ខេត្តពោធិ៍សាត់ ៖ ជំនន់ទឹកភ្លៀងបានវាយប្រហារបណ្ដាលឲ្យស្ពានកំពង់ល្វា ដែលជាប្រភេទស្ពានឈើ ស្ថិតក្នុងស្រុកភ្នំក្រវាញ ខេត្តពោធិ៍សាត់ បានបាក់រលំខ្ទេចអស់ទាំងស្រុង នៅល្ងាចថ្ងៃទី២០ កញ្ញា ឆ្នាំ២០២០ ។ តាមរយៈបណ្តាញព័ត៌មានហ្វេសប៊ុកបាន
បង្ហោះឱ្យឃើញវីដេអូឃ្លីបមួយដែលថតដោយប្រជាពលរដ្ឋនៅមូលដ្ឋានបានបង្ហាញពីស្ថានភាពទឹកហូរយ៉ាងគំហុកបុកតួស្ពានខ្លាំងពេក ទើបមិនអាចឲ្យស្ពានទ្រាំទ្របានក៏រលំបាក់តែម្ដង ។ បើតាមប្រជាពលរដ្ឋបានប្រាប់ថា ស្ពាននេះសាងសង់ឡើងដោយក្រុមការបងារគណបក្សប្រជាជនកម្ពុជាចុះជួយស្រុកភ្នំក្រវាញ ដើម្បីបង្កលក្ខណៈងាយស្រួលក្នុងការធ្វើដំណើរឆ្លងកាត់ក្នុងតំបន់នោះ ។
រហូតមកដល់ព្រឹកថ្ងៃទី២១ ខែកញ្ញា ឆ្នាំ២០២០នេះ បើតាមសេចក្ដីរាយការណ៍ព័ត៌មាន បានឲ្យដឹងថា ឯកឧត្តម ម៉ៅ ធនិន អភិបាលខេត្តពោធិ៍សាត់ កំពុងដឹកនាំក្រុមការងារ ដើម្បីចុះពិនិត្យស្ថានភាពស្ពានដែលបាក់រលំ និងរកមធ្យោបាយសម្រួលដល់ការធ្វើដំណើររបស់ប្រជាពលរដ្ឋជាបណ្ដោះអាសន្ន គ្រាដែលទឹកជំនន់កំពុងតែកើនឡើង
ប៉ុន្មានថ្ងៃចុងក្រោយនេះ ស្រុកមួយចំនួននៅក្នុងខេត្តពោធិ៍សាត់ កំពុងរងនូវការវាយប្រហារដោយជំនន់ទឹកភ្លៀងយ៉ាងខ្លាំងជាបន្ដបន្ទាប់ ដែលជាឥទ្ធិពលព្យុះទី១១ ដែលមានឈ្មោះ នូល (NOUL) មកលើប្រទេសកម្ពុជា ដែលអាចបង្កឱ្យមានភ្លៀងធ្លាក់ និងមានជំនន់ទឹកភ្លៀង នៅតាមបណ្តាខេត្តជាប់នឹងមាត់សមុទ្រ និងតំបន់ខ្ពង់រាបដែលក្នុងនោះក៏មានខេត្តពោធិ៍សាត់ផងដែរ កំពុងយាយីពីជំនន់ទឹកភ្លៀងនេះ ។
ទឹកស្ទឹងពោធិ៍សាត់ហក់ឡើងក្នុងកម្រិតប្រកាសអាសន្ន
ឯកឧត្តម ម៉ៅ ធនិន អភិបាលខេត្តពោធិ៍សាត់ កាលពីយប់ថ្ងៃទី២០ ឈានចូលថ្ងៃទី២១ ខែកញ្ញា ឆ្នាំ២០២០នេះ បានចុះពិនិត្យស្ថានភាពទឹកស្ទឹងពោធិ៍សាត់ ចាប់ពីចំណុចមុខសាលាខេត្ត រហូតដល់ផ្លូវបំបែកពោធិ៍វង្ស ស្ថិតក្នុងស្រុកកណ្តៀង និងបន្តចុះពិនិត្យនៅភូមិស្ទឹងតូច សង្កាត់រលាប និងភូមិព្រែកស្តី សង្កាត់លលកស ក្រុងពោធិ៍សាត់ ដែលបច្ចុប្បន្នទឹកកំពុងហក់ឡើងដល់កម្រិតប្រកាសអាសន្នហើយនោះ ។
