រាជធានីភ្នំពេញ ៖ ជុំវិញរឿងរ៉ាវនៃការប្រមូលសំរាមដែលកន្លងមកអ្នករស់នៅរាជធានីភ្នំពេញមួយចំនួនធំតែងតែត្អូញត្អែរអំពីការយឺតយ៉ាវនៃការប្រមូលសំរាមនោះ ពេលនេះហាក់ដូចជា មានដំណឹងល្អ ព្រោះមន្ត្រីជំនាញបានអះអាងថា រដ្ឋបាលរាជធានីភ្នំពេញកំពុងតែពិចារណា និងវាយតម្លៃជ្រើសយកក្រុមហ៊ុនចំនួន៣ ក្នុងចំណោមក្រុមហ៊ុន២០ដែលបានដាក់ពាក្យស្នើសុំដេញថ្លៃ ដើម្បីអោយទទួលសិទ្ធិលើសេវាប្រមូលសំរាមអោយមានប្រសិទ្ធភាព ។
លោក ម៉េត មាសភក្តី អ្នកនាំពាក្យរដ្ឋបាល រាជធានីភ្នំពេញ បានអោយសារព័ត៌មានកោះសន្តិភាពដឹងនៅថ្ងៃទី២៤ ខែកញ្ញានេះថា រដ្ឋបាលរាជធានីភ្នំពេញ កំពុងតែពិចារណា និងវាយតម្លៃ ក្នុងការសម្រេចជ្រើសរើសយកក្រុមហ៊ុនចំនួន៣ប៉ុណ្ណោះ ក្នុងចំណោមហ៊ុនដែលបានដាក់ពាក្យស្នើសុំដេញថ្លៃ ដើម្បីផ្តល់សិទ្ធិលើការងារគ្រប់គ្រងសេវាប្រមូលសំរាម និងសំណល់រឹងក្នុងរាជធានីភ្នំពេញ ។
លោកបានមានប្រសាសន៍បន្តថា រដ្ឋបាលរាជធានីភ្នំពេញនឹងរៀបចំការប្រមូល សំរាមដោយបែងចែកខណ្ឌទាំង១៤ ជា៣តំបន់ ។ តំបន់នីមួយៗ មានមួយក្រុមហ៊ុន មួយជាអ្នកទទួលខុសត្រូវ និងរៀបចំតារាងពេលវេលាជាក់លាក់ក្នុងការ ប្រមូលសំរាមពីគ្រប់ច្រកផ្លូវផងដែរ ។ ដោយសារប្រទេសជាតិមានការរីកចម្រើន និង កំណើនប្រជាពលរដ្ឋ បានធ្វើឱ្យបរិមាណផលិតសំរាម សំណល់ រឹងកាន់តែមានការកើនទ្បើង ជាក់ស្ដែង នៅរាជធានី ភ្នំពេញក្នុងមួយថ្ងៃៗ សំរាមប្រមាណ ៣ពាន់តោន ត្រូវបានប្រមូល និងដឹកយកទៅចាក់ចោលនៅទីលានចាក់សំរាម ។ នៅក្នុងកិច្ចប្រជុំសាមញ្ញលើកទី១០ របស់ក្រុមប្រឹក្សារាជធានីភ្នំពេញ អាណត្តិទី៣ កាលពីពេល កន្លងមក លោក ហួត ហៃ អភិបាលរងរាជធានីភ្នំពេញទទួលបន្ទុកការងារសំរាមបានឲ្យដឹងថា មានក្រុមហ៊ុនចំនួន២០ហើយ ដែលបានមកយកពាក្យដេញថ្លៃប្រមូលសំរាមនៅរាជធានីភ្នំពេញ ។
លោកបន្តថា នៅពេលខាងមុខ យើងនឹងរៀបចំការប្រមូលសំរាមជា៣តំបន់ក្នុងខណ្ឌទាំង១៤ក្នុងរាជធានីភ្នំពេញ ដោយក្នុងមួយតំបន់មាន១ក្រុមហ៊ុនជា អ្នកទទួលខុសត្រូវ ។
ចំណែកលោកឃួង ស្រេង អភិបាលរាជធានីភ្នំពេញ បានថ្លែងថា បញ្ហាអនាម័យជាបញ្ហាសំខាន់ ១ដែលរដ្ឋបាលរាជធានីភ្នំពេញបានយកចិត្តទុកដាក់ តែបញ្ហាចន្លោះប្រហោងនៅតែមានដោយជៀសមិនផុត ។ តែយ៉ាងណារដ្ឋបាលរាជធានីភ្នំពេញសូមទទួលយកការលើកឡើងរបស់សមាជិកក្រុមប្រឹក្សារាជធានីភ្នំពេញដើម្បីបំពេញបន្ថែមនូវចំណុចខ្វះខាតលើការធ្វើអនាម័យ ។
រីឯ លោកប៉ា សុជាតិវង្ស ប្រធាន ក្រុម ប្រឹក្សា រាជ ធានី ភ្នំពេញ វិញ បានកោតសរសើរ ចំពោះការខិតខំប្រឹងប្រែងរបស់រដ្ឋបាលរាជធានីភ្នំពេញក្នុងការធ្វើឲ្យប្រសើរឡើងដំណើរការអភិវឌ្ឍន៏រាជធានីភ្នំពេញ និងសុំឲ្យធ្វើការងារជាលក្ខណៈប្រពន្ធ័ដោយបន្ស៊ីគ្នារវាងរបាយការណ៍ និងការងារអនុវត្តជាក់ស្ដែង ។
គួររំលឹក ថា កាសពីខែតុលា ឆ្នាំ២០១៩ ប្រមុខរាជរដ្ឋាភិបាលកម្ពុជា បានប្រកាស ដកហូតសិទ្ធិ ប្រមូល សំរាមពីក្រុមហ៊ុនស៊ិន ទ្រី ដើម្បីឲ្យរដ្ឋកាន់កាប់សិន ។ ហើយការប្រមូល សំរាម នៅរាជធានីភ្នំពេញ ក៏តម្រូវដាក់ឱ្យ ដេញថ្លៃជាថ្មី ដើម្បីស្វែងរកក្រុមហ៊ុនដែលមានសមត្ថភាព បទពិសោធន៍ ចូលរួម ផ្ដល់សេវាប្រមូលនិងដឹកជញ្ជូនសំរាម និងសំណង់រឹងនៅក្នុងរាជធានីភ្នំពេញ៕
ចែករំលែកព័តមាននេះ