ខេត្តពោធិ៍សាត់ ៖ កាលពីដើមសប្តាហ៍នេះឧត្តមសេនីយ៍ទោ គឹមសេង ងន មេបញ្ជាការកងពលតូច អន្តរាគមន៍លេខ១៤ បានដឹកនាំកម្លាំង ១៣០នាក់ចុះជួយទប់ទឹក និងជម្លៀសប្រជាពលរដ្ឋដែលផ្ទះរបស់ពួកគាត់កំពុងលិចទឹកដោយគ្រោះធម្មជាតិទឹកជំនន់…
ខេត្តពោធិ៍សាត់ ៖ កាលពីដើមសប្តាហ៍នេះឧត្តមសេនីយ៍ទោ គឹមសេង ងន មេបញ្ជាការកងពលតូច អន្តរាគមន៍លេខ១៤ បានដឹកនាំកម្លាំង ១៣០នាក់ចុះជួយទប់ទឹក និងជម្លៀសប្រជាពលរដ្ឋដែលផ្ទះរបស់ពួកគាត់កំពុងលិចទឹកដោយគ្រោះធម្មជាតិទឹកជំនន់ នៅភូមិដំណាក់ ឃុំពោធិ៍វាល ស្រុកកណ្តៀង ពោធិសាត់។
យោងតាមសេចក្តីជូនដំណឹងរបស់រដ្ឋបាលខេត្តពោធិ៍សាត់បានឱ្យដឹងថា បន្ទាប់ពីទទួលរងឥទ្ធិពលព្យុះ និងភ្លៀងបន្តបន្ទាប់រយៈពេល២ថ្ងៃជាប់គ្នាក្នុងភូមិសាស្ត្រខេត្តពោធិ៍សាត់បានបង្កឱ្យមានទឹកជំនន់ ទឹកភ្លៀង តាមដងស្ទឹងពោធិ៍សាត់ចំនួន០៤ក្រុង ស្រុក និង១៨ឃុំ សង្កាត់ដែលបណ្តាល់ឱ្យខូតខាត និងប៉ះពាល់លំនៅដ្ឋាន ដំណាំស្រូវ និងហេដ្ឋានរចនាសម្ព័ន្ធមួយចំនួន។ មេបញ្ជាការកងពល បានធ្វើការក្រើនរំលឹកប្រជាពលរដ្ឋឱ្យមានការប្រុងប្រយ័ត្នខ្ពស់បំផុត ជាពិសេសនៅក្នុងរដូវវស្សានេះ ដោយសាររដូវនេះជារដូវមានភ្លៀងធ្លាក់ច្រើន ដែរបង្កជាទឹកជំនន់ និងព្យុះបក់បោកបំផ្លិចបំផ្លាញ ផ្ទះសម្បែង ទ្រព្យសម្បត្តិ ផលដំណាំ និងសត្វពាហនៈផងដែរ។
លោកបានបន្ថែមថា ស្ថិតនៅក្នុងស្ថានភាពដ៏លំបាកនេះ ឪពុកម្តាយគ្រប់រូបត្រូវមានការប្រុងប្រយ័ត្នចំពោះក្មេងតូចៗដែរងាយរងគ្រោះ និងរក្សាទឹកស្អាតទុកប្រើប្រាស់នៅក្នុងអំឡុងពេលដែរជួបគ្រោះទឹកជំនន់បែបនេះ។ គួរជម្រាបជូនថា គិតត្រឹមថ្ងៃទី២៣ ខែកញ្ញា ឆ្នាំ២០២០នេះ ខេត្តពោធិ៍សាត់បានរងឥទ្ធិពលព្យុះ និងភ្លៀងធ្លាក់បន្តបន្ទាប់រយៈពេល២ថ្ងៃជាប់គ្នា មកហើយ ក្នុងនោះផងដែរ បើយោងតាមប្រសាសន៍របស់មេបញ្ជាការកងពល គឺកម្លាំងរបស់កងពលតូចអន្តរាគមន៍លេខ១៤ នៅតែត្រៀមខ្លួនជានិច្ចដើម្បីចេញប្រតិបត្តិការជួយសង្គ្រោះប្រជាពលរដ្ឋគ្រប់ពេលវេលា មិនថាយប់ឬថ្ងៃនោះទេ៕ ដោយ ៖ សុខ សារ៉ាយ
ចែករំលែកព័តមាននេះ