រាជធានីភ្នំពេញ ៖ យ៉ាងណាក៏ដោយ មានការកត់សម្គាល់ឃើញថា បើទោះជាសំណុំរឿងអំពើហិង្សាវាយសង្សាររបស់ខ្លួន គឺនាងជាសង្សារដែលជាជនរងគ្រោះមិនបានដកពាក្យបណ្តឹងក្តី ប៉ុន្តែខណៈសមត្ថកិច្ចបញ្ជូនជនសង្ស័យទៅតុលាការ នាងបានតាមទៅមើលថែ និងយកបាយទឹកឲ្យសង្សារហូបរហូតដូចមិនដាច់អាល័យស្នេហ៍ទេ ទោះប៉ោងភ្នែកក៏ដោយ ។ នាងបានទៅមករហូតដល់ចៅក្រមសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន។
នាង នួន គឹមឡាង ក៏បានបញ្ជាក់តាមរយៈវីដេអូផ្ទាល់ខ្លួន នាល្ងាចថ្ងៃទី២២ កញ្ញាថា នាងមិនដកពាក្យបណ្ដឹងលើយុវជនជាសង្សារនោះវិញទេ គឺទុកឲ្យច្បាប់វិនិច្ឆ័យតាមអំពើដែលគេបានប្រព្រឹត្តទៅចុះ ។
សូមបញ្ជាក់ទៀតថា លោក គុជ គឹមឡុង ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញបានឲ្យដឹងថា នៅរសៀលថ្ងៃទី២៣ កញ្ញា ឆ្នាំ២០២០ លោក ពេជ្រ វិជ្ជាធរ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចចេញដីកាឃុំខ្លួនយុវជនម្នាក់ ដែលប្រើអំពើហិង្សាវាយសង្សាររបស់ខ្លួនបណ្តាលឲ្យប៉ោងមុខជាំភ្នែក ដាក់ពន្ធនាគារជាបណ្តោះអាសន្ន ។
ជនជាប់ចោទឈ្មោះ ប៉ា សុវណ្ណារិទ្ធ អាយុ២០ឆ្នាំ ស្នាក់នៅផ្ទះលេខ៥៦៣ ផ្លូវលំ ភូមិព្រៃជីសាក់ សង្កាត់ចោមចៅទី១ ខណ្ឌពោធិ៍សែនជ័យ ត្រូវបានលោក សឿ ឡងឌី ព្រះរាជអាជ្ញារងកាន់សំណុំរឿងចោទប្រកាន់ពីបទហិង្សាដោយចេតនា តាមបញ្ញត្តិមាត្រា២១៧ នៃក្រមព្រហ្មទណ្ឌ បន្ទាប់ពីធ្វើការស៊ើបសួរអស់រយៈពេល២ថ្ងៃរួចមក ។
សូមរំឭកថា កាលពីព្រឹកថ្ងៃទី២២ ខែកញ្ញាឆ្នាំ២០២០ នគរបាលខណ្ឌសែនសុខ បានបញ្ជូនយុវជនដែលវាយនារីជាសង្សាររបស់ខ្លួនបណ្ដាលឱ្យរងរបួសប៉ោងមុខ ជាំភ្នែក ទៅសាលាដំបូងរាជធានីភ្នំពេញសាកសួរ ។ ក្រោយពីបញ្ចប់ការសាកសួរ នៅរសៀលថ្ងៃដដែល តំណាងអយ្យការបានសម្រេចធ្វើការចោទប្រកាន់ជនសង្ស័យជាផ្លូវការពីបទហិង្សាដោយចេតនាតាមបញ្ញត្តិមាត្រា២១៧ នៃក្រមព្រហ្មទណ្ឌ ។
យោងតាមបញ្ញតិ្តមាត្រាខាងលើនេះ ជនណាដែលប្រព្រឹត្តអំពើហិង្សាដោយចេតនាលើ
អ្នកដទៃត្រូវផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំ និងពិន័យជាប្រាក់ពី២លានរៀល ទៅ៦លានរៀល ។ សូមបញ្ជាក់ថា នគរបាលប៉ុស្តិ៍ភ្នំពេញថ្មី កាលពីវេលាម៉ោងប្រមាណ៦ល្ងាចថ្ងៃទី២០ ខែកញ្ញា ឆ្នាំ២០២០ បានឃាត់ខ្លួនយុវជនម្នាក់ក្នុងករណីប្រើហិង្សាដោយចេតនា(ប្រើដៃវាយឲ្យរបួស)ទៅលើសង្សាររបស់ខ្លួន នៅក្នុងបន្ទប់ជួលលេខ៤០១ ជាន់ទី៤ ផ្លូវលេខ១៩៧៦ ភូមិពោងពាយ សង្កាត់ភ្នំពេញថ្មី ខណ្ឌសែនសុខ ។
ជនជាប់ចោទឈ្មោះ ប៉ា សុវណ្ណារិទ្ធ អាយុ២០ឆ្នាំ មុខរបរជាអ្នកដឹកអីវ៉ាន់ ស្នាក់នៅផ្ទះលេខ៥៦៣ ផ្លូវលំ ភូមិព្រៃជីសាក់ សង្កាត់ចោមចៅទី១ ខណ្ឌពោធិ៍សែនជ័យ បានវាយផ្ទៃមុខនាង នួន គឹមឡាង អាយុ២៥ឆ្នាំ ស្នាក់នៅបន្ទប់ជួលលេខ៤០១ ជាន់ទី៤ ផ្លូលេខ១៩៧៦ ភូមិពោងពាយ សង្កាត់ភ្នំពេញថ្មី ខណ្ឌសែនសុខ បណ្តាលឲ្យមានរបួសប៉ោងមុខនិងជាំភ្នែកទាំងសងខាង និងគុម្ពត្រចៀកខាងស្តាំគឺវ៉ៃនាងគ្មានប្រណីសោះ ។
មន្ត្រីនគរបាលប៉ុស្តិ៍ភ្នំពេញថ្មីឱ្យដឹងថា អំពើហិង្សាបានកើតឡើងកាលពីវេលាម៉ោងប្រមាណ១និង៣០នាទីរំលងអធ្រាត្រឈានចូលថ្ងៃទី២០ ខែកញ្ញា ឆ្នាំ២០២០ ។
ចែករំលែកព័តមាននេះ