រាជធានីភ្នំពេញ ៖ នៅក្នុងឆ្នាំ២០២៣ កម្ពុជានឹងរៀបចំការប្រកួតស៊ីហ្គេមក្នុងនាមជាម្ចាស់ផ្ទះលើកដំបូង ។ នៅក្នុងការប្រកួតនោះ មានទីតាំងតែ៣ប៉ុណ្ណោះដែលត្រូវរៀបចំធ្វើជាទីលាន ខណៈទីលានទាំង៣នោះហោចណាស់ក៏ស្រូបទាញអ្នកទេសចរ និងអ្នកគាំទ្រការប្រកួតរហូតរាប់សែននាក់ផងដែរ បើទោះជាក្នុងពេលនេះ…
រាជធានីភ្នំពេញ ៖ នៅក្នុងឆ្នាំ២០២៣ កម្ពុជានឹងរៀបចំការប្រកួតស៊ីហ្គេមក្នុងនាមជាម្ចាស់ផ្ទះលើកដំបូង ។ នៅក្នុងការប្រកួតនោះ មានទីតាំងតែ៣ប៉ុណ្ណោះដែលត្រូវរៀបចំធ្វើជាទីលាន ខណៈទីលានទាំង៣នោះហោចណាស់ក៏ស្រូបទាញអ្នកទេសចរ និងអ្នកគាំទ្រការប្រកួតរហូតរាប់សែននាក់ផងដែរ បើទោះជាក្នុងពេលនេះ នៅមិនទាន់កំណត់បានច្បាស់លាស់ក្ដី ។
យោងតាមការបញ្ជាក់កាលពីពេលថ្មីៗ របស់ លោក ជា បូរ៉ា ប្រធានគណៈកម្មការទីលាន ប្រកួត នៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ឆ្នាំ២០២៣ ហៅ កាត់ គ . ជ . ប . អ (CAMSOC) បានបង្ហាញឲ្យដឹងអំពីទីលានប្រកួតចំនួន ៣ ទីតាំង ដែលត្រូវបានកំណត់រួចហើយ សម្រាប់ ត្រៀមស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ ។ ទីលានប្រកួតចំនួន៣ទីតាំងនោះនោះ រួមមាន ពហុកីឡដ្ឋានជាតិមរតកតេជោ(ស្ថិតនៅខណ្ឌជ្រោយចង្វារ ) ដែលជាកន្លែង ប្រារព្ធពិធីបើក-បិទស៊ីហ្គេម ឆ្នាំ២០២៣ ។
ទីតាំងនេះត្រូវបានគេរំពឹងថា នឹងមានភ្ញៀវចុះឡើងរាប់ម៉ឺននាក់ជារៀងរាល់ថ្ងៃ និងអាចឈានដល់រាប់សែននាក់ទម្រាំចប់កម្មវិធី និងជាទីតាំងថ្មី ដែលមនុស្សនឹងចាប់អារម្មណ៍ទៅកម្សាន្តជាងគេ បើទោះមិនមែនជាអ្នកគាំទ្រកីឡា ។ ទីតាំងទី២ គឺពហុកីឡដ្ឋានជាតិអូឡាំពិក ដោយទីតាំងនេះ ក៏រំពឹងថាទាក់ទាញអ្នកទៅទស្សនាបានច្រើនផងដែរ ដោយសារតែជាទីតាំងកណ្ដាលក្រុង និងជាកន្លែងដែលកកកុញដោយក្រុមមហាជនស្រាប់។
ដោយឡែកទីតាំងទី៣ គឺទីលានលើផ្ទៃសមុទ្រដែលរួមមាន សមុទ្រក្នុងខេត្តព្រះសីហនុ ខេត្ត កំពត និងខេត្តកែប ដែលទីតាំងនេះ គឺជាទីតាំង សម្រាប់ប្រកួតប្រភេទកីឡាលើទឹកមួយចំនួន និងជាទីតាំងមួយដែលកាន់តែមានការរំពឹងទៀតហើយថានឹងមានអ្នកទេសចរក្នុង និងក្រៅស្រុកកកកុញ សម្រាប់ការប្រកួតនោះ។
