វាងាយស្រួលទេក្នុងការបាក់ទឹកចិត្ត ឬខឹងបន្ទាប់ពីដឹងថានរណាម្នាក់ផ្សេងទៀតត្រូវបានជ្រើសរើសសម្រាប់ការងារដែលអ្នកចាប់អារម្មណ៍ ជាពិសេសនៅពេលដែលអ្នកគិតថាអ្នកធ្វើបានល្អក្នុងការដាក់ពាក្យ និងសម្ភាសន៍។ ប៉ុន្តែកំហុសឆ្គងធំបំផុតរបស់បេក្ខជនក្នុងស្ថានការនេះគឺការបាក់ទឹកចិត្ត និងបោះបង់ចោលទំនាក់ទំនងដែលពួកគេបានព្យាយាមកសាងជាមួយស្ថាប័នការងារនោះ។
ប្រព័ន្ធសង្គមមានអំណាចណាស់ក្នុងសម័យកាលអ៊ីនធើណែតនេះ ហើយស្ថាប័នការងារផ្សេងៗអាចចូលមើល Profile របស់អ្នកលើប្រព័ន្ធសង្គមបានយ៉ាងងាយ។ ដូច្នេះប្រសិនបើអ្នកបង្ហាញភាពតូចចិត្ត ឬកំហឹងជាសាធារណៈនោះ វាមានតែរាំងស្ទះអ្នកសម្រាប់ឱកាសការងារនៅថ្ងៃមុខប៉ុណ្ណោះ។
ដូច្នេះអ្នកមិនត្រូវចុះចាញ់ទេ និងត្រូវបង្ហាញនូវការប្តេជ្ញាក្នុងការបន្តដំណើរទៅមុខ។ ជាដំបូងអ្នកគួរតែផ្ញើអ៊ីមែលទៅកាន់ស្ថាប័ននោះដើម្បីបង្ហាញពីអំណរគុណរបស់អ្នកសម្រាប់ពេលវេលារបស់ពួកគេដែលបានផ្តលឲ្យអ្នក។
វាមិនចាំបាច់ជាអ៊ីមែលដែលវែងទេ ប៉ុន្តែអ្នកគួរតែបង្ហាញអំណរគុណទៅកាន់ក្រុមហ៊ុន និងអ្នកចូលរួមសម្ភាសន៍ ព្រមទាំងអបអរពួកគេដែលបានរកបានបុគ្គលិកដែលពួកគេគិតថាស័ក្តិសមនឹងមុខតំណែងនោះ។ ជាចុងក្រោយ អ្នកគួរតែបញ្ចប់ជាមួយនឹងសំណើរដល់ស្ថាប័នឲ្យទាក់ទងមកអ្នកនៅពេលមុខប្រសិនបើមានឱកាសការងារថ្មីៗ។
ការធ្វើដូច្នេះមានសារៈសំខាន់ព្រោះវាបង្ហាញនូវអាកប្បកិរិយាល្អរបស់អ្នក។ ជាក់ស្តែង មិនមាននរណាដែលចូលចិត្តប្រាប់ព័ត៌មានមិនល្អទៅអ្នកដទៃទេ។ ដូច្នេះប្រសិនបើអ្នកខឹងក្រហល់ក្រហាយ និងបញ្ចេញវាលើប្រព័ន្ធសង្គមនោះ ពួកគេនឹងកត់ឈ្មោះអ្នកចូលក្នុងបញ្ជីខ្មៅ។
ជាមួយគ្នានេះដែរ អ្នកមិនគួរភ័យខ្លាចក្នុងការសួរសុំយោបល់បន្ថែមទេដើម្បីអនុញ្ញាតឲ្យអ្នកយល់ដឹងបន្ថែមពីចំណុចខ្វះខាតរបស់អ្នក ឬកំហុសឆ្គងដែលអ្នកបានប្រព្រឹត្តដោយមិនដឹងខ្លួនដើម្បីអនុញ្ញាតឲ្យអ្នកត្រៀមខ្លួនសម្រាប់ឱកាសនៅថ្ងៃមុខបាន ៕
ចែករំលែកព័តមាននេះ