ទីផ្សារការងារនាពេលបច្ចុប្បន្ននេះបានផ្លាស់ប្តូរច្រើនណាស់បើធៀបនឹងដើមឆ្នាំ ២០២០ កន្លងមកនេះ។ ប៉ុន្តែស្ថាប័នការងារផ្សេងៗនៅតែកំពុងរកបុគ្គលិកថ្មីជានិច្ច ខណៈដែលស្ថាប័នខ្លះទៀតថែមទាំងងាកមកធ្វើការសម្ភាសន៍អនឡាញថែមទៀតផង។
ប្រសិនបើអ្នកទទួលបានឱកាសក្នុងការចូលសម្ភាសន៍អនឡាញជាមួយស្ថាប័នការងារណាមួយនោះ អ្នកគួរតែពិចារណាមើលគន្លឹះខាងក្រោមនេះជាមុនសិន៖
១. អ្វីដែលអ្នកត្រូវធ្វើមុនពេលសម្ភាសន៍
ជាដំបូងអ្នកត្រូវតែត្រៀមខ្លួនឲ្យបានរួចរាល់មុនពេលសម្ភាសន៍។ អ្នកគួរតែធ្វើការស្រាវជ្រាវលើស្ថាប័នការងារ និងការងារដែលអ្នកកំពុងដាក់ពាក្យ។ បន្ទាប់មកអ្នកត្រូវតេកត់ត្រាទុកនូវទំនួលខុសត្រូវសំខាន់ៗចំនួនពីរ ឬបីក្នុងការងារនោះនិងត្រៀមខ្លួនក្នុងការតភ្ជាប់វាជាមួយនឹងបទពិសោធន៍ដែលអ្នកមាន និងការដែលវាអាចជួយឲ្យអ្នកជោគជ័យក្នុងការងារថ្មីបាន។
ប្រសិនបើអ្នកមិនធ្លាប់ចូលរួមការសម្ភាសន៍អនឡាញពីមុនមកទេ អ្នកគួរតែរៀនពីកម្មវិធីដែលតម្រូវឲ្យប្រើជាមុនសិនមុនពេលសម្ភាសន៏ និងធានាថាសម្លេងរបស់អ្នកអាចលឺច្បាស់ល្អផងដែរ។
២. អ្វីដែលអ្នកត្រូវធ្វើក្នុងកំឡុងពេលសម្ភាសន៍
បន្ទាប់ពីអ្នកជ្រើសរើសបានសម្លៀកបំពាក់ដែលសមរម្យសម្រាប់ការសម្ភាសន៍ហើយ អ្នកគួរតែចូលទៅកម្មវិធីនោះឲ្យបានមុនពេលសម្ភាសន៍ប៉ុន្មាននាទី។ អ្នកត្រូវតែរៀបការអង្គុយរបស់អ្នកឲ្យបានល្អផងដែរ និងជៀសវាងការឱនចុះទៅមើលស្គ្រីនកុំព្យូទ័ររបស់អ្នកខ្លាំងពេក។ អ្នកត្រូវតែហ្វឹកហាត់រក្សាខ្សែភ្នែកជាមួយអ្នកអ្នកសម្ភាសន៍របស់អ្នកផងដែរដើម្បីបង្ហាញនូវជំនឿចិត្ត។
៣. អ្វីដែលអ្នកត្រូវធ្វើក្រោយពីការសម្ភាសន៍
មុនពេលបញ្ចប់ការសម្ភាសន៍ អ្នកគួរតែសួរនូវសំណួរដ៏ល្អមួយដែលធ្វើឲ្យអ្នកសម្ភាសន៍របស់អ្នកចងចាំអ្នក។ សំណួរនោះអាចទាក់ទងនឹងក្រុមហ៊ុន ការងារ ឬអ្នកជ្រើសរើសជាដើម។ វាបង្ហាញថាអ្នកពិតជាចាប់អារម្មណ៍នឹងការងារនេះ ។ ជាមួយគ្នានេះផងដែរ អ្នកគួរតែផ្ញើជាអ៊ីមែលថ្លែងអំណរគុណទៅអ្នកសម្ភាសន៍របស់អ្នក។ ប្រសិនបើអ្នកមានសំណួរបន្ថែមទៀត អ្នកអាចចោតជាសំណួរទៅកាន់ពួកគេបានផងដែរ ៕
ចែករំលែកព័តមាននេះ