លោក វ៉ាត់ ចំរើន អគ្គលេខាធិការ CAMSOC ធ្លាប់បានឲ្យដឹងថា ការរៀបចំទីលាន ការពិនិត្យលើហេដ្ឋារចនាសម្ព័ន្ធ និងការរៀបចំ កម្មវិធីដំណើរទស្សនកិច្ចរបស់សម្ដេចពិជ័យ សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី ក្រសួងការពារជាតិ និងជាប្រធាន CAMSOC តំណាងដ៏ខ្ពង់ខ្ពស់សម្ដេចតេជោ នាយករដ្ឋមន្ត្រី នឹងអញ្ជើញសម្ពោធដាក់ឲ្យប្រើប្រាស់នូវអាង ហែលទឹកពហុកីឡដ្ឋានជាតិអូឡាំពិក ដែលត្រូវបានជួសជុលឡើងវិញ នាថ្ងៃទី២៨ កញ្ញា ខាងមុខនេះ ព្រមទាំងអញ្ជើញធ្វើដំណើរទស្សនកិច្ចត្រួតពិនិត្យលើទីលានហ្វឹកហាត់ និងការហ្វឹកហាត់របស់ក្រុមជម្រើសជាតិប្រមាណ១០ ប្រភេទកីឡាក្នុងពហុកីឡដ្ឋានជាតិ ផងដែរ ។
នេះជាសកម្មភាពត្រៀមទុកជាមុន ដើម្បីធានាថា ទីលានការប្រកួតស៊ីហ្គេមនៅឆ្នាំ២០២៣ គឺមិនអាចខ្វះចន្លោះ ។ ក្នុងនោះក៏ត្រូវរៀបចំសណ្ដាប់ធ្នាប់ឱ្យខ្លាំងផងដែរ ដោយសារតែក្នុងពេលនោះ គឺទីលានទាំង៣កន្លែង ដែលកម្ពុជាប្រើជាកន្លែងប្រកួតកីឡា គឺពិតជាមានមនុស្សច្រើនម៉ឺនកកកុញ។
លោក វ៉ាត់ ចំរើន អគ្គលេខាធិការ CAMSOC បញ្ជាក់ទៀតថា នេះគឺគោលដៅ នៃការរៀបចំនូវហេដ្ឋារចនាសម្ព័ន្ធ ហើយចំពោះហេដ្ឋារចនាសម្ព័ន្ធដែលខ្វះខាតមិនទាន់ត្រូវតាមស្តង់ដារ ឬមិនទាន់មាន គឺត្រូវកសាងបន្ថែម ដើម្បីបំពេញបន្ថែម ឲ្យសមស្របតាមស្តង់ដារបច្ចេកទេស សម្រាប់ស៊ីហ្គេម លើកទី៣២ ឆ្នាំ២០២៣ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ។
ក្រៅពីដំណើរទស្សនកិច្ចលើទីលានប្រកួតនៅ ពហុកីឡដ្ឋានជាតិអូឡាំពិក សម្តេចពិជ័យសេនា ទៀ បាញ់ នឹងអញ្ជើញបន្តត្រួតពិនិត្យហេដ្ឋា រចនាសម្ព័ន្ធ នៅពហុកីឡដ្ឋានជាតិមរតកតេជោ ដែលកំពុងដំណើរការសាងសង់កីឡដ្ឋានធំ ដែលជាកន្លែងប្រារព្ធពិធីបើក-បិទ ស៊ីហ្គេម ក៏ដូចជាគ្រោងពិនិត្យទីលានប្រកួតមួយចំនួនទៀត នៅទីនោះ ដូចជាអាងហែលទឹក កីឡដ្ឋានក្នុង សាល ទីលានអត្តពលកម្ម បាល់ទះ វាយកូន បាល់ បាល់បោះ … ដែលបានបញ្ចប់ការសាងសង់រួចរាល់នៃដំណាក់កាលទី១ កន្លងទៅ ។
ទីលានប្រកួតមួយចំនួន នៃ ពហុកីឡដ្ឋានជាតិ មរតកតេជោ ធ្លាប់បានប្រើប្រាស់រួចហើយនា
ពេលកន្លងមក ខណៈភូមិកីឡាកំពុងដំណើរការ សាងសង់នៅទីនោះ ដើម្បីឲ្យកីឡាករ កីឡា ការិនី គ្រូបង្វឹក ស្នាក់នៅហូបចុក ដែលអាចផ្ទុក មនុស្សបានប្រមាណ១ម៉ឺននាក់ ខណៈដែលតួលេខអ្នកចូលទស្សនានៅតំបន់ជុំវិញនឹងច្រើនជាងនេះទ្វេដង៕
ចែករំលែកព័តមាននេះ