រាជធានីភ្នំពេញ ៖ យុវជន២នាក់ជិះម៉ូតូហុងដាស្កុបភីស៊េរីឆ្នាំ២០២០មួយគ្រឿង ចេញមកពីផ្ទះរបស់មិត្តភក្តិ ក្នុងបំណងទៅផឹកស៊ីជួបជុំជាមួយមិត្តភក្តិផ្សេងជាបន្តទៀត ក៏ត្រូវក្រុមចោរប្រដាប់អាវុធស្ទើរគ្រប់ដៃ បានជិះម៉ូតូដេញតាមកាប់ និងបាញ់គំរាមប៉ុនប៉ងប្លន់យកម៉ូតូ តែមិនសម្រេច ដោយសារតែម៉ូតូជាប់ហ្វ្រាំងទៅមិន…
រាជធានីភ្នំពេញ ៖ យុវជន២នាក់ជិះម៉ូតូហុងដាស្កុបភីស៊េរីឆ្នាំ២០២០មួយគ្រឿង ចេញមកពីផ្ទះរបស់មិត្តភក្តិ ក្នុងបំណងទៅផឹកស៊ីជួបជុំជាមួយមិត្តភក្តិផ្សេងជាបន្តទៀត ក៏ត្រូវក្រុមចោរប្រដាប់អាវុធស្ទើរគ្រប់ដៃ បានជិះម៉ូតូដេញតាមកាប់ និងបាញ់គំរាមប៉ុនប៉ងប្លន់យកម៉ូតូ តែមិនសម្រេច ដោយសារតែម៉ូតូជាប់ហ្វ្រាំងទៅមិន ក៏ដកយកតែកូនសោម៉ូតូ រួចក្រុមជនសង្ស័យក៏នាំគ្នាជិះគេចខ្លួនបាត់ស្រមោល បង្កឲ្យមានការភ្ញាក់ផ្អើលឡើងកាលពីម៉ោង១១និង៣០នាទីយប់ ថ្ងៃទី២៣ ខែកញ្ញា ឆ្នាំ២០២០ ត្រង់ចំណុចខាងមុខស្ថានីយទូរទស្សន៍ហង្សមាស តាមបណ្ដោយផ្លូវស្រាបៀរ ថែហ្គ័រ ស្ថិតក្នុងសង្កាត់ព្រែកឯង ខណ្ឌច្បារអំពៅ។
ជនរងគ្រោះខាងលើមានឈ្មោះ ម៉េង ឡាង ភេទប្រុស អាយុ២០ឆ្នាំ ជាបុគ្គលិកក្រុមហ៊ុនឯកជន ស្នាក់នៅសង្កាត់ទួលទំពូង១ ខណ្ឌបឹងកេងកង។
តាមសម្តីពីជនរងគ្រោះរៀបរាប់ប្រាប់ឲ្យដឹងថា នៅមុនពេលកើតហេតុ ជនរងគ្រោះ និងមិត្តភក្តិម្នាក់ទៀតបានជិះម៉ូតូមួយគ្រឿងម៉ាក ហុងដាស្កុបភីស៊េរីឆ្នាំ២០២០ ពណ៌ខ្មៅ ពាក់ស្លាកលេខ ភ្នំពេញ1II-8171 ទើបតែចេញមកពីលេងផ្ទះរបស់មិត្តភក្តិនៅឯស្ពានព្រែកសំរោង ក្នុងបំណងជិះដឹកគ្នាទៅផឹកស៊ីនៅឯត្រើយម្ខាងជ្រោយចង្វារ ដោយធ្វើដំណើរតាមបណ្ដោយផ្លូវស្រាបៀរ ថៃហ្គ័រ ក្នុងទិសដៅពីត្បូងទៅជើង។
