រាជធានីភ្នំពេញ ៖ លោក សួន សេរីរដ្ឋា ដែលអំឡុងខែកក្កដា ត្រូវបានព្រះមហាក្សត្រកម្ពុជា ចេញព្រះរាជក្រឹត្យត្រាស់បង្គាប់តែងតាំងមុខតំណែងជារដ្ឋលេខាធិការ នៃក្រសួងអភិវឌ្ឍន៍ជនបទ បានបង្ហោះសារនយោបាយ ដៀមដាមដល់អតីតមេបក្សប្រឆាំងលោក សម រង្ស៊ី ជុំវិញការអះអាងជាថ្មីថា ខ្លួនមានបំណងវិលចូលប្រទេសកម្ពុជា ឲ្យទាល់តែបាន ទោះមានការរារាំងយ៉ាងណាក៏ដោយ ។
បន្ថែមពីលើនេះ លោក សួន សេរីរដ្ឋា អតីតប្រធានគណបក្សអំណាចខ្មែរ បានបង្ហោះសារ នាថ្ងៃទី២២ ខែកញ្ញានេះថា រដ្ឋាភិបាលមិនបានហាមខ្មែរណាម្នាក់ មិនឲ្យវិលចូលប្រទេសវិញនោះទេ សំខាន់គឺលោក សម រង្ស៊ី ចង់បោកកុហក់ អ្នកផ្គាប់មុខរបស់ខ្លួនតែប៉ុណ្ណោះ ។
លោក សួន សេរីរដ្ឋា បានបង្ហោះសារ យ៉ាងដូច្នេះថា «រាជរដ្ឋាភិបាល ដែលដឹកនាំសម្តេចតេជោ ហ៊ុន សែន ជានាយករដ្ឋមន្ត្រី មិនបានហាមឃាត់ពលរដ្ឋខ្មែរណាម្នាក់ ដែលកំពុងរស់នៅ ឬស្នាក់នៅក្រៅប្រទេស មិនឲ្យវិលចូលប្រទេសនោះទេ… ហើយតុលាការកម្ពុជា ក៏មិនដែលកាត់ទោសនិរទេសជនជាតិខ្មែរណាម្នាក់ ឬអ្នកនយោបាយណា ឲ្យទៅរស់នៅក្រៅប្រទេស ដោយបញ្ញត្តមិនឲ្យត្រឡប់ចូលស្រុកដែរ !» ។
លោកបានបន្តថា «តែខ្ញុំ ជឿជាក់ថា មន្ត្រីនគបាលយុត្តិធម៌កម្ពុជា ក៏ត្រៀមខ្លួនជានិច្ច ដើម្បីអនុវត្តនូវសាលក្រម និងសាលដីការបស់តុលាការ ដើម្បីចាប់ពិរុទ្ធជន ឬជនជាប់ចោទ បញ្ជូនទៅពន្ធនាគា ដើម្បីអនុវត្តទោសតាមច្បាប់ ដោយឥតលើកលែង និងដើម្បីលុបបំបាត់នូវវប្បធម៌រួចទោស» ។
អតីតប្រធានគណបក្សអំណាចខ្មែររូបនេះ កាលពីថ្ងៃទី២១ ខែកញ្ញា ក៏បានវាយប្រហារលោក សម រង្ស៊ី ដែលបានប្រកាសថា នឹងចូលស្រុកម្តងទៀតនោះថា គឺគ្រាន់តែជា «នយោបាយវ៉ៃប៉ោត គោះត្រដោករបស់ សម រង្ស៊ី បោកកុហក់ បានត្រឹមតែពួកល្ងង់ផ្កាប់មុខ និងខ្វាក់ខួរក្បាលប៉ុណ្ណោះ ដែលជឿ និងមានជំនឿលើសម្តីកុហក់ដដែលៗ ដែលឥតខ្មាស់អៀននេះថា ៖ ខ្លួននឹងវិលចូលស្រុកនោះ !» ។
លោកបានបន្ថែមថា «ការប្រកាសថា ខ្លួននឹងវិលត្រឡប់ចូលស្រុកវិញ នៅពេលនេះ នៅពេលនោះ ឆ្នាំនេះ ឆ្នាំនោះ វាសាំត្រចៀករបស់អ្នកចេះស្តាប់ ចេះចងចាំព្រឹត្តិការណ៍ និងចេះប្រើវិចារណញ្ញាណអស់ទៅហើយ… ហើយក៏វាជាឧបករណ៍នយោបាយតែមួយគាត់របស់ សម រង្ស៊ី ដែលសេសសល់ សម្រាប់វាស់វែង ទំហំអ្នកនៅផ្កាប់មុខជាមួយខ្លួន និងទំហំដែលខ្លួនអាចបន្តបោករៃអង្គាសយកមកចាយ ធ្វើទេសចរណ៍នយោបាយនៅក្រៅប្រទេសដែរ ។ ខ្មោចងាប់ហើយ វាមិនអាចរស់ឡើងវិញទេ ! អាចារ្យយាមផ្នូរនេះ ក៏មិនហ៊ានវិលចូលស្រុក ដើម្បីចូលដេកគុកដែរ !» ។
សូមរម្លឹកថា លោក សម រង្ស៊ី ដែលកំពុងជាប់បណ្តឹងជាច្រើន ជាមួយមន្ត្រីជាន់ខ្ពស់រាជរដ្ឋាភិបាល ហើយក៏មានដីការចាប់ខ្លួនផងដែរ បានអះអាងសារជាថ្មី កាលពីថ្ងៃទី២០ ខែកញ្ញា យ៉ាងដូច្នេះថា «ខ្ញុំនឹងវិលមកប្រទេសកម្ពុជា ក្នុងពេលឆាប់ៗខាងមុខនេះ ប៉ុន្តែខ្ញុំមិនប្រាប់មុនទេ។ ទៅដល់ គឺទៅដល់ភ្លាម ហើយសូម បងប្អូន ត្រៀមខ្លួន ត្រៀមលក្ខខណៈបងប្អូនរួមកម្លាំងគ្នា» ។
គួរបញ្ជាក់ផងដែរថា លោក សម រង្ស៊ី ក៏ធ្លាប់បានប្រកាសចូលស្រុកវិញ កាលពីថ្ងៃទី៩ ខែវិច្ឆិកា ឆ្នាំ២០១៩ ម្តងមកហើយថា ចូលស្រុក ប៉ុន្តែទណ្ឌិតរូបនេះ មិនបានវិលស្រុក តាមការសន្យានោះទេ ៕
ចែករំលែកព័តមាននេះ