ចិន ៖ លោកយាយ Chen Jifang កំពុងទទួលបានការចាប់អារម្មណ៍យ៉ាងខ្លាំង ពីសំណាក់ប្រជាជនចិននៅលើប្រព័ន្ធផ្សព្វផ្សាយ និងបណ្តាញសង្គម អំពីរបៀបហាត់ប្រាណសម្រកទម្ងន់នៅក្នុងគោលគំនិត «អាយុគ្រាន់តែជាតួលេខ»។
លោកយាយ Jifang ដែលបច្ចុប្បន្នមានវ័យ៦៨ឆ្នាំ បានបញ្ជាក់ថា លោកយាយដើរហាត់ប្រាណយ៉ាងហោចណាស់២ម៉ោងក្នុងមួយថ្ងៃ រួមជាមួយលំហាត់ប្រាណរាងកាយដ៍ត្រឹមត្រូវ។
ទោះស្ថិតក្នុងវ័យក្បែរ៧០ឆ្នាំ លោកយាយកំពុងចូលរួមយ៉ាងសកម្ម ក្នុងការផ្តល់បទពិសោធន៍ដល់ប្រជាជនចិន អំពីការហាត់ប្រាណ ដើម្បីឱ្យមានសុខភាពល្អ និងការរក្សាទម្ងន់ឱ្យបានត្រឹមត្រូវស្ថិតក្នុងវ័យចំណាស់។
លោកយាយ Jifang ដែលរស់នៅក្នុងទីក្រុងសៀងហៃ បច្ចុប្បន្នកំពុងក្លាយជាតារាដ៏ល្បីឈ្មោះ នៅប៉ុន្មានខែថ្មីៗនេះ ដោយមានអ្នកគាំទ្រលើបណ្តាញសង្គមយ៉ាងច្រើន និងបានផ្តល់ជូនអ្នកគាំទ្រចំនួន៤១ម៉ឺននាក់នៅលើ TikTok ជាមួយនឹងទម្លាប់នៃការធ្វើលំហាត់ប្រាណដ៏គួរឱ្យចាប់អារម្មណ៍ និងការលើកទឹកចិត្តឱ្យអ្នកដទៃធ្វើតាមគំរូរបស់លោកយាយ ដែលមានអ្នកចូលទស្សនាច្រើនជាង១លានដងក្នុងការបង្ហោះមួយលើក។
សូមបញ្ជាក់ថា លោកយាយបានចាប់ផ្តើមហាត់ប្រាណនៅថ្ងៃទី ២៩ ខែ ធ្នូ ឆ្នាំ ២០១៨ ដោយព្យាយាមហ្វឹកហាត់សម្រកទម្ងន់បាន១៤គីឡូក្រាមក្នុងរយៈពេល៣ខែ។ ហើយសព្វថ្ងៃ លោកយាយកំពុងបន្តហ្វឹកហាត់ប្រភេទយកក្បាលពោះរាបស្មើ និងសាច់ដុំ (Toned Muscles) ដែលមនុស្សវ័យក្មេងចង់បាន។ លោកយាយបានមានប្រសាសន៍នៅឯកន្លែងហាត់ប្រាណមួយ នៅជាយក្រុងសៀងហៃថា «ខ្ញុំនឹងបន្តហាត់ប្រាណរហូតដរាបណាខ្ញុំនៅមានជីវិត»៕
ចែករំលែកព័តមាននេះ