អាជ្ញាធរខេត្តប៉ៃលិន ចុះសំណេះសំណាលជាមួយអាជីវករផ្សារប៉ាហ៊ី
- ប៉ៃលិន
ខេត្តប៉ៃលិន ៖ លោក ផាន់ ចាន់ធុល អភិបាលខេត្តប៉ៃលិន រួមដំណើរដោយ លោក ចេង ញ៉ាន់,លោក…
ខេត្តប៉ៃលិន ៖ លោក ផាន់ ចាន់ធុល អភិបាលខេត្តប៉ៃលិន រួមដំណើរដោយ លោក ចេង ញ៉ាន់,លោក ឃ្លោក នួយ អភិបាលរងខេត្ត,លោក ស៊ុន យី អភិបាលក្រុងប៉ៃលិន និងអាជ្ញាធរមូលដ្ឋាន ព្រមទាំងក្រុមការងារ នាថ្ងៃទី២៣ ខែកញ្ញា ឆ្នាំ២០២០នេះ បានអញ្ចើញចុះសំណេះសំណាលសួរសុខទុក្ខ និងស្តាប់សំណូមពរនានារបស់អាជីវករដែលលក់ដូរនៅក្នុង ផ្សារប៉ាហ៊ី (ផ្សារក្រោម) ស្ថិតនៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន ក្រោយពីស្ថានភាពជំងឺកូវីដ-19 នៅកម្ពុជា ហាក់មានភាពធូរស្រាលឡើងវិញ។
លោក ផាន់ ចាន់ធុល បានពិនិត្យឃើញថា ៖ កំណើនអ្នកលក់ដូរ និងអាជីវករ មានចំនួនកាន់តែច្រើនឡើង រីឯកន្លែងលក់ដូរមានសភាពមិនទាន់សមរម្យនៅឡើយ។ ចំណែកស្ថានភាពផ្លូវក្នុងផ្សារ គឺតូចចង្អៀត ធ្វើឲ្យកកស្ទះចរាចរណ៍រាល់ថ្ងៃ និងមានទឹកដក់ជាប្រចាំ ជាពិសេសពេលមានភ្លៀងធ្លាក់ម្តងៗ ដោយសារគ្មានប្រព័ន្ធលូសម្រាប់រំដោះទឹកចេញ ហើយនេះគឺជាកង្វល់ និងសំណូមពររបស់អាជីវករ។
លោកអភិបាលខេត្ត បានបញ្ជាក់ថា៖ អាជ្ញាធរមានតួនាទីដោះស្រាយរាល់សុខទុក្ខ និងកង្វល់របស់ប្រជាពលរដ្ឋ ទាំងនៅតំបន់ទីផ្សារ និងនៅទីជនបទ ក្នុងគោលបំណងសម្រួលដល់ការប្រកបរបរទទួលទានរបស់ប្រជាពលរដ្ឋ ដើម្បីលើកស្ទួយសេដ្ឋកិច្ចគ្រួសារឱ្យកាន់តែប្រសើរឡើង សំដៅរួមចំណែកអនុវត្តគោលនយោបាយកាត់បន្ថយភាពក្រីក្រ ក្រោមការដឹកនាំដ៏ត្រឹមត្រូវ និងប៉ិនប្រសព្វ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
លោកក៏បានសំណូមពរដល់អាជីវករក្នុងផ្សារទាំងអស់ ចូលរួមលើកកម្ពស់អនាម័យ និងសោភ័ណភាពសាធារណៈ ដោយត្រូវដាក់ទំនិញលក់ដូរឱ្យមានសណ្តាប់ធ្នាប់ ចៀសវាងការដាក់តាំងលក់នៅលើចិញ្ចើមផ្លូវ បណ្តាលឱ្យកកស្ទះចរាចរ ជាពិសេសម្ចាស់ភាស៊ីផ្សារ ត្រូវសហការជាមួយអាជ្ញាធរមូលដ្ឋាន ធ្វើការរៀបចំសណ្តាប់ធ្នាប់ និងសន្តិសុខផ្សារឱ្យបានល្អ។ សូមបញ្ជាក់ថា ៖ ការចុះសួរសុខទុក្ខនាឱកាសនោះ លោក ផាន់ ចាន់ធុល អភិបាលខេត្តប៉ៃលិន បានទទួលយកនូវសំណូមពរ និងកង្វល់របស់អាជីវករ ចំពោះបញ្ហាផ្លូវក្នុងផ្សារ និងប្រព័ន្ធលូរំដោះទឹក ដោយលោកនឹងចាត់ឱ្យក្រុមការងារ និងមន្ត្រីជំនាញចុះមកសិក្សា ដើម្បីធ្វើការដោះស្រាយបញ្ហាទាំងនេះឱ្យបានឆាប់រហ័ស តាមដែលអាចធ្វើទៅបាន៕ ដោយ ៖ នីយ៉ា
ចែករំលែកព័តមាននេះ