ជនរងគ្រោះបន្តថា លុះពេលដែលពួកគេជិះដឹកគ្នាដល់ចំណុចខ្លោងទ្វារវត្តនិគ្រោធវ័ន ហៅវត្តគល់ទទឹង ក៏ស្រាប់តែលេចមុខក្រុមជនសង្ស័យមួយក្រុមមានគ្នាជិត២០នាក់ ជិះម៉ូតូ៨ទៅ៩គ្រឿងមិនចាំម៉ាក ប្រដាប់ដោយកាំភ្លើងខ្លីមួយដើម និងកាំបិតផ្គាក់ រួមជាមួយដុំថ្មស្ទើរគ្រប់ដៃ បានជិះដេញតាមពីក្រោយជនរងគ្រោះ និងបានធ្វើសកម្មភាពកាប់ និងគប់ដុំថ្មទៅជនរងគ្រោះទៀត បណ្តាលឲ្យគប់ត្រូវចំក្បាលជនរងគ្រោះផ្នែកខាងក្រោយ ថែមទាំងបានដកកាំភ្លើងខ្លីបាញ់គំរាមជនរងគ្រោះចំនួន១គ្រាប់ថែមទៀតផង។
ប្រភពដដែលបន្តថា ពេលនោះជនរងគ្រោះក៏បន្ថែមល្បឿនព្យាយាមបើកគេចខ្លួនពីក្រុមជនសង្ស័យ តែក៏ត្រូវក្រុមជនសង្ស័យជិះដេញតាមកាប់ពីក្រោយយ៉ាងប្រសាចពេញលើដងផ្លូវតែម្តង។ លុះពេលដែលជនរងគ្រោះជិះម៉ូតូរត់គេចទៅដល់ចំណុចកើតហេតុ ដោយភ័យស្លន់ស្លោខ្លាំងពេក ជនរងគ្រោះក៏ក្រឡាច់កង់ម៉ូតូដួលដោយខ្លួនឯង បណ្តាលឲ្យម៉ូតូរងការខូចខាតបន្តិចបន្តួច។
ប្រភពដដែលបន្តថា ភ្លាមៗនោះដែរ ជនរងគ្រោះ និងមិត្តភក្តិក៏បាននាំគ្នាស្ទុះងើបរត់ចោលម៉ូតូចូលទៅក្នុងព្រៃស្មៅដែលនៅជាប់ដងផ្លូវនោះ ដើម្បីយករួចខ្លួន ក៏បានស្រែកឆោឡោឱ្យគេជួយផងដែរ ។ ប៉ុន្តែនៅពេលនោះជនសង្ស័យក៏ដកកាំភ្លើងខ្លីបាញ់គំរាម១គ្រាប់ទៀត និងបានលើកយកម៉ូតូរបស់ជនរងគ្រោះបំរុងជិះគេចខ្លួន។ ប៉ុន្តែដោយសារម៉ូតូនោះបានជាប់ហ្វ្រាំងជិះបន្តទៅមុខមិនរួច ទើបជនសង្ស័យដកយកតែកូនសោ រួចក៏នាំគ្នាជិះគេចខ្លួនចេញទៅបាត់ស្រមោលដោយសុវត្ថិភាព។ បន្ទាប់មកក៏មានប្រជាពលរដ្ឋដែលរស់នៅក្បែរកន្លែងកើតហេតុនាំគ្នាចេញមកជួយមើល និងរាយការណ៍ទៅសមត្ថកិច្ចមូលដ្ឋានភ្លាមៗផងដែរ។
ក្រោយពេលកើតហេតុ ក៏មានកម្លាំងសមត្ថកិច្ចមូលដ្ឋានបានចុះមកធ្វើការអន្តរាគមន៍ និងបាននាំជនរងគ្រោះទៅធ្វើការសួរនាំនិងដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលព្រែកឯង ដើម្បីឲ្យសមត្ថកិច្ចធ្វើការស្រាវជ្រាវតាមចាប់ក្រុមជនសង្ស័យយកមកផ្តន្ទាទោសទៅតាមផ្លូវច្បាប់ជាបន្តទៀត៕
ចែករំលែកព័តមាននេះ