ការពិនិត្យស្ថានភាពជំនន់ទឹកភ្លៀងនេះឯកឧត្តមអភិបាលខេត្ត ម៉ៅ ធនិន បានថ្លែងថា ក្នុងនាមអាជ្ញាធរខេត្តយើងបានត្រៀមរួចជាស្រេចនូវវិធានការសរុប មធ្យោបាយសរុបដើម្បីឆ្លើយតបបានទាន់ពេលវេលា ក្នុងករណីមានគ្រោះមហន្តរាយកើតឡើងធ្ងន់ធ្ងរ ប៉ះពាល់ដល់ជីវភាពរស់នៅ និងអាយុជីវិតរបស់ប្រជាពលរដ្ឋ ។
ឯកឧត្តមអភិបាលខេត្តក៏បានអំពាវនាវបងប្អូនប្រជាពលរដ្ឋ ត្រូវមានស្មារតីប្រុងប្រយ័ត្នខ្ពស់ ចំពោះទឹកជំនន់ដែលកំពុងជន់ឡើងខ្លាំងនេះ សូមស្វែងរកទីទួលមានសុវត្ថិភាព ពិសេសប្រុងប្រយ័ត្នចំពោះកុមារតូចៗ និងរក្សាអនាម័យឱ្យបានត្រឹមត្រូវ ។ ជាងនេះទៅទៀត អាជ្ញាធរមានសមត្ថកិច្ចគ្រប់លំដាប់ថ្នាក់ ត្រូវយកចិត្តទុកដាក់តាមដាន ក្តាប់ព័ត៌មានអំពីសភាពការណ៍គ្រោះធម្មជាតិ ស្ថានភាពរបស់ប្រជាពលរដ្ឋ ត្រៀមមធ្យោបាយអន្តរាគមន៍បានទាន់ពេលវេលា ។
មន្ត្រីជំនាញនៃមន្ទីរធនធានទឹកនិងឧតុនិយមខេត្តបានប្រកាសឱ្យដឹងផងដែរថានឹងមានភ្លៀងធ្លាក់ពីតំបន់ជួរភ្នំក្រវាញ ស្ទឹងធំ និងស្ទឹងអារ៉ៃ មានកម្រិតខ្ពស់ ហូរចាក់មកលើដងស្ទឹងពោធិ៍សាត់ ។ ឥទ្ធិពលនៃស្ទឹងខាងលើនេះ និងធ្វើឱ្យទឹកស្ទឹងពោធិ៍សាត់ មានសន្ទុះកើនឡើងជាបន្តបន្ទាប់ និងអាចបង្កឱ្យមានទឹកជំនន់នៅក្នុងទីរួមខេត្តពោធិ៍សាត់ទៀតផង ។
យោងតាមស្ថានភាពអាកាសធាតុខាងលើ អាជ្ញាធរក្រុង ស្រុក ឃុំ សង្កាត់គ្រប់លំដាប់ថ្នាក់ និងប្រជាពលរដ្ឋទូទាំងខេត្ត ពិសេសប្រជាពលរដ្ឋរស់នៅតាមដងស្ទឹងពោធិ៍សាត់ និងស្ទឹងពាក់ព័ន្ធ សូមបង្កើតការយកចិត្តទុកដាក់ ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ និងត្រៀមរកទីទួលសុវត្ថិភាព សម្រាប់ជម្លៀសប្រជាពលរដ្ឋដែលងាយរងគ្រោះ ៕
ចែករំលែកព័តមាននេះ