រាជធានីភ្នំពេញ ៖ «ដោយសារតែកូវីដ១៩ មីងលក់សល់ស្ទើររាល់ថ្ងៃ ជួនកាលយកចែកគេក៏មានដែរ សឹងតែដាច់ខ្យល់ហើយក្មួយអើយ» ។ នេះជាការលើកឡើងរបស់ស្ត្រីវ័យកណ្តាលមួយរូប ដែលមានអាយុ៤៨ ឆ្នាំ ជាអ្នកលក់បង្អែមចល័ត មានដូចជា ពោតចំហុយ ពោតកំបោរ នំស៊យ និងតាប៉ែខ្មៅជាដើម ។
អ្នកស្រី នេត សាវង្ស ពាក់អាវផ្កាដៃវែង និងពាក់មួកគ្របមុខ ការពារពីកំដៅថ្ងៃ ដែលដៃម្ខាងកំពុងដូសសរសៃដូងដាក់លើតាប៉ែដំណើមខ្មៅឲ្យភ្ញៀវ បានរៀបរាប់ទាំងទឹកមុខស្រពោនថា មុខរបរលក់បង្អែមចល័តនេះមានការជួបបញ្ហាលំបាកខ្លះដែរ គឺគាត់ត្រូវធាក់កង់ទៅលក់នៅកន្លែងឆ្ងាយៗហាលក្តៅ ហាលភ្លៀង ហើយចំណេញបានតិចតួច ។
អ្នកស្រី នេត សាវង្ស ដែលមានសំបុរស្រអែម និងមានកម្ពស់ប្រមាណ ១.៦០ ម៉ែត្រ បាននិយាយបណ្តើរនិងដួសបង្អែមពោតកំបោរដាក់ក្នុងថង់បណ្តើរឲ្យភ្ញៀវថា «អ្វីដែលកាន់តែវេទនានោះ គឺតាំងពីមានជំងឺកូវីដ ១៩ នេះមក គឺលក់លែងដាច់តែម្តង អ៊ីចឹងថ្ងៃខ្លះក្មួយអើយ សល់នំ លក់មិនអស់នោះទេ ហើយបង្អែមដែលមីងលក់ គឺមិនអាចទុកបាន ដូច្នេះមីងក៏ចែកអ្នកជិតខាងរស់នៅក្បែរផ្ទះជួលគ្រាន់ហូប» ។
អ្នកស្រី នេត សាវង្ស ដែលមានតែកង់កញ្ចាស់មួយគ្រាន់ដាក់បង្អែមលក់ បានប្រាប់អ្នកសារព័ត៌មានកោះសន្តិភាពឲ្យដឹងថា គាត់មានស្រុកកំណើតនៅ ខេត្តស្វាយរៀង ហើយគាត់បានប្រកបមុខរបរលក់បង្អែមចល័តនេះ អស់រយៈពេល១៤ឆ្នាំមកហើយនៅភ្នំពេញ ។ ដំបូងឡើយគាត់រៀនចេះធ្វើបង្អែមដូចជា តាប៉ែ ពោតកំបោរ ពោតចំហុយ និងនំស៊យ ពីបងប្អូនខាងប្តីនៅឯស្រុកកំណើត បន្ទាប់មកគាត់ក៏បានឡើងមករាជធានីភ្នំពេញជួលបន្ទប់គេស្នាក់នៅ រួចប្រកបមុខរបរមួយនេះ ដោយប្រើដើមទុនចំនួន៧ម៉ឺនរៀល បន្ទាប់ពីទូទាត់ថ្លៃគ្រឿងផ្សំរួចក្នុងមួយថ្ងៃគាត់ចំណេញបាន៣ម៉ឺនរៀលតែប៉ុណ្ណោះ ។
អ្នកស្រីបានបន្តថា គាត់ត្រូវក្រោករៀងរាល់ម៉ោង៤ទៀបភ្លឺ ដើម្បីរៀបចំធ្វើបង្អែមដូចជា តាប៉ែ ពោតកំបោរ ពោតចំហុយ និងនំស៊យ រហូតដល់ម៉ោង១០ព្រឹកទើបរួចរាល់ និងដឹកដោយកង់មួយគ្រឿងចេញដំណើរទៅលក់ ព្រមទាំងមានចាក់មីក្រូពពាយលក់តាមផ្លូវផងដែរ ។ អ្នកស្រីបានបន្តថា តាប៉ែ ពោតកំបោរ ពោតចំហុយ និងនំស៊យ ក្នុងមួយកញ្ចប់លក់តម្លៃ១ពាន់រៀល ហើយក្នុងមួយថ្ងៃ ក្នុងមួយមុខៗលក់បានជិត២០កញ្ចប់ ។
ស្ត្រីដដែលបានបន្តថា ការប្រកបមុខរបរលក់បង្អែមចល័តនេះមានការជួបបញ្ហាលំបាកខ្លះដែរ គឺគាត់ត្រូវធាក់កង់ទៅលក់នៅកន្លែងឆ្ងាយៗ ហើយពេលទៅដល់កន្លែងខ្លះ មានបងប្អូនប្រជាពលរដ្ឋហូបអាហារពេលព្រឹករួច គេមិនសូវទិញបង្អែមរបស់គាត់នោះទេ លុះពេលគាត់ទៅលក់នៅកន្លែងខ្លះទៀតមានគេលក់នំចំណីជាច្រើនមុខ ធ្វើឱ្យគាត់លក់មិនសូវដាច់ផងដែរ ម្យ៉ាងទៀតដោយសារផ្ទុះជំងឺកូវីដ១៩ ធ្វើឱ្យគាត់លក់មិនដាច់ ហើយនៅសល់ស្ទើររាល់ថ្ងៃ ។
ទោះបីជាមុខរបរលក់បង្អែមនេះចំណាយដើមច្រើន តែចំណេញតិច និងជួបការលំបាកក៏ពិតមែន ប៉ុន្តែអ្នកស្រីនៅតែបន្តប្រកបមុខរបរនេះដើម្បីដោះស្រាយជីវភាពក្នុងគ្រួសារ ។ អ្នកស្រីបានសំណូមពរដល់បងប្អូនប្រជាពលរដ្ឋសុំជួយទិញបង្អែមគាត់ផង ដើម្បីបានប្រាក់កម្រៃខ្លះគ្រាន់ដោះស្រាយជីវភាពក្នុងគ្រួសារ ៕
ចែករំលែកព័តមាននេះ