ខេត្តកំពង់ធំ ៖ ដោយអនុវត្តយ៉ាងម៉ឺងម៉ាត់តាមបទបញ្ជារបស់លោកមេបញ្ជាការរងកងទ័ពជើងគោក និងមេបញ្ជាការយោធភូមិភាគទី៤ តំបន់ប្រតិបត្តិការសឹករងកំពង់ធំ បានធ្វើការត្រួតពិនិត្យកម្លាំង មធ្យោបាយ និងគ្រឿងបំពាក់ផ្សេងៗដើម្បីត្រៀមចល័តអន្តរាគមន៍ជួយសង្គ្រោះប្រជាពលរដ្ឋ ដែលរងគ្រោះដោយគ្រោះមហន្តរាយផ្សេងៗ ពិសេសគ្រោះទឹកជំនន់…
ខេត្តកំពង់ធំ ៖ ដោយអនុវត្តយ៉ាងម៉ឺងម៉ាត់តាមបទបញ្ជារបស់លោកមេបញ្ជាការរងកងទ័ពជើងគោក និងមេបញ្ជាការយោធភូមិភាគទី៤ តំបន់ប្រតិបត្តិការសឹករងកំពង់ធំ បានធ្វើការត្រួតពិនិត្យកម្លាំង មធ្យោបាយ និងគ្រឿងបំពាក់ផ្សេងៗដើម្បីត្រៀមចល័តអន្តរាគមន៍ជួយសង្គ្រោះប្រជាពលរដ្ឋ ដែលរងគ្រោះដោយគ្រោះមហន្តរាយផ្សេងៗ ពិសេសគ្រោះទឹកជំនន់ តាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់ ។
ពិធីនេះបានប្រព្រឹត្តទៅ កាលពីរសៀលថ្ងៃអាទិត្យទី២០ ខែកញ្ញា ឆ្នាំ២០២០ ក្រោមអធិបតីភាព លោកឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅបញ្ជាការដ្ឋានវរសេនាតូចលេខ១នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ស្ថិតក្នុងស្រុកប្រាសាទបល្ល័ង្ក ។
លោកមេបញ្ជាការតំបន់ប្រតិបត្តិការសឹករងកំពង់ធំ មានប្រសាសន៍ថា កងទ័ពដាច់ខាតត្រូវគោរពបទបញ្ជារបស់រាជរដ្ឋាភិបាល និងគោរព បទបញ្ជាតាមឋានានុក្រមនៃកងយោធពលខេមរភូមិន្ទនៅគ្រប់បណ្តាថ្នាក់ឲ្យមានប្រសិទ្ធភាព ។
កងទ័ពត្រូវស្មោះត្រង់ និងការពារដាច់ខាត ចំពោះជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់ ។ កងទ័ពជាកូនចៅរបស់ប្រជាជន ត្រូវបម្រើប្រជាជនដោយស្មោះត្រង់ និងដោយឥតលក្ខខណ្ឌ នៅគ្រប់ទីកន្លែង និងនៅគ្រប់ពេលវេលាដែលប្រជាជនមានទុក្ខលំបាក ។
លោកឧត្តមសេនីយ៍ទោ សោម ស៊ុន បាន ក្រើនរំឭកដល់មេបញ្ជាការគ្រប់កងឯកភាព និងយោធិនគ្រប់រូប ត្រូវត្រៀមលក្ខណៈរួចជាស្រេចគ្រប់ពេលវេលា និងមានមធ្យោបាយគ្រប់គ្រាន់ ដើម្បីត្រៀមចល័តអន្តរាគមន៍តាមបទបញ្ជាក្នុងពេលត្រូវការជួយសង្គ្រោះប្រជាពលរដ្ឋ ដែលជួបគ្រោះមហន្តរាយផ្សេងៗ ពិសេសជំនន់ទឹកភ្លៀងនៅតាមបណ្តាភូមិសាស្ត្រមួយចំនួន ដោយសារពេលនេះភ្លៀងកំពុងធ្លាក់ផ្ទួនៗនៅគ្រប់ទីកន្លែង ។
លោកវរសេនីយ៍ទោ ថនស៊ី សក្កដា មេបញ្ជាការកងវរសេនាតូចលេខ១នៃតំបន់ប្រតិបត្តិការសឹករងកំពង់ធំ បានថ្លែងអំណរគុណនិងប្តេជ្ញាចិត្តក្នុងការអនុវត្តភារកិច្ចត្រៀមចល័តអន្តរាគមន៍តាមបទបញ្ជា ក្នុងការជួយសង្គ្រោះប្រជាពលរដ្ឋ ដែលជួបគ្រោះធម្មជាតិផ្សេងៗ ពិសេសគ្រោះទឹកជំនន់ឲ្យទាន់ពេលវេលា និងមានប្រសិទ្ធភាពខ្ពស់ ។
បន្ទាប់មក ថ្នាក់ដឹកនាំនៃតំបន់ប្រតិបត្តិការសឹករងកំពង់ធំ បានធ្វើការត្រួតពិនិត្យកម្លាំង មធ្យោបាយ គ្រឿងបំពាក់ និងសម្ភារផ្សេងៗ សម្រាប់ធានាក្នុងពេលចល័តអន្តរាគមន៍បានទាន់ពេលវេលា តាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់ ឲ្យមានប្រសិទ្ធភាពខ្ពស់ ៕
ចែករំលែកព័តមាននេះ