន មូលហេតុគឺដោយសារតែគាត់បានបើកហាងលក់វត្ថុអនុស្សាវរីយ៍ជាមួយប្រពន្ធ ហើយគាត់មានកូនស្រី២នាក់ហើយ ដូច្នេះគាត់ចង់បានកូនប្រុសម្នាក់ទៀត ។ ទើបរូបគាត់ទៅរកគ្រូពេទ្យដើម្បីពិភាក្សា ព្រោះគាត់ចង់បានកូនប្រុសម្នាក់ ដើម្បីកាន់កាប់ហាងនោះ ។ ប៉ុន្តែប្រពន្ធបានពពោះមុន ហើយប្រពន្ធខកខានមិនបានទៅពិនិត្យ រហូតដល់សម្រាលបានកូនស្រីនេះ នៅមន្ទីរពេទ្យមួយ បាន៦ថ្ងៃ គាត់ត្រឡប់មកផ្ទះវិញ បង្កភាពតានតឹងជាមួយប្រពន្ធ ។ ដូច្នេះហើយ នៅព្រឹកថ្ងៃទី២៣ រូបគាត់បាននាំកូនស្រី ឡើងរថយន្តដែលចតនៅមុខផ្ទះ ដឹកទៅក្នុងព្រៃ នៅខាងក្រោយភូមិម៉ៃសានខុង មុនពេលប្រើទឹកសាប៊ូសម្អាតបង្គន់ ចាក់ចូលពេញមាត់កូនស្រី ។
របាយការណ៍ដដែល អោយដឹងបន្តទៀតថា ក្រោយបាត់កូនស្រីភ្លាមៗ ប្រពន្ធរបស់ជនជាប់ចោទ បានសង្ស័យទៅលើប្តីខ្លួនឯងជាអ្នកនាំកូនស្រីយកទៅ ហើយល្ងាចថ្ងៃទី២៣ គាត់បានរាយការណ៍ទៅមន្ត្រីប៉ូលិស នៃប៉ុស្តិ៍នគរបាលស្រុកមឿង ខេត្តឈៀងម៉ៃ ។ រហូតដល់ លោកវរសេនីយ៍ទោ Greiangsak Kruathong អធិការរង បាននាំខ្លួនជនជាប់ចោទមកធ្វើការសាកសួរ ។ បន្ទាប់មក ជនជាប់ចោទជាឪពុករូបនេះ ក៏បានសារភាព នៅចំពោះមុខប៉ូលិស ។ មន្ត្រីប៉ូលីសបានឃាត់ខ្លួន ដោយចោទប្រកាន់ពីបទ ឃាតកម្មដោយចេតនា ។
បន្ទាប់ពីជីកយកចេញពីរណ្តៅ សពទារិកាត្រូវបញ្ជូនទៅមន្ទីរពេទ្យ Maharaj Nakorn Chiang Mai ដើម្បីធ្វើកោសល្យវិច័យបន្ថែមទៀត ។ បច្ចុប្បន្ន ឪពុកចិត្តឃោរឃៅ ត្រូវឃុំខ្លួន ដើម្បីបន្តនីតិវិធីច្បាប់ ៕
ចែករំលែកព័តមាននេះ